Ebriyu 6

1Tam foyungan sa baliwa tam Fun Isus nu famasigad way, wa ban tam umkugat sa tam fagafanudun. Nu katanya, ubuni yap takatanya laman umkugat tuwa tam sa tam fagafanudun. At mafanud nu naubun tuwa tam at yud e fanambagun fag ngay fagbulun. Ay mafanud yangay nu gafanud tuwa tam sa tam Diyus. Kanya fag duwa kata way sik ngay fagfatungkudan turuk bale. E naturuk wan. Nu katanya, lag gdog nanturuk. 2Ay e ngay foyungan yangay at yud masine nu katanya way tam ngay foyungan kayu menit: sa baliwa nu ngayuk fakasurungun, ay nu gfasat alfuyu at daluwap, ay at kinkate nu gdog gleleg, ay anggan sat yud katabu fag faurianan ban. 3Ay fagayu tam fatunglusi tuwa laman umkugat tuwa tam sa tam fagafanudun, tam Diyus nu kaumsig nu gleleg yay tam.

4Mafanud tuwa nu kaugat tam fagafanudun sa tam Fun Isus, teway nu dway tam kaugat, labon mubun tam anya. Sik taw nu dan wa gafanud, ay nalag wa Diyus at yamag, ay at batang naugalian wan tagsiginans banwa fag ngay famanyun, ay batang wa nafaningan sa at Masine fag Falad, 5ay dan wa namatang te, Diyus at longan masine, ay anggan nalag wa Diyus at fagmadaragangun takata ban takadasug fag ngay menit. 6Kanya fag ngay taw, nu naubun way at fagafanudun, wa kafafoli anya laman mubun yay at asalanan, teway gdog way gfatuktuk sas salibagan kayu Diyus at Baguwama, ay gfaplan anya.

7Diyus nafadasug at masine sa sik daga at marugme,#6:7 marugme: Sis Faniganun, medyo basa. anway malayun nu gmoyan. Ay at ngay tanum gtugbung tuwa, laman e fanambagun ban sat tagbilug. 8Ay roro tagtugbung sa tibak daga nu sik ngay madugi way ay sik ngay makmak mabuyu, ka fag daga we masuwad, ay labon Diyus kalimata, ay lumabe sasad afuy.

9Ay roro, em ngay fakesugun, dewa ami glong katanya sa ayu, intuyan wami te, ay ugali glabi yay aro ku longan fag daga nu masine, anway katanya yangay kinlangfe at ugali. 10Diyus faggugat matuyan wa fiya, kanya di kalyaman ay nafagbulun, ay ay fakafanyuun ay nafalag sa anya ebi ginan ay natarabang at ngay taw ay anggan katsi. 11Ay kaumsig ami dawdaw sa ayu sadi sadik taw nu maseganama tuwa nu gfatunglus am sat masine anggan umdasug sas fakatabuwan fag ngay menit. Nu katanya tuwa, umtuyan wam te, ay fagyalagun lumag wam fiya. 12Wami kaumsig nu gfalufuyun am. Faningi tuwa at ngay taw nu gfabul Diyus at nafatuyanan teway gafanud tuwa ay gbaris.

Diyus At Fatuyanan Umsure wa fiya

13Ebi Diyus gina gfatuyanan sas Abrayam, nafatvngvd at fatuyanan. Teway we glabi anya nu madaragang, ay kanya nafatvngvd wa sat ngayan mandi. 14Ay kanya nalong sas Abrayam te, “Tumarabang aktuwa ban gugat gugat emu. Gfaayu aw dawdaw am ngay kadagdagan.”#6:14 Fagsigadan 22:17. 15Ay Abrayam gfanya wa fiya dewa glugo, ay nabul wa fiya Diyus at nafatuyanan sa anya.

16Sik taw nu matvngvd nu glong, at fanfatvngvd at longan nafaseg sa sik madaragang taglabi anya. Ay dewa tiba gfaringangan anya, sat nafatvngvd fag longan nafalyam yay nu garingangan. 17Ay katanya yangay Diyus nafatvngvd at longan, teway katvngvdan nu kaumsig gfasaful sat ngay tagbul te, di mafafabali at fasadan. 18Katanya at nafagbulun laman gfabitsug tam amatanganan. Teway nasaful watam te, e duwak nafagbulun, ay wa kabali. At sadi, nafatuyanan te, nanfadasug sa antam sik ngay fagmasineun. Ay faduwa, nafatvngvd at longan. Gsaful watam te, tam Diyus di kamuwagan. Nu katanya, gtunglus tuwa nu gfanseg tam te, mon wa fiya antam at nafatuyanan, teway inkakbang tuwa tam sas Diyus tagdingding antam.

19Ka fag fagsegun matuyan ay matvngvd, ay gfatvngvd sa tam amatanganan. Tam fagsegun gdasug sa Taglabi nu Mafasamanan fag Silid. 20Sanya Isus naguna antam nasakbo, laman nantarabang antam. Ay kanya nsik fun taganyun faggugat, kata yangay ka fag taganyun at ngayan Melkisidik.

Currently Selected:

Ebriyu 6: TAWEAST

Highlight

Copy

Compare