Ebriyu 11

Taguna fag ngay Tagafanud nu Maugalian

1Nu gafanud watam sas Diyus, intuyan watam te, umdasug wa ban fiya tam fagfanyaun. Ay matvngvd tuwa nu gafanud tam, dewa tam yud batang glag. 2Ebi taguna fag ngay taw gafanud tuwa, ay nu katanya Diyus nafauseganan anya. 3Ay itam, gafanud yangay tam, ay nu katanya, inyamag tam te, Diyus gelongan way nu kawat fagayu ste swa daga. Ay at awatan, dewa kalag, at fangawat siginan way yud e kalag.

4Abel gafanud tuwa sa Diyus, nu katanya, kanya nafon sas Diyus sik anyun amasine yap sit kaka, Kain, at anyun. Diyus nalong sas Abel te, “Nu glag aw emu, matuyan o fag taw, ay guseganan aktuwa sam nafonan angku fag anyun.” Ay Abel dewa nkate, kanya katsi kata yay nu gelongan sa antam, teway kanya gafanud tuwa.

5Inuk gafanud tuwa sas Diyus, nu katanya, Diyus nataban wa anya sas banwa, ay wa nkate. Ay tibak taw we nalag anya, teway Diyus nabul wan. Kaduge yud nabul, intuyan te, Diyus guseganan anya. 6Ay sik taw nu dway gafanud, Diyus wa guseganan anya. Teway sik taw takaumsig kakbang sas Diyus, afanudi tuwa te, e Diyus tagleleg ay kanya wan tagfon nalufuyan sas fagayu takaumsig nangasaful anya.

7Nuwe gafanud tuwa sas Diyus, nu katanya, kanya nafaning Diyus nu gfatagak anya te, e mdasug ban, dewa te, ya batang glag. Kanya naawat sik tagbiya fag balutu, laman talmanugangan umlangfe siginans safa daul. Ay Nuwe at fagbulun nafoyung te, mauri way ste swa daga fag ngay taw at fagbulun. Ay Diyus nu glag anya te, sik matuyan fag taw, teway gafanud tuwa sa anya.

8Abrayam gafanud tuwa sas Diyus, nu katanya, kanya nafaning Diyus at longan te, “Alini wan ste ginan fag talun ay loi wa sa ku nafon emu fag daga.” Ay kanya nalo wa fiya, dewa yud nasaful at fakadasugan ban. 9Ay teway kanya gafanud tuwa, indasug wa fiya sat nafatuyanan fag daga, ay sanya wan nu gbanwan kata way sik betaw. Katanya yangay Isaak ay Akub, teway kanya fag duwa an yangay mafabul Diyus nafatuyanan sas Abrayam. 10Abrayam kanbang wa dawdaw gfanya te, umdasug ban sa sik fulan ay gbanwan sanya. Ka fag fulan matvngvd dawdaw; Diyus wan at naawat.

11Sara gafanud yangay sas Diyus. Dewa kanya gabawas ay kafufuyna, inke unga yay, teway kanya gafanud tuwa te, matuyan Diyus at nafatuyanan. 12Katanya tuway, siginans Abrayam fag sadik taw, dewa mafufuwama dawdaw, e ngay sugfun yay wa mangatap at kayuwan, kayus galeme sis banwa, ay kayus lagnas sas tigyangan dagat.

13Ay kanya fag ngay taw aro ginan at nalong nafatunglus tuwa nu gafanud anggan inkate, dewa yud insure sa anya Diyus at nafatuyan fag fagafonun. Ay dewa katanya, kanya nu gamatang, kata wa nu glag kanya fag fagafonun dewa ngayayu, ay guseganan tuwa. Ay kanya nafasaful te, kata yay sik ngay betaw ay sik tagbaklay ste swa daga. 14Taglong katanya gfasaful te, kanya gsarap at talun ban mandi. 15Ay ka fag ngay tagafanud nu gamatangan way ro nangafoli sa ebi at talun, maafoli way ro. 16Ay roro ngap yaya. At fagfanyaun dawdaw sa tuwa tibak talun taglabi sa ebi ataw at talun nu masine. At masuwad te, kanya tagsas banwa. Katanya tuway, Diyus di kapla ka fag ngay taw nu glong anya te, “Em Diyus.” Ay Diyus nafamasadan sa anya sik bagu fag fulan.

17Abrayam gafanud tuwa sas Diyus dewa Diyus nafaskud anya. Kanya gananfonun tuwa at baguwama, Isaak, kata sik anyun. Dewa Diyus nafatuyanan ebi ka fag baguwama sas Abrayam, Abrayam mafamasadan tuwa gfon at fakesugun at baguwama, 18dewa ebi ataw Diyus nalong te, “Siginan ban Isaak am ngay sugfun ebi ku nafatuyanan.”#11:18 Fagsigadan 21:12. 19Ay Abrayam gafanud te, “Diyus mafafaleleg yay ku unga Isaak, dewa aw fate.” Ay Abrayam at baguwama gina nfoli sa anya, kata siginan at fagmateanan.

20Isaak gafanud tuwa sas Diyus, nu katanya, kanya nafoyung sat ngay unga, sas Akub ay sas Isaw te, “Diyus gfadasug ban sa ayu sik ngay masine.”

21Akub gafanud tuwa sas Diyus, nu katanya, kanya gina gakateun, nafoyung yay sadi sadi sas Use at baguwama fag duwa te, “Diyus gfadasug ban sa ayu sik ngay masine.” Ay Akub gseg Diyus kadugenya gtukudan sit suwan.

22Use gafanud tuwa sas Diyus, nu katanya, kanya gina gakateun, nafoyung yay sa sangay taw Israel te, “Lumo yay ban am ste ginans talun Iptu. Ay nu mgurungan wan, buli tuwa ku ngay butul ay libingi sa ay fakadasugan fag daga.”

23Muisis at magurang gafanud tuwa sas Diyus, nu katanya, kanya nasuksuk dawdaw at ngenge tuluk magdanun, gina bagu nsalug. Ay nalag te, masine dawdaw at ngenge. Ay kanya wa nlimu sanya fag talun Iptu at fun suguwan.

24Muisis gafanud tuwa sas Diyus, nu katanya, kanya nu ndaul wan, wa kaumsig gdungug tiba nu glong te, “O, fun talun Iptu way o baguyna at baguwama.” 25Ay kanya nkumsig wa nful sas Diyus at ngay taw, dewa ban e gfauri anya. Ay wa kaumsig guseganan sas asalanan at yud glugo fag fagusegananun. 26Kanya gamatangan te, “Masine nu mke fanambagun aw, dewa aw nangatakan ay nanginkaplan kata tam Fun Isus. Glabi yay kamasine nu fabul aw fagayu fagmabalanun sas talun Iptu.” At fagnalongun katanya, teway at fagamatanganun fiya fiya te, Diyus gfon ban anya at nalufuyan.

27Muisis gafanud tuwa sas Diyus, nu katanya, kanya naubun wan talun Iptu, ay wa nlimu at fun, dewa kadotama anya. Ay kanya nasungatan gfatunglus, kata wa nu glag tam fagyudun glag fag Diyus tagufud anya.

28Muisis gafanud tuwa sas Diyus, nu katanya, kanya nafoyung sa sangay taw Israel te, tain at masine at fagbulun laman ka fag tagfabarita tagfate at ngay turungana lumangfe tuwa ay di sumakbo sat bale. Muisis nalong te, “Ramsigi taguk sat sakbawan bale!” (Ay bandi baliwa, inke fagmafulun sa baliwas Tagfabarita nu Glangfe. Kanya tagfaamatang sat kin-gurungan ebi.)

29Taw Israel gafanud tuwa sas Diyus, nu katanya, kanya nu gdife wa Dagat Maraska, kata way nu nalo sat matat fag daga. Ay roro gina at fabarangyan fag ngay taw Iptu gfaskud nandife, inkafuy wan fagayu.

30Taw Israel gafanud tuwa sas Diyus, nu katanya, kanya nasafungan fulan Eriku fituk menit, ay nu katanya, ka fag fulan at alad nafangarufaan wan.

31Rakab gafanud tuwa sas Diyus, nu katanya, kanya di nkate gasfuwan sit faudgufudan fag ngay taw Eriku takamabo Diyus. (Kanya sik fagsalian fag mangena ebi ataw.) At fagyudun inkate teway nafasakbo tuway ka fag duwak betaw taglingaman masuksuwanan.

32Ay taw ya ro ku fagnanlongun? Nu mansulit kyay ro fagayu, wa msak at lungud menit nu moyung aw fagayu tuy fag ngay taw at fagbulun. At ngayan: Gidyun, Barak, Samsun, Epta, Samwel ay Dabid. Ay anggan Diyus at ngay taglong ebi. 33Kanya fag ngay taw gafanud tuwa sas Diyus. Katatuy at nafagbulun: Nababo sik ngay fun. Ay matuyan nu gmagurang. Ay nafabul Diyus at fatuyanan at fagafonun sa anya. Ay nafagvm sik ngay liyun at bibig. 34Ay nafalayung tagbiya fag afuy. Ay nalagyu siginans tagabasingun. Ay dewa mafanalo at bilug, indaragang yadi. Ay mabitsug nu gfabarangyan. Ay anggan naayan at tagfabarangyan fag ngay betaw.

35Ay anggan sik ngay mangena gafanud tuwa sas Diyus. Kanya nafasakbo tuwa ebi at kinkate at kalongan tagdog gleleg. Ay tibak tagafanud di nafamayud Diyus, dewa e nafauri dawdaw anya anggan nafate. Kanya fagayu gfanseg te, glabi yay kamasine at banwanan gina ban nadog gleleg. 36Ay tibak tagafanud e nafalingun ay e nafalang dawdaw anya. Ay sa tiba, e nakadina ay e nasungsung. 37Ay sa tiba, e nafalang batu anggan wa nkate. Ay sa tiba, e nalagari anggan wa nlifung. Ay sa tiba, at famate sik fiso. Ay tiba we kwa: at balukas balat tupa ay balat kambing wadi. Kanya gafalingunan way gugat ay e gfauri. 38Ay nainkalyaman nalo sa sangaba talun at yud e taw ay sa sangaba muyud. Ay at fagtiyugan sasad luwib way, ay sasad aldi daga. Ay roro at matuyan, at mauri fag ngay taw ste swa daga wa masine nu gfaygaluwan sanya fag ngay taw tagafanud.

39Kanya fagayu mauseganan sas Diyus, teway matvngvd nu gafanud. Ay roro, kanya ya nafabul Diyus at fatuyanan at fagafonun sa anya. 40Fakatanyaun Diyus at nafagbulun, teway at fasadan sa antam amasine yap at fasadan ebi. Madyay anggan ebi fag ngay tagafanud ay anggan itam katsi, Diyus gfasfuwan tuwa kanya fag duwa nu gfasine laman umlayun sat masine.

Currently Selected:

Ebriyu 11: TAWEAST

Highlight

Copy

Compare