Ebriyu 8

Tam Isus Tam Fun Taganyun

1Katatuy taguna fiya fiya ku longan sa ayu: Antam e fun taganyun, kanya tam Isus. Ay kanya malunggung sa taglabi nu masine fag faglunggungan sas banwa sas Tiba Tungud fag Diyus at day tigyangan. 2Ay kanya gfagbulun sa Taglabi nu Mafasamanan fag Silid. Ka fag silid tam Diyus at naawat, bunwa taw.

3Fage nafiliun at ngay fun taganyun: laman kanya nanganyun ngay taw famanyun ay anggan at nafilas fag ngay balan fag anyun. Nu katanya, anggan tam fun taganyun, tam Isus, foni yangay fiya sik anyun.#8:3 sik anyun: Tam tagriruk glong sis tapan 9:12 te, tam Isus at anyun at taguk wa mandi. 4Ay tam Isus, nu ste swa daga way ro, wa nsik taganyun. Teway ngayu wan at taganyun ste swa daga tagfon anyun, gfaning Diyus at suguwan. 5Ay ka fag ngay taganyun, at fagbulun sas Diyus bale ste swa daga. Takatanya fag ngay fagbulun sik fafaskudanan way, kata sik aninu tagsiginan at urungan fag bale sas banwa. Gsaful watam te, tuy sik ngay fafaskudanan way, teway kaduge Muisis gaawatun ebi Diyus bale, Diyus nalong anya te, “Amatangani dawdaw. Ay nu kawat ban o, faningi tuwa ku nafalag emu si ku fafaskudanan sanya fag bugsul.”#8:5 Nu Galin 25:40. 6Ay katsi Diyus at nafon sa tam Fun Isus fag fagbulun amadaragang yap sa ebi at ngay taganyun at fagbulun. Katanya yangay tam Fun Isus at nafadasug sa antam fag fatuyanan amadaragang yap sa ebi fag fatuyanan. Teway at bagu fag fatuyanan nu e fanambagun glabi yay sat dan fag fatuyanan.

7At taguna fag fatuyanan nu dyaman e fanlonganan, satu ro wa gasarapan at tiba. 8Dewa katanya, Diyus nalag wayay at fanlonganan sat ngay taw; nu katanya, nalong te,

“Umdasug wa ban fiya sik ngay menit,

nangawat aw sik bagu fag fatuyanan sa sangay taw Israel ay sa sangay taw Uda.

9Ku fatuyanan ban saman yay sa ebi ku fatuyanan sat ngay aguyangan,

gina aw nataban anya siginans talun Iptu.

Kanya wa nafatunglus nu gfaning sa ku fatuyanan ebi,

ay nafabayan kwa anya.”

10Ay tam Fun nalong te,

“Katatuy ban at bagu fag fatuyanan ku fagnanfagbulunun sa sangay taw Israel sat fagunaan fag ngay menit: gfatsa aw at ngay amatanganan ku ngay foyungan ay gfamatang aw anya.

Aw wa ban at Diyus ay kanya wan ku ngay taw.

11Ay kanya wa ban nanfoyung

sat ngay kaiban ay anggan sat ngay kalongan te,

‘Asafuli tam Fun.’

Teway fagayu ban taw tanan wa gsaful angku,

siginan madaragang fag taw ay anggan sat yud madaragang fag taw.

12Ay gfalyam kban at ngay fagbulun at mauri,

ay dakdi ban gamatangan at ngay asalanan.”#8:12 Eremyas 31:31-34.

13Diyus at fagnafoyungun ka fag fatuyanan at bagu, teway ka fag fatuyanan at dan we masuwad wan. Ay nus nge wain at dan ay at yud e fanambagun, gakalyamun wan.

Currently Selected:

Ebriyu 8: TAWEAST

Highlight

Copy

Compare