Ebriyu 9

Diyus Bale ste swa Daga at Masuwad

1Ebi taguna fag fatuyanan ngayu wan at foyungan sa baliwa nu gseg Diyus. Sanya nasulitanan yangay nu kawat sik bale fagnansegan sas Diyus ste swa daga. 2Ay at naawat fag bale, duwa at silid. At taguna fag silid, at ngayan, Mafasamanan fag Silid. Sanya wan at salung tagsaranganan, ay at fagfatungkudan tinafay, ay at ngay tinafay. 3Ay sis day guyuy famalabag fag falefe, at faduwak silid, at ngayan, Taglabi nu Mafasamanan fag Silid. 4Sanya wan at fagyagoan bebanglu at fangawat gintu. Ay sanya yangay e fagsuwadan at fangawat kayu akasya, at ngayan Fagsuwadan Fatuyanan, ay kanya madafutan gintu. Ay sanya sad basad, e tuluk fagnuwan. At sadi, at fagsuwadan at fangawat gintu at masuwad mana,#9:4 mana: sik fafa Diyus at nafon sa sangay taw Israel, gina kanya glo sis talun at yud e taw. ay at faduwa, Arun at suwan at nasalingsingan, ay at fatulu, at fatuyanan fag duwak batu madalafi. 5Ay at matungkud sis tungud Fagsuwadan, kata duwak tagfabarita, at ngayan kerubin. Kanya sik fagsafulan te, sanya wan Diyus. At ngay fakfak famalanbung sas fagdaul Fagsuwadan. Ka fag fagsuwadan at suklub at ngayan, Fagfalyaman Asalanan. Katsi wami mafafoyung fagayu at suwadan sanya.

6Katanya nu mafasinean sad basad Diyus bale ste swa daga. Ay ngay taganyun gsakbo sanya kayu menit sis taguna fag silid laman gfagurungan at fagbulun sanya. 7Ay tagsakbo sat faduwak silid, at fun taganyun way, ay kanya oma sayginan wadi sik banwa. Ay kanya wa gsakbo nu way guba sik taguk. Ka fag taguk at fanganyun laman at famalyam at asalanan mandi ay anggan sat ngay taw at yud natumlungud fag ngay asalanan. 8At Masine fag Falad gfoyung ka fag ngay suguwan laman nanfasaful antam te, at ngay taw wa masakbo sat Taglabi nu Mafasamanan fag Silid, kaduge ste swa daga taguna Diyus bale. 9Kanya fag bale sik fafaskudanan sa katsi fag ngay menit. At ngay anyun wa mafafasine at tagseg at amatanganan laman umlayun sat masine. 10Ka fag ngay anyun sa way baliwas fakonun, ay fanginum, ay anggan balyavtan nu gfegus. Katanya fagayu sa way at bilug fagtvngvd yap ngay Diyus fabagu at dan fag balyavtan.

Tam Fun Isus At Taguk at Masuwad

11Isus indasug bilang sik fun taganyun. Kanya nafadasug sa antam at fagmasineun at ke fanambagun sa antam, ste swa daga. Ay kanya nalo sas banwa ay nasakbo sas bale glabi yay Muisis at bale nu yud e mangalong at kamasinean, bundi taw at naawat, teway wa ste swa daga. 12Sayginan way tam Fun Isus nu nasakbo sanya sa Taglabi nu Mafasamanan fag Silid. Ay kanya wa nauba ngay kambing at taguk ay ngay baka riyangan at taguk. At nauba at taguk tuwa mandi fiya fiya. Ay kanya long nabalabag wa fiya antam faggugat. 13Ebi ngay taganyun nabul kambing ay baka tama at taguk, ay anggan mamam at ke dafug siginan at nagyagoan baka riyangan, ay naramsig sa sik taw at ke mafurat. Fakatanyaun at fagbulun laman nanfalyam ka fag taw at fagmafuratun. Nu katanya, kanya masine wan nu kafoli laman nanseg Diyus. Ay roro ka fag ngay fagbulun fanbilug way. 14Glabi yay kanya tam Fun Isus at taguk at famasine tam amatanganan. Gfasine antam siginan tam ngay fagbulun takata wa sik ngay taw kinkate at falad. Nu katanya, mafafagbulun watam masine sas Diyus tagleleg. Kanya fagayu nafabul watam teway tam Fun Isus at yud e asalanan naanyun wa at bilug sas Diyus. At Masine fag Falad at yud e fakatabuwan at natarabang anya gina gfagbulun takatanya.

Isus At Taguk Fanfatvngvd Diyus At Fatuyanan

15Nu katanya, tam Fun Isus wan at tagbuknga at bagu fag fatuyanan sas Diyus ay sat nafili fag ngay taw, laman at nafili fag ngay taw mafabul tuwa Diyus at nafatuyanan fag fagafonun at yud e fakatabuwan. Tam Fun Isus at faginkateun, laman nanfalfas ka fag ngay taw siginan at asalanan at nafagbulun si ebi taguna fag fatuyanan.

16Sik taw nu e fatuyanan laman nanfon ban at nanuranan gina kate, at tiba ya gbul yap ngay umtuyan fiya fiya te, ka fag taw inkate wan. 17Takatanya fag fatuyanan nu e masuwad at longan, gina yay ka fag taw inkate. Ay di e masuwad at longan, gina ka fag taw gleleg. 18Nu katanya, anggan ebi taguna fag fatuyanan we famatvngvd nu e dway taguk. 19Ebi, gina Muisis gfoyung fagayu Diyus at longan sa sangay taw, kanya nabul ngay baka riyangan at taguk ay ngay kambing at taguk nafasagbatan sas mamam, ay sik sanga isopo, ay sik sigyu maraska. Ay kanya naramsig sas Diyus at longan ay anggan sa sangay taw. 20Ay Muisis glong te, “Tuy fag taguk tagfatvngvd Diyus at fatuyanan sa ayu. Kanya nasugu ayu te, urunganani tuwa faningi.”#9:20 Nu Galin 24:8. 21Ay katanya yangay at fagbulun, naramsig yangay taguk sas Diyus bale ay anggan sas fagayu fagnuwan fanseg sas Diyus. 22Kata Muisis at Suguwan, arvs fagayu sa way sik taguk at fanfasine. Ay nu dway e nafataristis taguk, Diyus wa gfalyam at ngay asalanan.

23Diyus bale ay anggan fagayu tagsanya fag fagnuwan, kanya at fafaskudanan yay tagsas banwa. Kanya fasinei sa sik ngay balan at taguk. Ay roro at matuyan fiya fiya fag ngay fagnuwan sas banwa saman tuwa. At famasine ka fag ngay fagnuwan glabi yap fiya fiya tagste swa daga. 24Tam Fun Isus at fagsakboan, bundi sa Taglabi nu Mafasamanan fag Silid, sa sik taw at naawat. (Kanya fag silid sas bale ste swa daga, sik fafaskudanan way tagsas banwa.) Ay roro Isus nasakbo wa sas banwa, ay gbanwan wa sas Diyus at daga salubangan laman igbukngan antam.

Sayginan way Isus nu Ganyun At Bilug

25Ste swa daga fag fun taganyun nu gsakbo sa Taglabi nu Mafasamanan fag Silid kayu banwa e uba taguk balan. Ay roro tam Isus gina nasakbo sas banwa, wa ngayu ginan nu gfon at bilug laman sik anyun. 26Nu katanya way ro, ngayu ginan wa ro nu e gfauri anya siginan wa ebi sfagsigadan tam fagdaul daga. Roro mangaro at matuyan, sayginan way kanya nu nsure ste swa daga. Katanya at nafagbulun katsi sis wa fakatabuwan fag ngay menit. Naanyun at bilug, laman nanfalyam ngay taw at asalanan.

27Diyus wan at ke fasadan te, sayginan way fagayu taw nu kate, ay fadogan, Diyus gfili te, go sinu at fagfauriun ay go sinu at yud fagfauriun. 28Ay katanya yangay, anggan tam Fun Isus sayginan way nu nkate laman nanfon at bilug sik anyun, laman gfalyam ngayuk taw at asalanan. Ay kanya at faduwa ginan ban kasure, wa sas asalanan baliwa. At fakasureun ban, laman nanfalangfe ban at ngay tagfanya fiya fiya anya.

Currently Selected:

Ebriyu 9: TAWEAST

Highlight

Copy

Compare