Abakuk 1
1
1Abakuk sik taglong. Katatuy Yawi at longan sa anya.
Abakuk at Fagetun Taguna
2Abakuk nalong te, “Yawi, seduge ya manga nu get aw am fanarabangun ay nu malus o angku? Seduge ya manga nu gfalangfe o emi siginan sangay taw tagfatakan emi? 3Taw ro am fagfalagun angku at ngay malimata ay at ngay mafanggalut? Dewa aw nus nganday, ku nalag e gfadfatean, e ngay mauri, e gbarangyanan, e gbadbaboan. 4Ay nu katanya, we fanambagun at suguwan. Ay we fagmatuyanun anway at ke asalanan way fag ngay taw at nababo sis fagfasinean fanlonganan ay bunwa at yud e asalanan fag ngay taw. Ay nu katanya, at fagmatuyanun we masuwad.”
Yawi at Famalus sas Abakuk
5Yawi nabalus te, “Faamatanganuni takagurungan sa sangay talun, ay madulawan wam fiya. Teway e fagafagbulunun aw si ayu fag lungud, ay wam gafanud dewa e glong sa ayu. 6Ay nanfili aw taw Babilunya#1:6 taw Babilunya: Sis Fangebriyu, taw Kaldiya. Tiba ginan nu gngayan taw Babilunya, anway te, taw Kaldiya. tagmagurang. Kanya fag ngay taw tagfangadotama ay tagfamate, ay mafali nu gfabarangyan sa sangay talun laman nangagbilug, dewa gyud at fagagbilugun fag ngay talun. 7Kanya we nalimuwan, gfagbulun at naumsigan ay we mafafasalag anya. 8Ay at ngay kabayu glabi yay kamatarung sik liupardu#1:8 liupardu: kata sik fusa daul ay malimu. ay glabi yay kamalimu sik idu talun tagalafang sad yabi. Ka fag ngay kabayu tumarung siginan at ngayayu fag talun kata sik biyo matos nu glayug nan-gamat at fagnan-gamatun. 9Ay at ngay sundalu kadasug nanfagbulun mauri, kata sik mabitsug fag tagmara siginans fakamenitan. Ay at ngay nataban fag ngay taw, kayus lagnas. 10Ay gfalingun way ngay fun ay ngay tagmagurang. Ay gfangasean way sigad ngay fulan at ke alad, anway kanya masakbo way ay mafaago nu nafabugsul wa daga sa sangaba fun alad. 11Ay nu glo kata sik tagmara nu gdalan. Kanya e nasalan, teway at fagmadaragangun way at fagsegan.”
Abakuk at Fagetun at Faduwa
12Abakuk nalong te, “Yawi, o wan Diyus siginan ngay ebi. O wan ku Diyus at malayun sat masine ay at yud kate. Yawi, o wan sik fagsarirungan fag batu, ay nafili o taw Babilunya laman nanfauri emi. 13Matuyan o. Wo mabaris glinggat at malimata ay at mafanggalut. Ay roro taw ro am fagnafabayanun ka fag ngay taw Babilunya tagfanluk? Taw ro am fagnafabayanun ka fag ngay taw Babilunya nu gfauri sa sangay taw at yud katvngvd anya at asalanan? 14Nafakata way o sik ngay uyang at ngay fabarangyan at yud e gmagurang anya. 15Taw Babilunya guseganan dawdaw teway nataban at ngay fabarangyan sat talun kata ngay uyang at kinsuluy at dungus ay ate kin-gamat sas lambat. 16Ngayu at nataban, nu katanya, kanya gseg sat fagmadaragangun kata tagfanguyang nu gseg sat lambat gina ganyun famabebanglu. Siginan at lambat inkayu at fagekwaun ay inke fakonun ngayu. 17Yawi, go ka fag ngay taw Babilunya gfatunglus way nu gyud e fanyu, ay nu gfantaban, ay nu gfamin ngay talun?”
Currently Selected:
Abakuk 1: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
