2 Kurintu 13

Pablu at Famatagak

1Katsi ban at fatulu ginan wa nu gsibo aw sa ayu. Kata at marirukan sis Diyus at longan te, “Nus nga setaw fag fanlonganan sat tiba baliwa, tagfatuyan duwa tuwa anggan tulu.”#13:1 Diyuterunumyu 19:15. 2Ebi gina at faduwa ginan aw nasanya sa ayu, nafatagak aw sa at ngay tagasalanan ebi, ay anggan sas fagayu te, gina ban aw sumanya, gfauri akwa ban fiya sat ke asalanan. 3Magbulun aw katanya laman umtuyan am te, tam Fun Isus tagelonganan sa angku, teway kanya di mafanalo nu gulit ayu, antuwa te, madaragang tuwa. 4Dewa tam Fun Isus nafababaun gina ntuktuk sas salibagan kayu, katsi kanya gleleg tuwa anway e fagmadaragangun tuwa siginans Diyus. Ay anway sa em naasadian sa tam Fun Isus, nafababaun yangay ami. Ay roro sa em fagbulun sa ayu baliwa, e fagmadaragangun tuwami siginans Diyus, anway insadi wami sa tam Fun Isus.

5Faskudi ay fagafanudun te, go si wam fiya tam Fun Isus. Ay atuyani tuwa fiya fiya ayu. Go wam gsaful te, tam Fun Isus siwa ayu? Yaya, nu dway am gafanud. 6Ku fagsegun lumag yangay am emi te, matuyan wami fiya fag ngay Nasugu. 7Igdarangin ami ayu, laman di am gfagbulun mauri. At masuwad bunwa te, nanfalag ami sa sangay taw te, gfaning am em ngay foyungan. Dewa tibak taw gayup te, em fagbulun we masuwad. 8Di ami gfagbulun at yud matuyan, antuwa sa at matuyan. 9Guseganan ami nanfababaun em ugali nu matvngvd tuwa ay fagafanudun. Ay gdarangin ami ayu te, laman di am gfagbulun mauri. 10Ku fagnarirukun kaduge aw gyud sanya, laman ro nu mdasug ban aw sanya malukme tuwa nu gelongan aw sa ayu, siginan tam Fun at nafon angku fag fagmadaragangun. Ka fag fagmadaragangun at masuwad antuwa te, laman gfanabayan tuwa ayu ay di am nangafauri.

11Ku ngay fadugsay, katsi taguyan wa ku longan sa ayu te, “Fasinei tuwa ay ugali. Gugatani tuwa nu gfaning am sa ku longan. Masadii tuwa, ay banwani manabayan. Tam Diyus, sik tagfangafanyu ay sik tagfanabayan sas fagayu taw, ay kanya at nangufud tuwa ayu.”

12Ay gina nafablang am ay iba, famatuwani ay adkafanyuwani tuwa. Tam Diyus at ngay taw fagayu ste ginto te, “Go manabayan tuwam?”

13Igdarangin aw sa tam Fun Isus te, famanyuni ayu. Igdarangin akyangay sa tam Diyus te, falagi at fakafanyuun sa ayu, ay sat Masine fag Falad te, masadii sa ayu fagayu.

Currently Selected:

2 Kurintu 13: TAWEAST

Highlight

Copy

Compare