Ebriyu 3

Tam Isus Amadaragang yap Muisis

1Ku ngay fadugsay, am wan Diyus at ngay taw. Tam Diyus tagsas banwa nafili ayu, kata yangay angku. Amatangani tuwa tam Isus! Tam fakamoyungun te, kanya Diyus at nasugu ay fun taganyun. 2Tam Isus matuyan tuwa nu gfaning sa at nasugu anya. Kata yangay ebi ebi Muisis matuyan tuwa nu gfangguna sas Diyus at ngay taw. 3Ay Isus at fagmasineun glabi yay Muisis, kata takawat bale glabi yay sat naawat fag bale. 4Ay fagayu bale e sik takawat, ay roro fagayu nus nge wain Diyus tuwa at naawat.

5Diyus at fanuguwan Muisis matuyan tuwa nu gfangguna sas Diyus at ngay taw, ay nasulitanan sa baliwas Diyus at longan nu kagurungan ban.#3:5 ay nasulitanan sa baliwas Diyus at longan nu kagurungan ban: ay ate, ay at ngay nafagbulun sik fafaskudanan sa takagurungan ban. 6Tam Fun Isus matuyan tuwa nu gfangguna sas Diyus at ngay taw, teway Diyus wa at baguwama. Ay itam wan Diyus at ngay taw, nu matvngvd tuwa nu gfanya tam sa tam fagsegun ban, kanya wan tam fagfalabiun.

Takamabo wa ban Umdasug sas Diyus At Fakamatoan

7Ay nu katanya, faningi at Masine fag Falad at longan te,

“Katsi nu nadungug tuwam Diyus nu gelongan,

8lag gugat gfaning ay fasadan, kata ebi ay ngay aguyangan,

gina kanya kamabo ay gfaskud Diyus sas talun at yud e taw.

9Sanya ay ngay aguyangan nu gfaskud angku gugat gugat,

dewa kanya nalag ku ngay nafagbulun sa anya,

at kadugayan ufat safuluk banwa.

10Nu katanya, indotama aw sanya fag sugfun taw.

Ay nalong aw te,

‘Faggugat at amatanganan kayayu way angku

ay wa gfaning ku ngay foyungan.’

11Katvngvdan nu kadotama aw anya, nafatvngvd aw ku longan te,

‘Ka fag ngay taw wa ban umdasug faggugat

sa ku fagafonun nangus fag talun at fagfafiyan.’ ”#3:11 Danyu 95:7-11.

Fabitsugi ay Iba at Amatanganan

12Ku ngay fadugsay, tagaki tuwa ayu laman ay amatanganan di mauri ay di kalukme. Nu katanya tuwa, di am kayayu siginan tam tagleleg fag Diyus. 13Ay fagbulun, fabitsugi ay iba at amatanganan kayu menit, kaduge e lungud, laman di am malukan ay di am gugat gfaning ay fasadan. 14Fagbuluni katanya, teway fagayu tam nafanud watam sa tam Fun Isus ay insadi watam sa anya. Ay katsi fatunglusi nu gseg tam anya kata ebi, anggan sas fakatabuwan, laman umke fanambagun at nafagbulun sa antam. 15Katatuy at marirukan sis Diyus at longan te,

“Katsi nu gdungug tuwam Diyus nu gelongan,

lag am gugat gfaning ay fasadan kata ebi ay ngay aguyangan nu kamabo ay nu gfaskud Diyus.”#3:15 Danyu 95:7-8.

Lag Gfaning ebi fag ngay Taw nu Kamabo

16Sinu kanya ebi fag ngay taw at nadungug Diyus nu gelongan, ay kamabo way? Go sangay bunwa Muisis nataban fag ngay taw siginans talun Iptu? 17Ay go sinu fag ngay taw Diyus at fakadotamaun kaduge 40k banwa? Go sangay bunwa sanya fag ngay takamabo ay inkate sas talun at yud e taw? 18Ay go sinu fag ngay taw Diyus at faglongan gina glong te, “Ka fag ngay taw wa ban umdasug faggugat sa ku fagafonun nangus fag talun at fakamatoan.” Go kanya wa long fag ngay takamabo? Go kin? 19Nu katanya, nasaful watam te, kanya fag ngay taw at fagyudun indasug sas Diyus at nafatuyanan fag talun teway we fagafanudun.

Currently Selected:

Ebriyu 3: TAWEAST

Highlight

Copy

Compare