Ebriyu 7

Sik Taganyun at Ngayan Melkisidik

1Melkisidik sik fun sis fulan Salem. Ay sik taganyun yangay sat Tiba Tungud fag Diyus. Ebi gina Abrayam guli siginans fagfabarangyanan ay nababo sik ngay fun, Melkisidik nafablang anya. Ay Melkisidik nalong sas Abrayam te, “Diyus mamanyun nangus sa emu.” 2Ay Abrayam nafon anya at fasafuluk afud siginan fagayu at nabul sa sangay fun. Melkisidik ngayan at masuwad taguna te, sik “Fun Matuyan.” Ay at faduwa, kanya at fun sis Salem at masuwad te, sik “Fun Tagfon Fagmanabayanun.” 3We rirukan te, sinu Melkisidik at tama ay at tina ay anggan sat aguyangan baliwa. Ay anggan we rirukan te, tain nu kasalug ay go nkate yay. Kanya kata yangay Diyus at Baguwama, teway kanya sik taganyun yangay faggugat.

4Amatangani, Melkisidik madaragang dawdaw. Dewa ngani tam aguyangan Abrayam nafon tuwa anya at fasafuluk afud fagayu at nabul siginan at nababoan fag ngay fun. 5Gsaful tam te, fagayu taganyun tagsiginans Lebi at kadagdagan. Kata Muisis at Suguwan te, ngay taganyun buli siginan at fadugsay taw Israel at fasafuluk afud. Katanyai at nafagbulun dewa te kanya fagayu Abrayam at kadagdagan.

6Ay roro Melkisidik, dewa te bunwa tagsiginans Lebi at kadagdagan gbul yangay siginans Abrayam at fasafuluwan. Ay Melkisidik at longan nafadasug at masine ban sas Abrayam, Diyus at fagfatuyananan. 7Ay fagayu taw nasaful wa te, tagfadasug famanyun glabi yay dawdaw kamafanud sa tagbul famanyun. 8Ay at ngay taganyun, tagbul at fasafuluk afud, kate way. Ay roro marirukan sis Diyus at longan te, Melkisidik (tagbul yangay at fasafuluk afud) gleleg yay. 9Nu katanya, mafalong watam te, Abrayam nu nafon at fasafuluwan sas Melkisidik, anggan Lebi at kadagdagan nafon yangay at fasafuluwan sas Melkisidik. (Ay roro katsi at ngay taganyun wan tagbul at fasafuluwan kafud.) 10Gina Melkisidik nafablang Abrayam, Lebi ya nsalug. Dewa katanya, Lebi sanya wa gugat sit aguyangan Abrayam, teway sanya ginan yay ngani.

Isus sik Taganyun kata Melkisidik

11Diyus nafon sa sangay taw Udyu at Suguwan. Ay ka fag Suguwan fagdaul wa mafafaning nu dway e Lebi fag ngay taganyun. Nu kasakan di ka fag ngay taganyun at fagbulun, waro gayudan tibak taganyun. Ay roro Diyus nafili yay tibak taganyun, ay kanya wa siginans Lebi ay Arun at kadagdagan. Kanya kata yangay Melkisidik. 12Ay nu nantubus wan at ngay taganyun, tubusi yangay anggan at ngay suguwan. 13Kanya ku longan fagayu sa tam Isus baliwa. Ay roro kanya saman wak taw at kadagdagan: bunwa Lebi at kadagdagan. Ay wa batang e taganyun sanya ginan fag taw at kadagdagan. 14Ngayuk taw at nasaful te, tam Fun Isus siginan sik taw at ngayan Uda. Ay Muisis we longan sa baliwa sangay taganyun tagsiginans Uda.

15Katsi nasaful watam te, wa kasakan at ngay taganyun tagsiginans Lebi. Tuy fag longan glabi yay nu gfayamag, teway insure tibak taganyun kata Melkisidik. 16Isus insik taganyun yangay, ay roro wa gfaning sas Muisis at rirukan fag ngay suguwan sa baliwa at aguyangan. Fangkabat di ro, kanya fagin sik taganyunun antuwa te, kanya e fagmadaragangun gleleg faggugat. 17Marirukan sis Diyus at longan sa anya baliwa te,

“O wan sik taganyun faggugat

kata Melkisidik nu sik taganyun.”#7:17 Danyu 110:4.

18Nu katanya, ebi taguna fag suguwan kata wa nu nafasat dayu, teway we fagmadaragangun ay we masuwad. 19Muisis at Suguwan wa mafafalayun nus nge wain. Ay katsi nafasaful antam at taglabi yay nu masine fag fagsegun. Ay kanya mafatarabang antam nangakbang sas Diyus.

20-21Katsi e fagsegun watam glabi yay ebi. Ay anggan Diyus at nafatvngvd at longan sas Isus baliwa. Ebi, Arun at ngay kadagdagan, gina nsik taganyun, Diyus we nafatvngvd at longan. Ay roro, tam Isus fagin sik taganyunun teway Diyus nafatvngvd at longan nu nalong sas Isus te,

“Aw, Fun Diyus, nafatvngvd aw ku fatuyanan te, dakdi nanfasaman ku longan sa emu.

O wa ban sik taganyun faggugat.”#7:20-21 Danyu 110:4.

22Katanya Diyus at nafatuyanan te, tam Isus sik famatuyanan fiya fiya te, katsi fag fatuyanan glabi yay fiya fiya kamasine ebi taguna fag fatuyanan.

23Ngayu wan ebi at taganyun at natudtubusan, anway nu kate wa at sadi e natubus yangay, laman gfatunglus tuwa gugat at fagbulun. 24Ay roro tam Isus sik taganyun faggugat wan, anway kanya gleleg tuwa faggugat. 25Nu katanya, kanya nu mafabalabag, kasakan wan. Ay katanya at fagbulun sa sangay tagafanud sa anya, at takakbang sas Diyus, teway kanya gleleg tuway faggugat ay igbukngan sa ka fag ngay tagafanud.

26Takatanya wa fiya fag fun taganyun at malungud sa antam: tam Isus wa fiya! Malayun sat masine, ay di e asalanan, ay di e mauri, ay wa gfadiyuganan sa sangay tagasalanan. Tam Diyus nafatiba tungud anya sis banwa. 27Ay tam Isus di kata ebi fag ngay taganyun. Kanya fagayu gfon sik anyun kayu menit kayu menit sat asalanan mandi, ay fadogan sa tibak taw at asalanan. Ay roro tam Isus we fagayudanun katanya. Kanya nu gfon at bilug sik anyun, sayginan wadi. 28Sas Muisis at Suguwan, nalong te, e nanfili ban at fun taganyun siginan at ngay taw, dewa te, mafanalo way. Ay roro gina ntabu Diyus nu gfon at suguwan, fadogan kanya nafili at baguwama, ay nafatvngvd yay at longan. Ay at baguwama faggugat malayun tuwa sat masine.

Currently Selected:

Ebriyu 7: TAWEAST

Highlight

Copy

Compare