Nu Galin 10

Sik Famatakan fag ngay Liyung

1Ay Yawi nalong sas Muisis te, “Nanlagi sas talun Iptu at fun anway nafafaning kway gugat at fasadan ay anggan at ngay fun sirut, laman lumag ku ngay fagbulun at madulawan, 2ay laman e fag famansulitun tuwa ban am sa ay ngay unga ay sa ay ngay fufu te, ‘Katanya nu gfatakan aw ka fag ngay taw Iptu ay nu gfalag aw at madulawan ku ngay fagbulun sa anya. Ay ay ngay unga ay ay ngay fufu sumaful te, aw wan Yawi.’ ”

3Ay Muisis ay Arun nananlag wa fiya sas talun Iptu at fun ay nalong anya te, “Katatuy Yawi, taw Ebriyu at Diyus, at longan te: Seduge ya manga ban nu kamabo o angku? Faloi wan ku ngay taw laman nanseg wa angku. 4Nu dway ro o gfalo, balabag sigon gfadasug aw sik ngay liyung sa am talun. 5Ay ka fag ngay liyung at kayuwan tumabun daga ay wam glag. Ay umon wa ban ka fag ngay tanum at yud nadalanan ka fag moyan yelu ebi, ay anggan ngay kayu at bagu gtugbung. 6Ay galiyungun wan sam basad bale ay anggan sam fun sirut at ngay bale ay fagayu am ngay taw at bale. Ya batang indasug katvngvd anya sas fagdaul talun Iptu siginan ngay ay aguyangan kadasug ste ay anggan katsi.” Ay rodi Muisis ay Arun nalo wan.

7Ay talun Iptu at fun at ngay fun sirut nalong anya te, “Seduge ya manga nu gfabayan o takatanya tagfatakan antam? Faloi wan ka fag ngay taw Israel laman nanseg wa sas Yawi. Kanya wan at Diyus. Amatangani nu kin, tam talun Iptu infanggalutan wan?”

8Ay Muisis ay Arun gdog yay infoli sas talun Iptu at fun. Ay fun nalong sa anya te, “Loi wan laman nanseg wam sas Yawi. Kanya wan ay Diyus. Ay roro foyungi angku te, go sinu tagalo ayu gina am glo.” 9Ay Muisis nabalus te, “Fagayu ami, glo wami; em ngay sisiyan ay em ngay magurang, ay tumaban wami em ngay balan, ay nanyafun daul ami, sik famauseganan sas Yawi.”

10Ay talun Iptu at fun malimata nu gelongan sas Muisis te, “Satu nangus ay Yawi ufudi tuwa ayu gina aw gfalo ayu fagayu. Matuyan wa te, mauri way ay fasadan. Nanlagyu wam angku. 11Yaya, kwa kaumsig! At ngay mangama yakman taglo laman nanseg sa ay Yawi, teway katanya wan ay naumsigan.” Ay talun Iptu at fun nafalo wa Muisis ay Arun siginan at akbang.

12Ay Yawi nalong sas Muisis te, “Fatiyui am suwan sas talun Iptu baliwa laman umdasug ngay liyung, ay umon wan ka fag ngay tanum at yud nadalanan ka fag moyan yelu ebi.” 13Ay Muisis nafatiyu wa fiya at suwan, ay Yawi nafadasug sik tagmara siginans fakamenitan sik menit ay sik yabi nu si aba. Ay balabag di, ka fag tagmara nafasure sik ngay liyung 14ayuwayu ay intungkud sas fagdaul talun Iptu. Ya batang kasure katanya ebi ataw baliwa ay bandi ban. 15Inkayu at liyung sas fagdaul talun Iptu anggan wa inlayung at daga. Ay naon wan ka fag ngay tanum at yud nadalanan ka fag moyan yelu ebi, ay anggan fagayu buwadan naon wan. Ay we gfasawadan tanum sas fagdaul talun Iptu.

16Ay talun Iptu at fun mafali nu gfatsanya Muisis ay Arun, ay glong te, “E asalanan aw sas Yawi ay Diyus ay sa ayu. 17Falyami yap ku asalanan. Ay darangini sas Yawi ay Diyus te, buli wan ste ginan ka fag faurianan takamate.”

18Ay Muisis nalo wan ay nadarangin sas Yawi. 19Ay Yawi nafe tagmara mabitsug siginans fakayabian baliwa ay nafalayug ka fag ngay liyung sas Dagat Maraska, ay we liyung nus di sadi sas fagdaul talun Iptu. 20Ay dewa katanya Yawi nafafaning way gugat fun at fasadan ay wa nafalo taw Israel.

Sik Faurianan fag Marum

21Ay Yawi nalong sas Muisis te, “Falugdei am take sas banwa laman ro umkarum dawdaw sas fagdaul talun Iptu.” 22Nu katanya, Muisis nafalugde wa fiya at take sas banwa ay inkarum wa fiya dawdaw sas fagdaul talun Iptu at kadugayan tuluk menit. 23Ay taw Iptu saway at ngay basad bale tuluk menit wa glag at sadi. Ay sis taw Israel mayamag tuwa gugat sit fagbanwanan.

24Ay talun Iptu at fun gdog yay nafatsanya Muisis ay nalong te, “Kin wan, nanseg wam sa ay Yawi. Tabani wan ay ngay talanan ay lag am gtaban ay ngay balan.” 25Ay Muisis nabalus te, “Tumaban wami em ngay balan laman e fanganyun ami em fagbatasun fag ngay anyun ay e tiba yak fanganyun sas Yawi em Diyus. 26Ay tumaban wa ban ami fiya em ngay balan; wami gfasawad nus di sadi. Anway dwami gsaful te, inday fag balan em fanganyun sas Yawi. Gina yay ami sanya nu sumaful ami.”

27Ay roro Yawi nafafaning way gugat at fun at fasadan, ay wa nafalo taw Israel. 28Ay talun Iptu at fun nalong sas Muisis te, “Loi wan siginan ku akbang. Lag gdog gfalagan angku. Nu lumag kyay ro emu umkate wo.” 29Ay Muisis nabalus te, “Kin, nu kanya wan am fakaumsigun wa ta dumog lumadlagan.”

Currently Selected:

Nu Galin 10: TAWEAST

Highlight

Copy

Compare