Abakuk 2
2
1Abakuk nalong te, “Suma aw sa ku fagbantayan fag bale at ngabat ay nanfanya aw te, go tain ro Yawi at longan angku ay go tain ro at famalus ku fagetun.”
Yawi at Famalus sas Abakuk
2Katatuy Yawi at famalus sas Abakuk te, “Riruki mayamag sas fagrirukan fag batu tuy fag foyungan laman mafali nu katap. 3Riruki yap anway ya ndasug at lungud nu kagurungan. Roro wa ban lumugo umgurungan wa fiya. Fanyai yap sirut, anway umgurungan wa fiya sit lungud. 4Katatuyi am rirukan:
“Nalag wo tagfalabi fag ngay taw at yud matuyan nu gbanwan. Ay roro at matuyan fag ngay taw masine tuwa nu gbanwan teway e fagafanudun tuwa. 5At matuyan, at fagmabalanun we fanambagun. At ngay taw tagfalabi ay tagfangesug fagmabalanun faggugat we fagmanabayanun ay wa guseganan. Ka fag ngay taw kata way sik matean ya gugat kasakan. Katanya at fagnatabanun ngayuk taw siginan tibak talun. 6Roro at nataban fag ngay taw gfalingun way tagtaban. Ay gfalimatan glong te,
“ ‘Am tagbul nus nge wain dewa gyud ay fagagbilugun ay gfabalan way am siginan ay nafanluk, e faurianan way ban sa ayu. Seduge ya ban nu gfagbulun am katanya? 7Ay roro ka fag ngay taw ay nafabulun nataban mafali nu gfabali sa ayu, ay am yangay ban takudkulugan kalimu, ay kanya yangay ban at mul ay ngay fagmabalanun. 8Anway ngayu wak talun ay nabul at ngay fagmabalanun, katanya yangay ban at fagbulun sa ayu at sawad fag ngay taw sanya ginan fag ngay talun. Katanya at kumgurungan sa ayu anway sa ay nafatean fag ngay taw ay anggan yangay sa ay nafanggalutan at ngay daga ay at ngay fulan.
9“ ‘Am takamale ay nabul fag ngay singku siginan ay nafanluk, e faurianan way ban sa ayu. Gfatvngvd way am ay ngay bale laman umlangfe am gina umdasug at faurianan. 10Anway sa ay nafatean ngayuk taw, e fate yangay ayu ay e rumasras ay ngay bale. 11At dingding fag ngay batu ay at bakban bale kata sik taw nu get tarabang anway karasras wan fagdaul at bale.
12“ ‘Am tagfasigad kawat sik fulan siginan ay fandotaman, e faurianan way ban sa ayu. Katvngvdan nu gaawatun am mafamasadan am nanfate. 13Roro ay ngay nafaawat sa ay nataban fag ngay taw e lumabe wan, ay nu katanya, we fanambagun ay nalufuyan. Madaragang fag Yawi nafatuyanan wan siginan ngay ebi katanya. 14Anway nus nga setaw at dagat nu mapnu mamam, at ngay taw sas fagdaul daga umkayu yangay at fagsafulun sa baliwas Yawi at fagmadaragangun.
15“ ‘E faurianan way ban sa ayu! Siginan ay fandotaman nafaplan way am at makbang ayu fag ngay talun at ngay taw. Kata way am nafaranug anya laman lumag am te, kanya malanu. 16Ay roro am way ban takapla fangkabat gfauseganan ayu, anway Yawi gfaurianan ayu. Am yangay at fagfainumun sa at taya at fandotaman laman nu mranug wam lumag yangay nu malanu am ay mapla am. 17Nafuwan am at ngay kayu sas talun Lebanun, ay inkate wan at ngay mangimut sanya. Nu katanya, am yangay at fagnanfanggalutanun ay at mudkulugan kalimu. Katanya at kumgurungan sa ayu anway sa ay nafatean fag ngay taw ay anggan yangay sa ay nafanggalutan at ngay daga ay at ngay fulan.
18“ ‘Nataw at ngay fagsegan at fanambagun? Kanya taw way sigad naawat siginans kayu ay bakal, ay wa mafaelongan at matuyan. Taw ro at ngay takawat at fagafanudun sa at naawat fag ngay fagsegan dewa yud mafaelongan? 19E faurianan way ban sa ayu, am tagfasulitanan sa sangay fagsegan kayu ay batu. Glong am te, “Afuloi ay tarabangi emi,” Ay kanya wa ngani mafafoyung ayu. Dewa masifigan gintu ay pilak, wa gleleg. 20Roro Yawi si wa at bale at mafilian. Ay nu katanya, fagayu tagsis wa daga maragangani sa at daga salubangan.’ ”
Currently Selected:
Abakuk 2: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
