Galasya 1

Pablu Longan at Famasigad at Rirukan

1Tuy fag rirukan siginan angku, Pablu. Aw, e fagbulun aw, sik tagfadasug tam Diyus fagalongun sa sangay taw. Ay at nafon angku katanya ku fagbulun, bundi taw. Tam Fun Isus tuwa, ay tam Diyus. Ay tam Diyus, kanya wan at nafaleleg tam Isus siginan at fagmateanan.

2Kaduge aw glong tuy fag longan, e ngay ufud aktuwa tam ngay fadugsay. Ay tuy em rirukan, an ami kaumsig fadasug sas talun Galasya, sa tam Fun Isus at ngay taw tagbanwan sanya fag talun.

3Ay igdarangin ami ayu sa tam Tama sas banwa ay sa tam Fun Isus, tam Fagsegan. Igdarangin ami te, laman kanya falag tuwa nu kafanyu ayu, ay fanabayan tuwa ayu.

4-5Em ngay fadugsay, masine way ngap tam Fun Isus at nafagbulun sa antam. Ebi, tam Fun Isus nanangate, laman falyam tam ngay asalanan, ay laman falangfe yangay antam ste ginan swa daga fag ngay mauri. Fakatanyaun tam Isus nafagbulun, igfaning tam Tama at fakaumsigun. Nu katanya, glong watam te, fadi fadi sa tam Diyus. Faggugat fauseganani anya. Kin, fauseganani wa fiya.

Di Ginbalian at Masine fag Barita

6Mangamam, mangenam, ebi ataw nasaful wam at Masine fag Barita. Nasaful wam te, tam Diyus infanyu tuwa antam, ay nafon antam tam Fun Isus, ay nafaful antam sat ngay taw. Ay taw ro katsi faginbaliun daw ay amatanganan? Katsi, nangafanud way am unu sa sik bagu fag barita ay ayupan at masine. 7Ay roro, yaya, bunwa at Masine fag Barita kanya. Anway am nalukan sanya sik ngay takamoyung bagu, tagfoyung ayu sik barita at yud matuyan. Roro kanya fag ngay takamoyung, kalimata way at Masine fag Barita sa tam Fun Isus baliwa. Gatubusun way sik bagu fag foyungan.

8Ay glong ami te, Diyus faurii wa nangus fagayu at ke fasadan igfasaman ay amatanganan siginan at Masine fag Barita. Dewa long ro ami at kumdasug sanya ay nanfasaman ami ay amatanganan siginan ebi em nafoyung ayu, Diyus faurii wa nangus emi. Ay dewa te, sik falad wa daw siginans banwa at nanfasaman ay amatanganan siginan at Masine fag Barita, Diyus faurii wa nangus kanya sigon fag falad. 9Katsi igdog kyay fiya ku longan kata aro ginan, te Diyus faurii wa nangus fagayu takamoyung tagfasaman ay amatanganan siginan at Masine fag Barita.

10Mangamam, mangenam, nafamaya kwa mangaro dawdaw ayu. Fakatanyaun nu gelongan aw, roro ku fakaumsigun taguseganan angku bundi taw. Tam Diyus tuwa. Teway aw, tam Fun aw at fanuguwan. Satu ro, nu gasarapan kway ro at ngay taw ayuwayu nu guseganan angku, kwa ro nangus nangafanuguwanan sa tam Fun Isus.

Tam Fun Isus wan at Nafoyung Pablu Masine fag Barita

11-12Ku ngay fadugsay, katsi kaumsig kyay nanfamansulit sa ayu ebi ginan ku ngay nadalan. Nanfamansulit aw ayu, laman ro umtuyan am te, ku foyungan ayu at Masine fag Barita, siginan tuwa tam Fun Isus. Bundi siginan sik taw. Ebi, bundi sik taw at nafoyung angku. At nafoyung angku, tam Fun Isus wan.

13Ebi, batang wa ro am gdungug te, kaduge aw yud nasaful tam Fun Isus, mason tuwa nu gfafaningun aw taw Udyu ugali. Ay at kamasonan nu gfaning aw taw Udyu ugali, igfauri aw dawdaw tam Diyus at ngay taw. Ku fasadan, laman umkamin wan tagafanud sas Isus, laman ban si tuwas taw Udyu ugali at taw fagfaningun. 14Ginanya, glabi kyay ku ngay ibama ku ngay fagsud, nu gfafaningun aw taw Udyu ugali.

15-16Ay roro tam Diyus kafanyu tuwa mangaro angku. Ay siginan ngay aw yud insalug, tam Diyus nafili wa gugat angku, laman nanfagbulun aw at fagbulun. Nu katanya, bandi ataw sik menit, tam Diyus nafayamag yay angku, te, ku fakalimataun fag Isus, kanya at Baguwama wan. Ay nalong wa angku te, “Ku fakaumsigun emu, nanfamoyung wo sa sangay taw, at yud Udyu fag ngay taw. Foyungi sa ku Baguwama baliwa.”

Ay siginan Diyus nasugu angku te famoyungi, kwa nananginto nus nganday fag taw, te go matuyan wa fiya manga tam Diyus at longan angku. 17Dewa aw gsaful te, e ngay takamoyung sas Erusalem, ay kanya sigon, Diyus yangay filian, yaya, sanya sigon kwa nananginto. Dewa te, kanya fag ngay taw naguna tuwa angku nu kamoyung, dewa katanya kwa nananginto sanya fag ngay takamoyung. Ku fagbulun, nalo kyay sas talun Arabya. Ay bandi ataw, infoli kwa sas fulan Damasku.

18Ay nu nlangfe wa tuluk banwa, nalo kwa sas Erusalem. Ku fagnaloun sanya, nanlag aw tam fadugsay Pedru. Ay nalag kwa fiya. Ay at kadugayan nu sanya ami, labi limak menit. 19Ay kaduge aw gugat sanya, kwe nalag tibak takamoyung dasday Santiagu. Kanya tam Fun Isus fadugsay at gurungan.

20Aro ginan nu kamansulit aw ayu, dakwa gfanlamangan. Diyus nasaful wa te, gurungan wa fiya.

21Ay siginans Erusalem, nalo kwan. Natunglus kwa sa sik duwak talun, talun Sirya ay talun Silisya. 22Nu katanya, kwa nadalan sa sangay fulan at makbang Erusalem. Ay wa nalag angku tam Fun Isus at ngay taw sanya fag ngay fulan. 23Kanya fag ngay taw nadungug way te, “Katsi, ka fag taw ebi tagfauri dawdaw antam fag ngay tagafanud sas Isus, katsi kanya kamoyung tuwa. Igfoyung tuwa te, fagayu taw afanudi sa tam Fun Isus.” 24Ay nu nadungug katanya, sanya fag ngay fulan at ngay tagafanud guseganan dawdaw sa tam Diyus.

Currently Selected:

Galasya 1: TAWEAST

Highlight

Copy

Compare