Ebriyu 2

Dangai Kalyam Tam ngay Nadungug

1Ay nu katanya, fagayu tam, amatangani tuwa tam ngay nadungug, laman di tam garimanan kayayu siginan tam ngay nadungug. 2Anway matuyan wa fiya Diyus at ngay tagfabarita at longan. Fagayu at nasalan ay fagayu at nafamabo e faurianan wa fiya sa anya. 3Nu katanya, setain ro nu mlagyu tam siginans Diyus fandotaman nu dway tam gdungugan at ngay foyungan sa baliwa tam fakalangfeun. Ay at namasine wan kanya fag fakalangfeun! Ebi taguna tam Fun Isus nafoyung wa antam te, katanya tam fakalangfeun. Ay at nadungug fag ngay taw nananfatuyan yay fiya sa antam. 4Ay anggan Diyus sigon nananfatuyan yangay ka fag foyungan sa baliwa fakalangfeun. Madyay kanya nafasure at madulawan ay at madaragang fag ngay fagbulun. Ay manga nafon wa sa sangay taw sik ngay fagsafulun tagsiginans at Masine fag Falad. Saman wan Diyus nafon sa sadi sadik taw, nus nga setaw wa Diyus at fasadan.

Tagagbilug Antam ay Tagfalangfe Insik Taw at Ngayan Isus

5Sa baliwa em nalong fag fagdaul daga at bagu ban, Diyus wa nafaagbilug sat ngay tagfabarita. 6Anway katatuy at marirukan sis Diyus at longan te,

“Taw ro am fagamatangun at ngay taw?

Kanya dewa sik taw way,

gimalu tuwo anya.

7Sik kadugayun sirut nafababa wo anya sa sangay tagfabarita.

Ay bandi ataw, nafauseganan o anya ay nafesangbo kata sik fun.

8Ay fagayu nus nge wain nafasa o at daga fagmadaragangun.#2:8 Danyu 8:4-6.”

Nu nalong te, Diyus nafasik fun at ngay taw laman gmagurang fagayu, at masuwad te, fagayu nus nge wain sa ways taw daga fagmadaragangun. Ay roro katsi ya tam batang nalag te, taw wan tagmagurang fagayu nus nge wain. 9Dewa katanya, nasaful tam at famansulit sas Isus baliwa. Sik kadugayun sirut Diyus nafababa anya sas daga tagfabarita, laman nangatakan tuwa ay nangate laman gfalangfe antam fagayu. Isus nadalan fakateun teway Diyus infanyu antam. Ay katsi Isus inke fagmasineun dawdaw.

10Tam Isus tuwa Tagfalangfe Diyus at ngay unga. Kanya nafagbulun fiya fiya siginan at nadalan mataka. Diyus takawat ay tagagbilug fagayu nus nge wain ay nafagurungan wan fagayu at nafasadanan sas Isus. Matuyan wa fiya Diyus at ngay fagbulun. Katanya at fagnatabanun at ngay unga sat fagmasineun.

11Ay Isus wan tagfasadi at ngay taw sas Diyus. Ay at nafasadi fag ngay taw, sadi tuwa at Tama. Ay katanya tuway, Isus di kapla nu gfangayan anya te, “Ku ngay fadugsay.” 12Kata Isus at longan sas Diyus te,

“Nanfoyung ban aw am ngay ugali sa ku ngay fadugsay.

Ay nandanyu akban nanseg emu, gina at ngay taw maful.”#2:12 Danyu 22:22.

13Ay nalong yangay te,

“Gafanud aw sas Diyus.”#2:13 Isayas 8:17.

Ay nalong yangay te,

“Linggati, ste aw ay anggan Diyus at nafon angku fag ngay unga.”#2:13 Isayas 8:18.

14Anway ka fag ngay unga sik taw tuwa, ay anggan Isus insik taw yangay, laman kate yangay. Ay Isus at naatean nanbabo at ke fagmadaragangun sas fakateun. At ngayan tiba te, Satanas. 15Nu katanya, Isus nafalangfe ka fag ngay unga, kanya ebi tagafanuguwanan gugat sa baliwas fakalimuun kate.

16Isus at fagtarabangun bundi at ngay tagfabarita, antuwa Abrayam at fufu sat dagat daga. 17Nu katanya, Isus afaningi wa fiya akatai yangay at ngay fadugsay sas fagayu at ugali. Fakatanyaun at fagbulun laman kanya umsik mafangafanyu ay umsik kasakan fag fun taganyun sas Diyus at akbang. Ay naanyun anya laman mafafalyam tuwa fagayu taw at asalanan. 18Isus nadalan wan ngay famaskud ay fagatakanun. Nu katanya, kanya katsi mafatarabang tuwa tagdalan ngay famaskud.

Currently Selected:

Ebriyu 2: TAWEAST

Highlight

Copy

Compare