Galasya 5

Lag Gdog Nangafanuguwanan sa Ebi Diyus Nafon fag ngay Suguwan.

1Ebi, gafanuguwanan way tam sa ebi Diyus nafon fag ngay suguwan. Ay katsi roro, tam Fun Isus nafalfas wa antam sanya ginan, laman di tam tunglus gafanuguwanan. Ay nu katanya katsi, lag tam gdog nangafanuguwanan sanya fag ngay suguwan.

2-3Dewa gina, lag tam gamatangan te, “Nanfatuli watam, laman ro umkalyam tuwa tam ngay asalanan.” Teway nu katanya way sik taw amatanganan, tam Isus wa gsali at ngay asalanan. Ay tam Diyus ban luminggat kanya fag taw at ngay fagbulun fagayu, te go ka fag taw di e nalangfe at ngay suguwan. 4Teway kanya fag taw at fagsegun, si way at nafaningan, wa sas Isus. Satu ro, tam Isus nangafanyu tuwa kanya fag taw, ay nanfalangfe tuwa, ay teway ka fag taw wa nkumsig.

5Ay roro itam, bundi katanya baliwa tam amatanganan. Antuwa tam sik ngay tagafanud sas Isus. Igfanseg tam te, gina ban indasug taguyan fag menit, tam Diyus ban nu glag antam, kata tuwa tam yud e asalanan. Ay katsi, kaduge tam gugat igfanya ka fag menit nu kadasug, at Masine fag Falad tagfatvngvd tam amatanganan.

6At mafungkuk fag longan, nu gafanud watam sa tam Fun Isus, we masuwad, dewa sik taw matulian ay dewa yud. At mafanud, sik taw ani tuwa afanudi sa tam Isus, ay esugi tuwa tiba, teway katanya tuwa nu gfasure tam te, gafanud watam fiya.

7Ku ngay fadugsay, ebi long, nu glag aw ayu, igfaning wa long am fiya fiya tam Diyus at fakaumsigun. Anway te katsi, e nafasaruyan ayu siginan at matuyan fag foyungan. 8Igfoyung ayu sik foyungan bagu. Ay roro kanya fag foyungan, wa siginan tam Diyus. Wa siginan at nataban ayu siginan swa asalanan.

9Amatangani te, sik famadaul tinafay, dewa alay way sirut, mafafadaul tuwa dewa ngayuk tinafay. Katanya yangay sik foyungan at yud matuyan. 10Ay dewa katanya, gafanud aw sa tam Fun te, kanya igfatungul tuwa ay amatanganan, laman di am fadiyuganan kanya fag foyungan. Ay gafanud kyangay te, Diyus ban fauri wan fagayu tagfoyung ayu at yud matuyan, tagfasuwayan ay amatanganan.

11Ku ngay fadugsay, labon tiba tagfasuwayan ay amatanganan, labon kanya fag ngay takamoyung glong ayu te, “Roro ngap Pablu, nu nalo was tibak talun, igfoyung yangay te, fatulii at ngay taw.” Roro ngap, yaya, kwa gfoyung katanya. Ay nu gfoyung kway ro katanya baliwa, at ngay taw nangus, di ro kalimata angku. Ay madyay at ngay taw kalimata way dawdaw angku. Teway angku ku foyungan antuwa te, tam Isus inkate laman falangfe antam.

12Ay ku fagalongun sanya fag ngay taw tagfasuwayan ay amatanganan, tagfabulun ayu te fatulii, glong aw te, “Ay kin, nu gdi, ate dangay sirut igtuli. Falifungi tuwa daw kanya fag lungud bilug, laman ro ngani umfanud wam.”

At Mauri fag ngay Ugali ay at Masine fag Falad at ngay Ugali

13Ku ngay fadugsay, igsaful watam te, tam Diyus nafalangfe wa antam siginan nu antam gafanuguwanan. Ay dewa katanya, lag tam gamatangan te, “Ay kin, nu gdi, katsi long, nanfaning kwan ku ngay fakaumsigun at mauri.” Yaya roro, lag gamatangan katanya. Katsi, amatangani tuwa te, “Tam Diyus nu nafalangfe tuwa angku, katsi long nangafanyu kway ku iba. Nantarabang aw.”

14Tam Diyus kaumsig tuwa katanya, nu gfangafanyu tam. Dewa ngayuk suguwan Diyus nafon sas taw Udyu, at fagmasadian fiya fiya, iglong way te, “Sik taw nu kesug tiba, katvngvdi yangay nu kesug at balyu.”#5:14 Lebitiku 19:18 15Ay roro nu am wa mandi tagaringangan ayuwayu, anggan wa ban am fafanggalutan fiya fiya ay banwanan.

16-17At Masine fag Falad at fakaumsigun ay antam tam fakaumsigun at yud masine, kanya fag duwa garingangan way si tam amatanganan. Ay katanya wayay, wa tam nafafaning tam ngay fasadan. Ay dewa katanya, glong aw ayu te, faningi tuwa Masine fag Falad, laman ro igbabo tuwam ay ngay fakaumsigun at mauri. 18Ay nu gfaning tuwa tam at Masine fag Falad, di tam gafabulunan ebi fag ngay suguwan Diyus at nafon sas taw Udyu.

19Ku ngay fadugsay, sik taw at amatanganan nu gamagurangan way at fakaumsigun at mauri, kasaful way sit leleganan. Tenday kamayun, ate ro gamatangan way gugat sas fakamayunun baliwa, ate ro igfagbulun wa tiba yak fagbulun at mapla. 20-21Katanya fag taw igseg way sas tawtawan, ate ro, igbara way tiba. Kalimata dawdaw tibak taw. Igfaaringangan tibak taw. Galabian dawdaw tiba fagekwaun, ate ro galabian dawdaw tiba fagsafulun. Katanya fag taw igfangadotama dawdaw, ate igfangadotina. Ay igfaning way gugat si anya at naumsigan mandi. Katanya fag ngay taw iglidlimatan, garingangan. Ginuman dawdaw fangaranug. Ay gaygaluwan ayuwayu nanginuman, ay kaduge ginuman igfagbulun yay tibak fagbulun at mapla dawdaw.

Kanya fag ngay ugali ku nalong, ay tiba kya nalong, kanya igfasaful way te, roro ngap, ka fag taw at amatanganan gamagurangan yay at mauri. Ay nu katanya way gugat gugat fag ngay ugali takasure sa sik taw at leleganan, katoglag wa te, kanya fag taw wa ban umful sas Diyus fagmagurangun fag ngay taw.

22Ay sik taw, nu Masine fag Falad tuwa tagfaamatanganan anya, at ugali, antuwa igfangafanyu. Iglayun tuwa nu guseganan. Di gfangadotama, ate ro di gfangadotina. Saful tuwa gbaris. Igfantarabang tuwa tiba. Gugalian tuwa masine. Ay galay e nalong, fagurungan tuwa. 23Malukme tuwa sat iba. Ay saful tuwa igfatawad at amatanganan mandi. Kayunya fag ngay ugali, siginan at Masine fag Falad. Ay kayunya fag ngay ugali, tam Diyus di e fagsalagun.

24Nu itam watam Fun Isus at taw, nafaku watam tam ngay fakaumsigun at mauri sas salibagan kayu. Nafafaku watam sa tam Isus. 25Ay katsi, Masine fag Falad nafon wa antam tam leleg at bagu. Nu katanya, faningi tuwa at Masine fag Falad. 26Lag tam fandaragang. Ay dangay tam falimatan tam iba. Dangay tam galabian tam iba fagekwaun.

Currently Selected:

Galasya 5: TAWEAST

Highlight

Copy

Compare