Galasya 4

1-2Tam Diyus at nafagbulun sa antam, kata sik mabalan fag taw at nafagbulun sat unga. Kaduge at unga alay, tibak taw yay tagfadaul anya, ay tibak taw yangay tagtanud at fagmabalanun. Nu katanya, kadugenya, kanya fag unga kata yay sik fanuguwan. Ay roro at tama e fasadan te, at unga ban nu ndaul wan, fagayu at fagmabalanun, igfon wa ban sat unga. Ay nu bandi wan, nu ndasug wan at tama filian fag lungud, at tama nafon wa fiya at fagmabalanun fagayu sanya fag unga.

3Ay itam, kata yangay tam kanya fag unga. Ebi ataw, kaduge yud indasug tam Fun Isus, kata yay tam sik ngay fanuguwan. Gafanuguwanan yay tam at ngay fagfaningun ayuwayu ste swa daga. 4Ay roro bandi, nu ndasug wan tam Diyus filian fag lungud, kanya nafaste at Baguwama. Ay at Baguwama insik taw yangay kata antam. Inke tina kata antam. Ay kaduge ste swa daga, tam Fun Isus nafafaningun tuwa tam Diyus suguwan sas taw Udyu. 5Fakatanyaun, laman ro di gtunglus nu antam gafanuguwanan ka fag ngay suguwan ayuwayu. At fasadan, laman fagayu tam, bundi ban tam sik fanuguwan. Antuwa tam Diyus at unga.

6Ay katsi, katanya wa fiya. Itam wa fiya tam Diyus at ngay unga. Nu katanya, Diyus nafatsi wa antam at Baguwama Falad. Kanya at Masine fag Falad. Ay nut si wa antam at Baguwama Falad, mafafalong wa long tam sa tam Diyus te, “O wan em Tama.”

7Ku ngay fadugsay, at mafungkuk fag elongan, katsi bundi tam sik ngay fanuguwan. Anwa tam at unga. Nu katanya, tam Diyus igfon wa ban antam at fagafonun, teway itam wan ay at unga.

Lag Gafanud sat Yud Matuyan

8Ebi ataw, yam saful tam Diyus. Ay gafanuguwanan yay am ste swa daga fag ngay falad ay fag ngay fagmadaragangun. 9Ay bandi ataw, nasaful wam tam Diyus. Ay roro ngap, nu gfaamatanganun watam fiya fiya, tam Diyus tuwa baliwa tagsaful fiya fiya antam ay kanya inkakbang antam.

Ay katsi roro, kaumsig way am unu nangafanuguwanan sas taw Udyu ugali. Ay roro nu anway am nangafanuguwanan sanya, kata wa nu kafoli am sas tagebi fag ngay ugali. Gdog yangay am nangafanuguwanan sa ebi fag ngay fagmadaragangun. Sek, taw fakatanyaun ay fagbulun? We fanambagun katanya fag ngay ugali. Wa mafafafalangfe ayu.

10Nus tuwa ma, katsi e nafoyung angku te, igfaning wam taw Udyu ugali at ngayu at fagamatanganun ayuwayu fag ngay menit. Katvngvd mangaro anya nu an am kafoli. 11Nu katanya, katsi gafanawa kwan, te, labon we fanambagun ku nafoyungan ayu Masine fag Barita.

12-14Ku ngay fadugsay, ku fagetun fiya fiya sa ayu, lag fanseg te, “Tam Diyus suguwan sas taw Udyu, kanya tagfalangfe antam.” Faningi wa angku. Aw ngani, dewa aw sik taw Udyu, kwa gfanseg sanya fag ngay suguwan ayuwayu. Ay kaugat wa ro am. Bunwa amay sik taw Udyu. Wam nangus nanfanseg sanya fag ngay suguwan.

Gamatang yay ro am te, ebi gina aw kadasug sanya sa ayu, gadaylan kway, ay kwa namaatunglus sa ku fasadan fag fulan. Katanya wan ebi fagsiun ay fulan nu kamoyung aw. Ay dewa katanya, masine tuwa ay fagbulun sa angku. Nasungatan tuwam gimalu angku. Di am inlimata angku, ay di am nafalo angku. Fangkabat guseganan am dawdaw ku naadasugan. Nus nga setvngvd ro nu guseganan am galay e ndasug sa ayu sik falad siginans banwa, katvngvd anya yangay nu guseganan am ku naadasugan. Ate ro nus nga setvngvd ro nu guseganan am galay tam Fun Isus indasug sa ayu, katvngvd anya yangay nu guseganan am angku ebi.

15Dewas nga setaw ku nayudanan, nafon wa long am angku. Nu gfatugan aw, dewa long ro ay mata, mon wa long ro am. Katvngvd anya ebi nu kesug am angku. Ay katsi, nu gdungug aw, inbali wam daw. 16Kalimata wam siring nu gfoyung aw ayu at matuyan fag foyungan.

17Roro nasaful aw te, ay faginlimataun ku foyungan ayu, nalukan way am si ay takamoyung bagu. Nu gfasad am, kanya magup dawdaw sa ayu. Ay roro at fasadan, wa masine. Anway gafasamanun ay amatanganan siginan em foyungan ayu, laman ro igfaning way am si anya at foyungan. 18Ay glong aw te, masine tuwa sik taw nu nanfafagwesanan ayu, nu masine tuwa ka fag taw fasadan. Satu ro, masine tuwa nu mke fagwes am bagu, kaduge aw maloan. Ay teway katsi ay takamoyung, wa masine at fasadan.

19Ebi, gina aw kamoyung sa ayu, nasungatan kwa dawdaw laman umyamag am sa tam Fun Isus baliwa. Kamataka wa sik mangena nu gfalangfe at ngenge nu gsungatan aw. Ay katsi, gina aw nadungug te, ay takamoyung bagu igfalukanan way ayu, katvngvd anya yangay nu gatakan aw si ku amatanganan. Ay wa sigad umtabu nu gatakan aw, yap ngay aw nasaful te, an wam fiya gafanud sa tam Fun Isus. Teway kata wam ku unga.

20Roro ngap, an aw dawdaw gafanawa, te taw ro ay faginbaliun daw. Ku fakaumsigun fiya fiya, sanya aktuwa maful ayu, laman ro malukme tuwa nu gelongan aw sa ayu.

Itam fag ngay Tagafanud, Tam Tina, Bundi Abrayam Mangena fag Fanuguwan

21Katsi, anway am dawdaw kaumsig igfaning ebi fag ngay suguwan Diyus at nafon sas Muisis. Ay roro wam siring nafabul Diyus at fagalongun fiya fiya, at fagnafoyungun kanya fag ngay suguwan. 22Ay nu katanya katsi, e fagafoyungun aw ayu, laman ro sumaful tuwam, te taw ro tam Diyus fagnafonun at ngay suguwan. Ay kanya ku fagafoyungun, sas Abrayam baliwa. Abrayam e mangena duwa. At sadi, at fanuguwan, ay at sadi, bundi at fanuguwan. Ay tam Diyus fanlongan igfoyung antam te, kanya fag duwa, inke unga tuwa. 23At fagsamanun anway te, sit mangena fag fanuguwan, at faginke ungaun, taw way at nabalyavtan. Ay sit yud fanuguwan fag mangena, at faginke ungaun, Diyus tuwa at fakaumsigun. Diyus nafagurungan tuwa at longan sas Abrayam daduwa.

24Ay katsi, nanfafaskudanan aw sirut. Amatangani te, kanya fag duwak mangena, kata nangus sik duwak fatuyanan. At fanuguwan fag mangena, kata Diyus fatuyanan ebi sas taw Udyu, gina sis Bugsul Sinay. Kanya fag fatuyanan tagfoyung suguwan ayuwayu sas Muisis fag fulan taw. Ay galay sik taw gafanuguwanan sanya fag ngay suguwan, kanya fag taw, kata at fanuguwan fag mangena at unga. At tina sik fanuguwan wayay, at unga sigon, kata way sik fanuguwan.

25Ay Abrayam mangena fag fanuguwan, kata yangay Bugsul Sinay, sas talun Arabya. Teway sanya fag bugsul Diyus nu gfon sas Muisis ebi at ngay suguwan. Ay nu katsi wa sa antam, kanya fag fanuguwan kata yangay fulan Erusalem. Teway at ngay taw tagbanwan sanya, sik ngay taw Udyu tagfaning ka fag ngay suguwan Diyus nafon sas Muisis. Ka fag ngay taw gafanuguwanan sanya fag ngay suguwan. Nu katanya, si anya at tina, Abrayam way mangena tagsik fanuguwan. 26Ay roro, e sadi ya fiyak Erusalem, tagsas banwa. Ay kanya, kata tuwa Abrayam mangena at yud sik fanuguwan. Kanya tuwa antam tam fulan. Nu katanya, itam, bundi tam sik ngay fanuguwan.

Ay tam tina, antuwa Abrayam mangena at yud sik fanuguwan. 27Ay anya at unga, ngayu tuwa dawdaw. Kata yangay bangan sa tibak afud tam Diyus fanlongan, taglong te, “Useganani wan, deyud o e unga. Deyud o batang gunga, useganani wan, ay danyui. Teway deyud o e unga katsi, emu ban am unga ngayu tuwa dawdaw. Ay dewa am mangama inlimata emu, tam Diyus igfon yay emu am unga ayuwayu, ayu yap si tibak mangena at yud naubunan at mangama.”#4:27 Isayas 54:1 Katanya yangay bangan at kin-gurungan sas Abrayam mangena at yud sik fanuguwan, te, ebi ataw deyud gunga, bandi inke unga yay ayuwayu.

28Ku ngay fadugsay, itam, kata tuwa tam Isaak. Kata tuwa tam Abrayam unga sit mangena at yud fanuguwan. Ebi, Isaak faginsalugun, teway Diyus nafagurungan ebi ataw at fatuyanan sas Abrayam. Ay anggan katsi sa antam, tam fagin-ngayanun te Abrayam tuwa tam at unga, teway tam Diyus igfatunglus tuwa gfagurungan at ngay fatuyanan sas Abrayam.

29Ebi, at sadi Abrayam unga, at faginsalugun, siginan ways taw nabalyavtan. Ay at sadi, siginan tuwa Diyus fagmadaragangun. Kanya tuwa Isaak. Ay teway at fadugsay siginans taw nabalyavtan igfatakan way anya. Ay anggan si antam katsi, nu itam wan takata Isaak, e gfatakan yangay antam. Kanya fag fulan taw tagfanseg sit nafagbulun mandi igfatakan yangay antam.

30Ay sa sik afud tam Diyus fanlongan iglong te, “Faloi wan, kanya fag fanuguwan, anggan at unga, ay lag ban e fon siginan am fagafonun sam unga, nus di sirut, sanya fag fanuguwan anggan sat unga. Nu gfon o am fagafonun, sa tuwa am unga siginan am mangena at yud sik fanuguwan.”#4:30 Fagsigadan 21:10 31Nu katanya, ku ngay fadugsay, igsaful watam te, Diyus ban gina gfon at fagafonun sat ngay unga, igfon wa ban fiya antam. Teway itam, bundi tam fanuguwan fag mangena at unga. Si antam tam tina, antuwa Abrayam mangena at yud sik fanuguwan.

Currently Selected:

Galasya 4: TAWEAST

Highlight

Copy

Compare