Ebriyu 12

Isus At Nafasigad Tam Fagafanudun

1Ka fag ngay tagafanud nangayu wan kata gsafungan antam, ay ebi kanya fagayu nananfatuyan tuwa at fagafanudun. Ay itam yangay, kata tam sik tagladlabian nu nantarung sat filian fag dalan. Nu katanya, fagayu tam sungatani tuwa nu gafanud tam. Ay ubuni nus nge wain tagfabiyatan antam, ay tam asalanan sigon, teway kanya gfataid way antam. 2Ay amatangani tuwa faggugat tam Isus, teway nu gafanud tam, nafasigad tam siginan anya, ay kanya yangay tagtaban antam yap ngay tam nafatabu nu gladlabian tam. Kanya nasungatan tuwa anggan intuktuk sas salibagan kayu, teway nasaful te, bandi ban nu nlangfe wan, kanya mafauseganan tuwa. Ay kanya wa gamatangan dawdaw dewa te, sik mapla wa fag fakateun. Ay katsi kanya malunggung wa sa taglabi nu masine fag faglunggungan sas Diyus at day tigyangan.

3Amatangani Isus. Kanya nasungatan tuwa, dewa at ngay tagasalanan kalimata dawdaw anya. Amatangani anya, laman di ban am mafanalo ay gfangafoliun. 4Dewa am gfabarangyan sas asalanan, di e fate ayu, kata at kin-gurungan sas Isus.

Diyus Igfoyung ay Gfegan At ngay Unga

5Go nalyam wam Diyus at foyungan at tagfatvngvd ay amatanganan? Diyus nangayan ayu te, “Am wan ku ngay unga.” Nu katanya, marirukan sis Diyus at longan te:

“Ku unga, lag gfe yud e masuwad tam Fun at famegan emu.

Ay lag kabalu sam amatanganan,

kanya dewa gfatungul am ugali.

6Anway tam Fun gfegan wa fiya at nesugan fag ngay taw,

ay gfalang fagayu at natap te, ‘Ku unga.’ ” #12:6 Fangatulun 3:11-12.

7Nu gatakan wam, sungatani tuwa, teway gsaful wam te, Diyus gfegan wa fiya ayu. Teway katanya wan Diyus at fagbulun sat ngay unga, ay am wan at unga. Go e unga ste swa daga at tama yud batang gfegan anya? Yaya! 8Diyus gfegan tuwa fagayu at unga. Nu dway ro gfegan, at masuwad, bunwa am fiya fiya at unga.

9Ay katanya yangay, tam tama ste swa daga, dewa gfegan antam, gseg tuwa tam anya. Ay glabi yay ro nu gfaning tam tam Tama sas banwa, laman e leleg tuwa ban tam faggugat. 10Tam tama ste swa daga nu gfegan antam, wa glugo, ay kanya nu gfagbulun, katvngvd way at nasaful. Ay roro, tam Diyus at fagfeganun antam, at masuwad te, laman e fanambagun tuwa tam, ay laman umkata tuwa tam sas Diyus nu malayun sat masine.

11Gina sik taw e famegan, masait way ay wa guseganan. Ay roro, bandi ban at ngay tagdalan sanya manabayan tuwa ay matuyan nu gbanwan.

Sik Famatagak at Famabitsug Ay Amatanganan

12Ay nu katanya, fabitsugi ay ngay take takalufuy. Ay fatudi ay ngay tud takalukme. At masuwad te, fatvngvdi ay amatanganan. 13Ay nu glo am, sai tuwa at maturun fag dalan, laman sik taw at masluwan at darafa di umkugat nu maslu; fangkabat di ro, umfiya tuwa.

14Ugatani ugalii manabayan sas fagayu taw ay malayuni sat masine. Nu dway katanya, tibak taw wa lumag tam Fun. 15Tagaki tuwa, laman ban si ayu di e taw at yud mul Diyus at famanyun. Ay tagaki yangay, laman ban si ayu di e taw at amatanganan di mkata sik mayat fag fakonun. Anway takatanya, gfafanggalutan way ayu ay igfafurat way sas ngayuk taw.

16Ay tagaki yangay, laman ban si ayu di e taw takamayun ay anggan yud gfaning sas Diyus kata Isaw. Kanya nafon way at fakaturunganaun, ay at nabul sik fakonun way sirut. 17Ay nasaful yangay am te, Isaw at tama nafalin wa sat ariyan at fakaturunganaun at fagmadaragangun. Ay Isaw dewa matvngvd nu get ay guyway, at tama wa nafon, teway at nafagbulun wa manga mafabali.

Taguna fag Fatuyanan wa kata Katsi fag Fatuyanan

18Ka fag bugsul ay fakadasugan at ngayan Muyud Siyun. Kanya saman yay fiya fiya sas Bugsul Sinay tam ngay aguyangan nadasug ebi ay nated. Ay sanya sis Bugsul Sinay nalag tagbiya fag afuy, ay mason fag marum, ay bagyu. 19Ay nadungug gbudyung ay sik elongan. Ay nu nadungug ka fag elongan, kanya glong te, “Lag gelongan nus nga setaw sa emi.” 20Ka fag ngay taw wa mabaris nu gdungugan ka fag longan te, “Nus nga setaw fag mangimut at kumdasug sanya fag bugsul, falangi wa batu anggan umkate.”#12:20 Nu Galin 19:12-13. 21Ay dewa Muisis, gina nalag kanya fagayu tagsis bugsul, nalong te, “Kudkulugan aw dawdaw kalimu.”

22Ay roro ngap ay fakadasugan fag muyud at ngayan te, Siyun. Kin, indasug wam sa Tagleleg Faggugat fag Diyus at fulan, sas Erusalem tagsas banwa. Sanya wan at ngay tagfabarita maful ay guseganan ayuwayu, 23gasfuwan Diyus at ngay unga. Kanya kata ngay turungana ay at ngayan marirukan sas banwa. Ay indasug yangay am sas tagtap taw at asalanan, at masuwad te, Diyus Tagmagurang fagayu. Ay indasug yangay am sat matuyan ay kinlayun sat masine fag ngay taw, at kinkate ebi. 24Ay indasug wam sa tam Isus; kanya wan tagbuknga sat bagu fag fatuyanan. At taguk at kinramsig gfalyam asalanan. Ka fag taguk amasine yap Abel at taguk at naet fanfasudan.

25Nu katanya, tagaki wa fiya, lag kauri. Dungugani wa fiya Diyus nu gelongan antam. Ebi fag ngay taw Israel tagfayud gugat gugat Muisis nu gelongan ste swa daga, wa nlangfe sas faurianan. Setain ya ban nu mlangfe tam nu dway tam gdungugan tagsiginans banwa fag taglong nu gfoyung? 26Ebi Diyus gina naelongan siginans Bugsul Sinay, daga nauwigan. Ay katsi nafatuyanan te, “Sayginan kya ban muwig daga, ay anggan banwa.”#12:26 Agay 2:6. 27At fagnalongun te, “Sayginan ya ban,” at masuwad te, fagayu at naawat nanfauwigan ban ay nanfalyam yay. Nu katanya, at sawad ban at yud tuwa kauwig.

28At masuwad te, Diyus gfon antam sik fagmagurangan at yud guwigan. Nu katanya, museganan tuwa tam sa tam Diyus ay sumeg tam anya at maumsig tuwa fiya fiya sa anya. Ay umlimu tuwa tam ay gumalang anya. 29Anway tam Diyus kata sik afuy daul tagbatas.

Currently Selected:

Ebriyu 12: TAWEAST

Highlight

Copy

Compare