Ebriyu 10

1Muisis at Suguwan bunya fiya fiya ka fag ngay masine at kumdasug ban. At Suguwan sik ngay fafaskudanan way, kata aninu tagsanya fag ngay masine. Kata at Suguwan, e ganyun kayu banwa kayu banwa. Ay roro, kanya wa batang mafafasine sat ngay takakbang sas Diyus laman umlayun sat masine. 2Ka fag ngay tagseg nu nsine di, ay nalyam at asalanan, wa ban gamatangan at asalanan. Ay manga di ban gfon at anyun. 3Fangkabat di ro, ka fag ngay anyun gfaamatang way ka fag ngay taw at asalanan kayu banwa kayu banwa. 4Teway sik baka tama taguk ay kambing taguk wa batang mafafafalyam sik taw at asalanan.

5Nu katanya, gina tam Fun Isus indasug ste swa daga, nalong yay sas Diyus te,

“Wo kaumsig nus nge wain fag anyun,

ay roro nafe bilug tuwo angku laman manyun aw ku bilug.

6Wo guseganan sa sangay fagbatasun fag anyun ay tibak anyun famalyam asalanan.

7Nu katanya, nalong aw te, ‘Ku Diyus, iste aw, laman nanfaning aw am fasadan.

Fakatanyaun, nanfaning aw at marirukan sis Diyus at longan sa angku baliwa.’ ”#10:7 Danyu 40:6-8.

8Tam Fun Isus at longan aro sas Diyus te, “Wo kaumsig nus nge wain fag anyun ngay taw at naanyun sa emu laman famalyam at asalanan, wo guseganan kanya fagayu.” (Katanya Isus at longan, dewa ngay taw gfaning way Muisis at Suguwan nu ganyun.) 9Ay rodi kanya nalong yay fiya te, “Ku Mama, iste akwan, laman nanfaning aw am fasadan.”

Diyus nafalyam wan ebi taguna fag ngay anyun, ay natubus wa at faduwak anyun: kanya Isus at nafagbulun. 10Isus nafaning tuwa Diyus at fasadan. Ay nu katanya, malayun watam sat masine, teway tam Fun Isus sayginan way nu naanyun at bilug.

11Dewa ngay taganyun gfainfolian kayu menit kayu menit nu nanganyun takatanya, wa batang gfalyam ngay asalanan. 12Ay roro ngap tam Fun Isus at nafon at bilug wan ay sayginan way nu ganyun, at mafafalyam tuwa taw at asalanan. Ay kanya malunggung wa sa taglabi nu masine fag faglunggungan sas Diyus at day tigyangan. 13Ay katsi tam Fun Isus gfanya yay, yap ngay Diyus nafatsa sat daga fagmadaragangun at ngay fabarangyan. 14Sayginan wan nu nafon at bilug, ay tuy nafasine wan faggugat at kinsadi sas Diyus. 15Ay anggan at Masine fag Falad at nafatuyan sa antam katanya. Taguna at nalong:

16“Katatuy ban at bagu fag fatuyanan ku fagnanfagbulunun sa sangay taw Israel sat fagunaan fag ngay menit: gfatsa aw at ngay amatanganan ku ngay foyungan ay gfamatang aw anya.”#10:16 Eremyas 31:33.

17Ay at Masine fag Falad nalong yay fiya te,

“Kwa ban gamatangan faggugat at ngay asalanan,

ay anggan at ngay nafamabo.”#10:17 Eremyas 31:34.

18Ay Diyus nu nafalyam tuwa at ngay asalanan, wa ban gayudan sik anyun famalyam asalanan.

Fatunglusi Ay Fagafanudun sa Tam Diyus

19Nu katanya, ku ngay fadugsay am, anway sas Isus at taguk, di tam gaduwanun nu gsakbo tam sa Taglabi nu Mafasamanan fag Silid. 20Gina nkate, nafe dalan bagu sa antam tagfadasug sas leleg. Ay ka fag dalan nafadasug antam sa at day famalabag fag falefe ay anggan sa Taglabi nu Mafasamanan fag Silid.

21Ay katsi, e taganyun watam at madaragang gmagurang Diyus at ngay taw. 22Nu katanya, nangakbang watam sas Diyus, e matuyan fag amatanganan ay e matvngvd fag fagafanudun. Mafafagbulun watam katanya, teway tam amatanganan kata wa nu naramsigan Isus at taguk, laman malayun sat masine ay watam gamatangan sa tam asalanan. Ay tam bilug kata wa nu e nafegus sik safa maliyo. 23Fatunglusi tuwa nu gfanya tam sa ebi tam fagsegun fag fagfanyaun. Dangay tam fainbalian, teway matuyan tuwa at nafatuyanan sa antam. 24Ay tam fagamatanganun antuwa te, go setain nu gfabitsug tam tibak taw at amatanganan, laman kanya kafanyu yangay at tiba ay gfagbulun at matuyan. 25Ay lag kalyam nu nangaful tam, kata tibak taw at fagbulun. Fangkabat di ro, fadfatvngvdani tuwa ay iba at amatanganan. Ay kaugat wan nu gsaful wam te, kakbang wan at menit tam Fun nu kafoli.

Lag Gfaning sas Asalanan

26Ay roro ngap nu gtumlungud way tam gfaning faggugat sas asalanan, dewa tam nadungug sat matuyan fag longan, we tibak anyun wan at mafafalyam tam asalanan. 27Sik taw nu gfatunglus way gugat sas asalanan, tagfanya anwa at malimu dawdaw fag faurianan, ay at masugba ban dawdaw fag afuy tagfamin Diyus at ngay fabarangyan.

28Galay sik taw nafamabo sas Muisis at Suguwan, ay e nafatuyan tuwa duwak taw ay ate tuluk taw, we kafanyu gfate wa fiya anya. 29Tain ay amatanganan? Setvngvd yangay katsi at faurianan sa ka fag taw at kinfurat dawdaw Diyus at Baguwama? Ay anggan at yud nafe masuwad at fatuyanan fag taguk at nafasine anya, ay naelongan mauri sat Masine fag Falad takafanyu anya? Matvngvd ban dawdaw at faurianan! 30Katanya wa fiya, teway nasaful watam at nalong te,

“Aw wan tagfauri. Ay aw wan tagfafoli at mauri sat ke mauri.”#10:30 Diyuterunumyu 32:35.

Ay nalong yangay te,

“Tam Fun gtap ban ay gfaurianan at ngay taw at asalanan.”#10:30 Diyuterunumyu 32:26; Danyu 135:14.

31Malimu wa fiya Tagleleg Faggugat fag Diyus at faurianan.

32Amatangani tuwa ebi ay fagbulun sat kinlangfe fag ngay menit gina am inyamag. Nasungatan tuwam dawdaw, dewa am e natakan ay e nafauri ayu. 33Ay anggan e nataban ayu sa sangay taw buknga, ay gfalingun ayu, ay gfauri ayu. Ay tiba ginan, nangufud tuwam, dewa e gfauri ay fadugsay. 34Ay kafanyu yangay am ay ngay fadugsay at kinsungsung. Ay guseganan tuwam, dewa e nabul ay fagagbilugun. Teway nasaful wam te, Diyus nafon ayu glabi yay ay fagagbilugun. Ay kanya we fakatabuwan faggugat. 35Nu katanya, lag gubun ay fagafanudun yud gaduwanun, teway gbiya ban ay nalufuyan, nu matvngvd tuwa ay fagafanudun. 36Sungatani tuwa, laman nanfaning tuwam Diyus at fasadan. Nu katanya, mul ban am Diyus nafatuyanan. 37Teway marirukan sis Diyus at longan te,

“Wa ban glugo sirut, tagadasugun kadasug wan, ay wa gasalagan.

38Ku ngay taw at matuyan tagafanud, e leleg tuwa ban.

Ay roro, kanya nu nfoli way sa ebi, kwa guseganan.”#10:38 Abakuk 2:3-4.

39Ay itam, di tam katanya. Kanya nyayu wa Diyus teway gaduwanun, ay umfauri wa ban. Ay roro ngap itam, tagafanud tuwa tam ay kumlangfe ban.

Currently Selected:

Ebriyu 10: TAWEAST

Highlight

Copy

Compare