Ebriyu 4

Diyus at Nafatuyanan fag Fakamatoan

1Diyus nafatuyanan te, “Maadasug tuwa ban am sa ku fakamatoan.” Ay tuy fag fatuyanan mafanud tuwa anggan katsi. Ay nu katanya, mafamasadani tuwa, laman fagayu am umdasug tuwam sat fakamatoan. 2Anway e nafoyung tuwa antam at Masine fag Barita, kata ebi nu e nafoyung sa sangay taw Israel. Ay ka fag ngay taw at nadungug ebi, wa nafe fanambagun sa anya, anway ka fag ngay taw wa gafanud. 3Itam way tagafanud sas Isus at kumdasug sas Diyus at fakamatoan. Ay sa tibak taw baliwa, Diyus nalong te,

“Indotama aw ay nafatvngvd aw ku longan te,

kanya fag ngay taw wa ban umdasug faggugat sa ku fakamatoan.”#4:3 Danyu 95:11.

Katanya Diyus at longan, dewa ntabu at fagbulun ebi gina naawat tam daga, ay kamato wan. 4Nasaful watam te, Diyus kamato, anway marirukan sis Diyus at longan sas fafituk menit baliwa te,

“Diyus kamato wan sis fafituk menit, teway intabu wan nu kawat fagayu.”#4:4 Fagsigadan 2:2.

5Ay marirukan yangay te,

“Kanya fag ngay taw wa ban umdasug faggugat sa ku fakamatoan.”#4:5 Danyu 95:11.

6Kanya fag ngay taw ebi at nadungug at Masine fag Barita wa ndasug anway sat nafamaboan. Ay dewa katanya, tibak taw umdasug tuwa sas Diyus at fakamatoan. 7Ay nu katanya, Diyus nadog yay nafili sik menit, ay ka fag menit, katsi wan. Ay bandi nu glugo wan, Diyus nafasugfunanan nafoyung sas fun Dabid kata aro ku longan te,

“Katsi nu gdungug tuwam Diyus nu gelongan,

lag am gugat gfaning ay fasadan.”#4:7 Danyu 95:7-8.

8Uswe nu nafafon di ro sanya fag ngay taw sik fakamatoan fag buknga, Diyus wa ro inke longan sa baliwa tibak fakamatoan fag buknga tagkatsi ban baliwa. 9Ay nu katanya, Diyus at ngay taw e fakamatoan yangay ban, kata Diyus nu kamato sis fafituk menit. 10Anway nus nga sinu ban at kumdasug sas Diyus at fakamatoan, kanya ntabu wan at fagbulun, kata ebi Diyus nu nafatabu at fagbulun. 11Nu katanya, katsi fagayu tam ugatani tuwa laman umdasug tuwa ban tam sa ka fag fakamatoan. Ay laman we taw takamabo ay malukan si antam, kata ka fag ngay taw Israel ebi takamabo.

Tain Diyus at Longan nu Mafatarabang Antam?

12Diyus at longan gleleg ay madaragang tuwa. Diyus at longan at kamarukan glabi yay sik fiso tagsumbalian at uyup. Kata sik fiso nu gtaruk sa sangay sulfuwan ay sasad utuk, katanya yangay Diyus at longan gtaruk sa sangay taw, laman nanfasadsamanan tam leleg ay sumaful tam te, go tam amatanganan siginan tuwa Masine fag Falad ay go siginan ways taw. Kanya gfasure wa fiya sik taw at fasadan ay at fakaumsigun te, go masine ay go ate mauri. 13Diyus we awatan masuksuk sa anya; fagayu glag tuwa. Ay itam wa mandi sadi sadi tagsalubang sa anya ay tagfayamag fagayu tam nafagbulun.

Isus Tam Fun Taganyun at Madaragang

14Nu katanya, fatvngvdi tuwa tam fagafanudun, teway e madaragang tam fag fun taganyun at nasakbo sas banwa. Kanya Isus, Diyus at baguwama. 15Tam fun taganyun mafanalo yangay nu mafanalo way tam. Kanya mafafagbulun tuwa katanya, anway dewa nus nga setaw nu gafaskudan tam, anggan tam Isus ebi nafaskudan yangay nus nga setaw. Ay roro dewa katanya, kanya di e asalanan. 16Nu katanya, nu gafanud tuwa tam yud e aduwanun, akbangi wa sa tam Fun Takafanyu at taglabi nu masine fag faglunggungan. Nu katanya tuwa, kanya mamanyun antam ay tumarabang antam, gina tam e fagayudanun.

Currently Selected:

Ebriyu 4: TAWEAST

Highlight

Copy

Compare