Galasya 3

Tam Diyus nu Gfon at Masine fag Falad, sa tuwas Fagayu Tagafanud Tam Isus

1Sek, am fag ngay taw Galasya, taw fagyudun am nafaamatanganun? Ebi, nafayamagun kwan nu gfoyung aw ayu, te, tam Fun Isus faginkateun sas salibagan kayu, igsali tam ngay asalanan. Ay taw ro katsi faginbaliun ay amatanganan? Sek, anway long e nafaligbatan ayu.

2E fagintoun aw mangaro ayu. Taw ro Diyus fagnafonun ayu at Masine fag Falad? Go teway nafaning am at ngay suguwan at nafon ebi sas taw Udyu? Yaya long, wa long katanya. Diyus fagnafonun ayu at Masine fag Falad, teway ebi gina am nadungug at foyungan sas Isus baliwa, nafanud tuwam. Katanya tuwa Diyus fagnafonun ayu.

3Ay ebi, gina yay tam Diyus bagu nafon ayu Masine fag Falad, igfanseg wa long am fiya fiya sa anya. Ay roro katsi, yaya. Katsi, gugatan way am igfaning suguwan, teway nu gfasad am, katanya wan nu gfalyam am ay asalanan. Ay roro wa gtungul katanya ay fagbulun, tagfanseg sa ay fagmafabulun mandi.

4Ngayu wa ayuwayu ay nasungatan, kaduge am gafanud sa tam Isus. Ay katsi, nu anway am nangafanud sa ay kabitsugan mandi, wa ban e masuwad fagayu ay nasungatan. Go sangay katanya wa fiya ay fakaumsigun? Igdi long ro.

5Ku ngay fadugsay, tam Diyus nafon ayu at Masine fag Falad, ay igfalag ayu sik ngay fagbulun at yud kata ebi ginan ay nalag. Fakatanyaun Diyus at fagbulun sa ayu, bunwa te, nafaning am at ngay suguwan sa sangay taw Udyu. Roro fakatanyaun Diyus at fagbulun sa ayu, teway gafanud tuwam ay nadungug sa tam Isus baliwa.

Nu Gafanud tuwa Tam sa Tam Isus, Kata Ebi Abrayam nu Gafanud, Itam Sigon, Umkata Tam sik Taw at Yud E Asalanan

6-7Amatangani yap tam nasaful sas Abrayam baliwa. Nasaful tam te, “Abrayam, ebi, gafanud tuwa sas Diyus. Ay Diyus nu glag Abrayam, kata tuwa sik taw at yud e asalanan, teway Abrayam gafanud tuwa sas Diyus.”#3:6-7 Fagsigadan 15:6 Ay anggan katsi si antam, katanya yangay. Taw nu gafanud tuwa sa tam Isus, kanya wan Abrayam fufu sat dagat daga. Ay Diyus nu glag anya, kata di e asalanan.

8Ay siginan ngay ebi ebi, Diyus nasaful wa te, kanya nangawat yay ban sik faran, laman ban siginan sangay fulan taw ayuwayu, fagayu ban tagafanud umkata sik taw at yud e asalanan. Ay kanya tam Diyus faran, nu ngayan tam, at Masine fag Barita. Ebi tam Diyus nafoyung wan Masine fag Barita sas Abrayam. Nafoyung wa te, “Am fufu yay ban sat dagat daga tagfadasug ku fanarabangun sas fagayu fulan taw.”#3:8 Fagsigadan 12:3

9Nu katanya, fagayu tagafanud sas Diyus, Diyus igtarabang wa fiya, kata at nafagbulun sas Abrayam ebi. Abrayam gafanud tuway sas Diyus, Diyus nafakata wa yud e asalanan. Ay anggan si antam katsi, katanya yangay.

10Ay roro, nu gamatangan way tam te, “Nanfaning aw Diyus suguwan ayuwayu sas taw Udyu, laman ban umlangfe aw,” nu katanya way tam fagfansegun, Diyus ban igfaurianan way antam. Teway roro ngap at matuyan, we taw mafafaning ka fag ngay suguwan fagayu fagayu. Ay glong te, sa sadik afud tam Diyus suguwan, “Sik taw nu dway nafafaning fagayu fagayu at marirukan sanya, gafaurianan way ban.”#3:10 Diyuterunumyu 27:26 11Ay nu katanya, kasaful fiya fiya te, sik taw nu gfanseg yay sat nafaningan tam Diyus suguwan, kanya fag taw ya insine. Tam Diyus nu glag ka fag taw, e asalanan yadi. Teway tam Diyus fagsarapun, antuwa sik taw tagafanud sa anya. Madyay tam Diyus fanlongan iglong te, “Sik taw nu gafanud sas Diyus, Diyus nu glag anya, di e asalanan. Ay kanya fag taw, umke leleg wa fiya.”#3:11 Abakuk 2:4

12E fagsamanun tuwa sik taw tagafanud sas Diyus ay sik taw tagfanseg sat nafaningan Diyus suguwan. Teway kanya fag taw tagfanseg sat nafaningan ka fag ngay suguwan, at amatanganan anway te, “Nu nafafaning akdi kanya fag ngay suguwan fagayu, umke leleg aktuwa, teway nafafaning aktuwa.”#3:12 Lebitiku 18:5 Ay roro ngap, we taw at nafafaning kayunya. 13Nu katanya, itam fagayu, satu ro, Diyus way tam fagfauriun. Ay roro, tam Fun Isus nastiye tuwa swa daga, ay kanya wan at nadalan tam Diyus at faurianan sa antam.

Tam Diyus fanlongan glong te, “Galay am nafabaringbing sik taw at bilug sa sik kayu, katanya fag fagbulun at masuwad, tam Diyus nafaurianan wan ka fag taw.”#3:13 Diyuterunumyu 21:23 Ay katanya tam Isus at nafaning. Tam Isus inbaringbing sis salibagan kayu, ay inkate sanya. Tam Diyus nafaurianan wa anya. Ay bundi itam takafaurianan.

14Tam Isus faginkateun sis salibagan kayu, laman dewas nganda ginan tam fag fulan taw, umkata tam sik ngay taw at yud e asalanan. Katanya wan ebi tam Diyus at nafagbulun sas Abrayam. Nafakata sik taw at yud e asalanan. Ay katanya yangay at fagbulun sa antam. Ay at sadi yak fanambagun tam Isus faginkateun, laman Diyus mafagurungan tuwa ebi at longan, te mon wa ban Masine fag Falad sas fagayu tagafanud anya.

Diyus Fatuyanan at Duwa

15Ku ngay fadugsay, galay duwak taw inke sulitanan, ay insadi te, “Katanya wa ban ta fagfagurunganun,” bunwa long ro te, rodi ataw at sadi kafoli yay, nanfabali yay aro taw at longan, ate ro nanfafoli. Yaya, wa katanya. Teway at masine tam ugali, nus nga setaw tam nalong, katanya wa fiya tam fagfagurunganun. Ay itam ngap fag ngay taw nu gsaful tuwa tam fagurungan tam ngay fatuyanan, glabi wan Diyus nu gfagurungan at ngay nafatuyanan sas taw.

16Tam Diyus inke fatuyanan ebi sas Abrayam ay anggan sat fufu sat dagat daga. Ay roro sanya nu glong, bunwa te, Diyus inke fatuyanan sas Abrayam ay anggan sas fagayu at fufu. Sa way at sadi at fufu sat dagat daga. Roro kanya tam Fun Isus wan.

17Ku ngay fadugsay, katatuy ku fagalongun. Diyus nu gfatuyanan sas Abrayam, naguna tuwa dawdaw nu gfon sas Muisis fag ngay suguwan. Siginan nafatuyanan sas Abrayam, inlangfe yay ufat sandan tuluk safuluk banwa. Ay ginanya yay Diyus nu gfoyung at ngay suguwan sas Muisis. Nu katanya, Diyus longan sas Muisis di gfabali at longan sas Abrayam. Kanya wan ay at naguna.

18Ay dewa inke suguwan ayuwayu, tam Diyus di nalong te, “Sa way at nafafaning nu gfon aw ku ngay nafatuyanan sas Abrayam.” Teway nu sanya way ro Diyus nu gfon, we fanambagun ebi ataw at longan sas Abrayam. Ay roro igdi, di katanya tam Diyus nu gfon at ngay nafatuyanan. Teway tam Diyus nafatuyanan wan ay ebi sas Abrayam, te e fon wa ban fiya at masine dawdaw.

19Taw ro tam Diyus fagnafonun at ngay suguwan sas Muisis fag fulan? At fagnafonun ay, laman ro at ngay taw umtuyan tuwa te, “E asalanan kwan, madyay kwa nafafaning tam Diyus suguwan.” Katanya at fanambagun, kanya fag ngay suguwan ayuwayu. Ay at kadugayan Diyus nu gfatuyan katanya sas taw, anggan way kabat fadasug sas Abrayam fufu sat dagat daga, at nalong ebi fag fufu. Anggan way kabat fadasug sa tam Isus.

Ay ebi, gina tam Diyus igfon sas Muisis kanya fag ngay suguwan, roro bunwa fiya fiya Diyus tagfoyung. Diyus e nafili yay sik ngay falad. Ay kanya tagfoyung sas Muisis. Ay Muisis yay tagfoyung sa sangay taw Udyu Diyus at ngay suguwan. At masuwad, e gbukngan yay. 20Fakatanyaun, teway tam Diyus e fagfanyaun yay siginans taw Udyu at nafagbulun. Nanfagurungan ngani at ngay suguwan. Ay gina long igfatuyanan sas Abrayam, ginanya long we gbukngan. Teway tam Diyus we fagfanyaun siginans Abrayam at nafagbulun. Diyus wan tagfagurungan at nalong ayuwayu sas Abrayam.

21Ku ngay fadugsay, labon gamatangan wam te, taw siring katanya Diyus nu gelongan? Kata igfanduwak taw. Sas Abrayam, naawat sik fatuyanan yud e fagetun, ay roro nu Muisis wan, nafoyung suguwan ayuwayu taglong te faningi. Roro fakatanyaun, kanya fag duwak elongan, at fanambagun wa kata at sadi. At fanambagun sis Abrayam fag elongan, laman umke leleg tam at yud katabu. Ay sis Muisis baliwa fag ngay suguwan, wa katanya Diyus fasadan. Wa tam umke leleg at yud katabu, sanya ginan fag ngay suguwan. Ay satu ro, kanya fag ngay suguwan nu mafadasug di antam sas leleg at yud katabu, satu ro kanya fag ngay suguwan nafalyam yangay ro tam ngay asalanan. Ay roro yaya, wa nafalyam.

22Diyus fanlongan igfayamag antam te, ebi ataw, Diyus nafabayan yay at ngay taw nu gafanuguwanan asalanan. Nafabayanan yay sik kadugayun, laman ban tam Isus nu ndasug wa stes daga, mafafon tuwa leleg at yud katabu sa sangay taw tagafanud sa anya. Ay nu katanya, nalag tam te, tam Diyus nafagurungan wan at nafatuyanan ebi sas Abrayam, te “Am fufu wa ban sat dagat daga tagfadasug ku fanarabangun sas fagayu taw.” Teway sik taw nu antuwa gafanud sas Abrayam fufu, Diyus igfon wa anya leleg at yud katabu.

23Ebi, gafanuguwanan yay tam dawdaw tam Diyus suguwan sas Muisis. Kanya yay fag ngay suguwan at ke fagmadarangun igsugu antam. Katanya yay tam ebi, kaduge tam Diyus yud nafasaful antam te afanudi sas Isus. 24Kanya fag ngay suguwan at fanambagun, kata sik taw takamato tiba unga. Kanya yay takamato antam kaduge tam Fun Isus yud indasug. Ay kaduge gugat kamato antam, igfoyung tuwa antam, laman ban tam Fun Isus nu ndasug wan, saful watam gafanud sa anya. Ay nu antuwa tam gafanud sas Isus, Diyus nu glag antam, kata watam sik ngay taw yud e asalanan. 25Ay katsi nu gafanud watam sa tam Isus, deyud wan kanya fag takamato. Katsi di tam gafanuguwanan sanya fag ngay suguwan.

Fagayu Tagafanud sas Isus, Kanya wan Diyus at Unga

26Itam fagayu, nu gafanud watam sa tam Fun Isus, itam wan Diyus at unga. 27Teway fagayu taw tagafanud sa tam Fun Isus, tam Isus nafasadi wa sa anya. Tam faginsurungun ngani sad safa, igfalag tam tam iba te, masadi watam sa tam Fun Isus, ay katsi tam Diyus nu glag antam, kata watam tam Isus, teway masadi watam sa anya.

28Nu katanya katsi, insadi watam ayuwayu sa tam Fun Isus. Dewa taw Udyu ay dewa taw yud Udyu, dewa sik fanuguwan ay dewa sik fun, dewa sik mangama ay dewa sik mangena. Ay fagayu nu nsadi tuwa sa tam Fun Isus, Diyus nu glag antam, kata watam at sadi. 29Nu katanya, itam wan Abrayam fufu sat dagat daga. Itam wa fagayu, at kinsadi sas Isus. Ay anggan ban Diyus nu gfagurungan at fatuyanan, sa wa at kinsadi sas Isus.

Currently Selected:

Galasya 3: TAWEAST

Highlight

Copy

Compare