Naum 3
3
Fulan Ninibi Mafanyu nu Kalag
1Fulan Ninibi mafanyu nu kalag. Mason at fagmauriun ay at fakamuwaganun, ay ngayu at nafate taw. Ay ngayu yangay at nabul siginan tibak talun at nanuranan. Ay wa katuwas nu gfate taw. 2Ay roro at ngay fabarangyan umdasug wa fiya laman nanfabarangyan anya. Ay kanya dumungug nu gfusfus at ngay kabayu, ay at ngay karwai gulung nu kalibud, ay at ngay kabayu nu gfantungtungan, ay at ngay karwai nu kadkalungan. 3Ay lumag ngay tagkabayuwan matos nu nanfabarangyan, ay at ngay fiso ay at ngay bangko nu gadganunoan, ay at ngay matean ayuwayu nu gtudtungudan. Ay at ngay sundalu kataid sat ngay matean. 4Katanya at kumgurungan sas Ninibi fag fulan teway kanya kata way sik mangena tagfabili at bilug, ay gfamaumsiganan at tiba ay gfangafut. Nu katanya, tibak talun inkumsig gfaning anya.
5Yawi at Madaragang nalong te, “Am fag ngay taw Ninibi, dungugani! Ku fabarangyan way am! Nu katanya, gfaplan aw ayu sa sangay talun ay sa sangay fagmagurangan at faglagan. Kata am sik mangena at naurug at balukas anggan wa sat alfuyu ay lumag at bilug nu malanu. 6-7Kafurat aw ayu kata sik taw nu e naukas sa anya at naginautan. Nu katanya, at ngay taw at lumag ayu kafurat ay gsaruyan ayu. Ay kanya fagayu lumong te, ‘Inrasras wan fulan Ninibi. Ay we guyway ay we gfataluwan anya.’ ”
8Go fulan Ninibi amasine yap fulan Tebes at makbang Safa Nilu? Kanya fag safa tagdingding Tebes kata at alad tagsafungan. 9Ay Tebes gseg sas talun Itiupya#3:9 Itiupya: Sis Fangebriyu, Kus. ay sas talun Iptu at fagmadaragangun, ay nu gfasad faggugat gtarabang tuwa ban. Ay talun Put ay talun Libya gtarabang yangay anya. 10Ay roro tagbanwan sis Tebes nafabulun natabanan wa sa tibak talun. Ay at ngay sisiyan nafanyamasan wan sa sangaba dalan. Ay at takadungug fag ngay taw nasiyuk kadina ay naafud wa anya sik ngay fanuguwan. Ay nu kafud nafe fagsafulan. 11Katanya yangay ban am taw Ninibi. Umkata am sik takaranug fag taw at yud gsaful at kin-gurungan sa anya. Ay ay ngay fabarangyan nanfabarangyan wa ayu ay sumarap am ay fagsuksuwanan laman di am magamatan. 12Fagayu ay ngay fulan at maaladan umkata sik ngay kayu igus taguna at buwadan at kinlesan; nu e nauwig at familugan, umtong ay masine wa kon. 13Linggati ay ngay sundalu! Kanya kata way sik ngay mangena! Ay ay ngay famatawad fulan sakbawan umbatas wan, ay ngay fabarangyan sumakbo wan.
14Famasadani teway ay ngay fabarangyan kadasug wan. Fanagubi laman e fanginum am. Ay fatvngvdi ay fulan at ngay alad. Awati sik ngay tisa#3:14 tisa: kata alublak. ay fasinei at marasrasan fag lungud alad. 15Ay roro umkate wam sas fiso ay sas afuy sanya si ay fagbanwanan. Kata wam sik ngay tanum liyung naon.
Inkayu am kata sik ngay liyung! 16Nafaayu am ay ngay tagfesali glabi wa sa sangay galeme sis banwa. Ay roro kanya umkata wa sik ngay liyung nu ntabu wa nu kon ngay tanum, lumayug ngayayu. 17Ay ay ngay tagtanud ay ay ngay fun sirut kayu yangay liyung at masubuk sa sangay alad gina mariyos fag lungud. Ay roro nu nsure wa at menit nafanlayugan wan, we nasaful te, dada at fakadasugan.
18O, at fun sis talun Asirya, umkate am ngay tagfangguna. Ay am ngay taw sumaruwayan wa sa sangay muyud, ay wa ban e gfaful anya. 19Ay o, umkata wo sik taw at mason ke fakarukan#3:19 fakarukan: Sis Faniganun, sugat. at yud kafiya. Ay fagayu at dumungug at kindasug sa emu guseganan fantalaptapan, teway kanya fagayu nadalan wa gugat am fandotaman.
Currently Selected:
Naum 3: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
