Ebriyu 5

1Fagayu fun taganyun nafili siginan sangay taw, ay kanya tagtarabang sa sangay taw igbukngan sas Diyus. Ay mafafon tuwa at fagafonun fag anyun ay anggan at nafate fag balan, laman igfalyam taw at ngay asalanan. 2Ay ka fag ngay taganyun malukme tuwa sa sangay taw at yud e fagsafulun ay sat takalyam at matuyan, teway kanya sigon mafanalo way tiba ginan. 3Ay katanya wayay, kanya gfon yangay sik ngay anyun laman igfalyam sat asalanan mandi, ay anggan si tibak taw at asalanan. 4Ay nus nga sinu fag taw wa mafabul takatanya fag fagbulun laman sa anya mandi. Teway Diyus tuwa tagfili sik taw, kata ebi nu nafili Arun.

5Katanya yangay, tam Fun Isus wa mafaumsiganan mandi anya te, kanya at fun taganyun. Diyus tuwa at nafili anya, ay at nalong anya te,

“O wan ku Baguwama,

ay katsi aw wan am Mama.”#5:5 Danyu 2:7.

6Ay sa tibak afud Diyus at longan nalong yangay sa tam fun Isus baliwa te,

“O wan sik Taganyun faggugat,

kata Melkisidik.”#5:6 Danyu 110:4.

7Ebi, kaduge Isus ste swa daga, kanya gdarangin guyway dawdaw. Kanya get sas Diyus te, “Falangfei ban angku siginans fakateun.” Ay Diyus nadungug wa fiya anya, teway kanya gfaning tuwa tam Diyus. 8Ay kanya dewa Diyus at Baguwama, kanya nasaful tuwa gfaning nus nga setaw fag fagbarisun. 9Ay tam Isus nu nafagbulun wa katanya, mafamasadan wan laman umsik fun taganyun. Nu katanya, kanya wan tagfalangfe fagayu tagfaning anya laman di mfaurianan faggugat ban. 10Fakatanyaun, teway tam Diyus nafili anya sik fun taganyun, kata yangay ebi fag taganyun at ngayan, Melkisidik.

Faugati Tam Fagmasadiun sas Isus

11Ngayu yay ku fagananfoyungun sa ayu sas Melkisidik ay sa tam Fun Isus baliwa. Ay roro mataka way nu gfayamag aw sa ayu, teway infanalo wayay ay amatanganan. 12Satu nangus katsi, sik ngay takamoyung wam, teway glugo wan nu gafanud am. Ay roro gayudan yay am mangaro nu e nanfoyung ayu Diyus at taguna-taguna fag ngay foyungan. Kata yay am sik ngenge tagasusu, ay ya mafaon at matigas fag fakonun. 13Fagayu tagasusu, sik ngenge yay. Kanya ye nasafulan sa baliwa at matuyan. 14Ay roro sa long sik magurang, at matigas wa fag fakonun. Kanya gsaful tuwa gfili te, kanya at matuyan ay kanya at mauri, teway kanya faggugat gamatangan tuwa katanya.

Currently Selected:

Ebriyu 5: TAWEAST

Highlight

Copy

Compare