Nu Galin 9

At Faurianan sa sangay Balan

1Yawi nalong sas Muisis te, “Nanlagi sas talun Iptu at fun ay longi anya te, ‘Katatuy Yawi, taw Ebriyu at Diyus, at longan: Faloi wan ku ngay taw laman nanseg wa angku. 2Ay nu dway ro o gfalo, 3gfadasug aw sik daylan ay gfate am ngay balan: kabayu, asnu, kamelyu, baka, tupa, ay kambing. 4Nanfasaman aw taw Israel at ngay balan ay taw Iptu at ngay balan, laman taw Israel at ngay balan di mkate.’ ”

5Ay Yawi nafatuyanan te, “Balabag nanfagbulun aw katanya.” 6Ay balabag di, nafagbulun wa fiya, ay inkate wan fagayu taw Iptu at ngay balan, ay we nkate nus di sadi sis taw Israel at ngay balan. 7Ay talun Iptu at fun nasugu at ngay taw ay nasaful te, we nkate nus di sadi sis taw Israel at ngay balan. Ay roro gfaning way gugat at fasadan, ay wa kaumsig gfalo taw Israel.

Sik Faurianan Gafamaga

8Ay Yawi nalong sas Muisis ay sas Arun te, “Galumuti dafug siginans fagfatamaan ay Muisis wan takukas sasad kiwang sis talun Iptu at fun faglagan. 9Ay ka fag dafug umlayug sas fagdaul talun Iptu, ay at ngay taw mafamaga anggan at ngay balan.”

10Ay Muisis ay Arun nafaning wa fiya, ay inlindug sis talun Iptu at fun daga salubangan. Ay Muisis naukas wa at ba dafug sasad kiwang, ay at ngay taw nafamaga wan anggan at ngay balan. 11Dewa at ngay mabara wa maakbang sas Muisis, anway kanya sigon gafamaga wan kata yangay tibak taw Iptu. 12Ay roro Yawi nafafaning way gugat talun Iptu at fun at fasadan, ay wa gdungugan Muisis ay Arun, kata Yawi at longan sas Muisis.

Namoyan sik ngay Yelu

13Ay Yawi nalong sas Muisis te, “Balabag ban, afuloi masurip nanlagi sas talun Iptu at fun. Ay longi anya te, ‘Katatuy Yawi, taw Ebriyu at Diyus, at longan: Faloi ku ngay taw laman nanseg wa angku. 14Nu dway ro o gfalo, gfadasug aw sik mason fag famatakan sa emu ay sam ngay fun sirut ay anggan sam ngay taw, laman sumaful o te, we glabi angku sas fagdaul daga. 15At matuyan, satu nafadasug kwan sik daylan ebi ay inkate wam. 16Dewa katanya dakya kaumsig gfate emu laman lumag yay o ku fagmadaragangun ay anggan ku ngayan umdungug sas fagdaul daga. 17Ay roro gfalabi way o gugat ay wo kaumsig gfalo ku ngay taw. 18Nu katanya balabag, kaduge yangay katsi fag lungud menit gfamoyan aw sik ngay yelu kata sik ngay batu ayu sirut. Ya batang gmoyan katanya sas talun Iptu siginan ngay nu bagu kasik talun. 19Nu katanya, katsi sugui te, fasarirungi fagayu am ngay balan ay fagayu am fanuguwan tagsa yay gamasun, anway nus nga sinu at malakloan, dewa taw ay balan umkate wan fagalay matungulan ka fag ngay yelu.’ ”

20Ay talun Iptu at ngay fun sirut at tiba kalimu Yawi at longan. Ay gasubuwan nafasarirung at ngay balan. 21Roro at tibak taw wa gdungugan Yawi at longan ay wa nafasarirung at ngay balan ay at ngay fanuguwan.

22Ay Yawi nalong yangay sas Muisis te, “Fatiyui am suwan sas banwa laman ummoyan sik ngay yelu kata batu sas fagdaul talun Iptu — sas fagayu taw ay sas fagayu balan, ay sa sangay tanum.” 23Ay Muisis nafatiyu wa fiya ay Yawi nafatalafun, ay nafe fangkilat, ay nafe moyan yelu kadaw sik buwadan fili. 24Kanya at matvngvd dawdaw at nafadasug sas talun Iptu siginan ngay yud e talun. Ay kaduge gmoyan we buknga nu gfangkilat. 25Ay inkate wan fagayu taw ay balan tagsis day bale ay anggan fagayu tanum ay kayu. 26Sis fulan Gusin wadi at yud nafamoyan yelu, sis taw Israel at fagbanwanan.

27Ay talun Iptu at fun gdog yay nafatsanya Muisis ay Arun ay glong te, “Ay katsi fag lungud gfoyung aw ayu ku asalanan. Yawi matuyan wa fiya; aw way ay ku ngay taw at ke asalanan. 28Darangini sas Yawi te, ‘Fatuwasi wan ka fag ngay talafun ayu daw ay ka fag moyan yelu ay gfalo akwa long ayu; wa masine nu gbanwan am gugat ste.’ ”

29Ay Muisis nabalus te, “Gina aw lumo sas day fulan, gfaabat aw ku take sas Yawi laman nandarangin ay umtuwas wan nu gtalafun ay nu gmoyan yelu, laman sumaful o te, Yawi tuwa at tagagbilug fagdaul daga. 30Ay roro gsaful kwa te, o ay anggan am ngay fun sirut yam gugat kalimu Yawi.”

31(Ay at ngay fare infanggalutan wan gina gaaniun ay anggan tagsariksik fag tanum. 32Roro igdi tibak fare ay tiba yak bantuyan#9:32 bantuyan: Sis Faniganun, butil. di nfanggalutan anway bunya fanganiun fag lungud.)

33Ay Muisis nalo wan siginans talun Iptu at fun daga salubangan ay nalo sas day fulan. Ay nafaabat at duwa take sas Yawi laman nandarangin ay intuwas wa fiya nu gtalafun ay nu gmoyan ay anggan moyan yelu. 34Ay talun Iptu at fun nu nalag te, intuwas wa fiya nu gtalafun ay nu gmoyan ay anggan moyan yelu, gdog yay fiya gasalanan. Gfaning way gugat at fasadan ay anggan at ngay fun sirut. 35Katanya wayay wa nafalo taw Israel, kata Yawi at longan sas Muisis.

Currently Selected:

Nu Galin 9: TAWEAST

Highlight

Copy

Compare