Nu Galin 8

1Ay Yawi nalong sas Muisis te, “Nanlagi sas talun Iptu at fun ay longi anya te, ‘Katatuy Yawi at longan: Faloi wan ku ngay taw laman nanseg angku. 2Nu dway ro o gfalo ku ngay taw nanfasure aw sik ngay fiyo ayuwayu sas fagdaul am talun fafiyoun kwan. 3Ay Safa Nilu umkapnu wa fiyo ay sumakbo sam basad bale, ay anggan wa sam fagtiyugan, ay sam ngay fun sirut ay anggan sas fagayu am taw basad bale, ay sam ngay fagfatamaan, ay sam ngay fakawatan tinafay. 4Ay ka fag ngay fiyo tumulfis wa sa emu ay anggan sam ngay taw ay sam ngay fun sirut fagayu.’ ”

5Ay Yawi nalong yay fiya sas Muisis te, “Longi sas Arun te, ‘Fatiyui yangay am suwan sa sangay safa daul, sa sangay safa sirut, ay anggan sa sangay falinoan, ay mafiyoun wan fagdaul talun Iptu.’ ”

6Ay Arun nafatiyu at suwan sas talun Iptu at ngay safa, ay at ngay fiyo insure ay nafiyoun fagdaul talun Iptu. 7Roro at ngay mabara mafafaning yangay katanya. Nafasure yangay siginan sad safa sik ngay fiyo sis fagdaul talun Iptu.

8Ay talun Iptu at fun nafatsanya Muisis ay Arun, ay nalong anya te, “Darangini sas Yawi te, falyami ka fag ngay fiyo siginan angku ay si ku ngay taw, ay gfalo akwa ban ay ngay kaiban laman nanganyun sas Yawi.”

9Ay Muisis nalong sas talun Iptu at fun te, “Foyungi way angku te, ginain ban nu gdarangin aw emu, ay sam ngay fun sirut, ay sam taw fagayu, laman malyam wan ka fag ngay fiyo ste ginan sangay bale. Ay at sawad tagsi way sad Safa Nilu.” 10Ay talun Iptu at fun nabalus te, “Balabagi wan nu gdarangin o angku.” Ay Muisis nalong te, “Kin, maning aw am fasadan, laman sumaful o te, we tibak Yawi kata em Diyus. 11Ay malyam wa ban ka fag ngay fiyo siginan emu, siginan am ngay bale, siginan am ngay fanuguwan, ay siginan am ngay taw, ay at sawad tagsi way sad Safa Nilu.”

12Ay Muisis ay Arun nu nalo wan siginans talun Iptu at fun, Muisis nadarangin sas Yawi te, “Falyami wan am nafasure fag ngay fiyo sas talun Iptu.” 13Ay Yawi nafaning kata Muisis at fagetun. Ay ka fag ngay fiyo inkate wa sat ngay basad bale, ay sat day bale, ay sat ngay tanuman. 14Ay taw Iptu nu nafaful nafabugsul ayuwayu, ay fagdaul talun Iptu bayuk wan. 15Ay roro talun Iptu at fun nu nalag wa te, nalyam wan ka fag ngay fiyo, nafaning way gugat at fasadan kata ebi ataw, ay wa gdungugan Muisis ay Arun, kata Yawi at longan.

At Faurianan fag ngay Balangkad

16Ay Yawi nalong sas Muisis te, “Longi sas Arun te, falangi am suwan sas wa daga, ay at ngay dafug sas fagdaul talun Iptu umbalangkad wan.” 17Ay dugsay nafaning wa fiya, ay gina Arun nafalang at suwan sas wa daga, at ngay dafug sas fagdaul talun Iptu inbalangkad wan. Ay intayuk sa sangay taw ay sa sangay balan. 18Ay at ngay mabara kaumsig yangay nanfaning, ay roro wa nafafaning. Ay ka fag ngay balangkad matayuk ayuwayu sa sangay taw ay sa sangay balan.

19Ay at ngay mabara nalong sas talun Iptu at fun te, “Diyus wan at nafasure takatanya.” Ay roro talun Iptu at fun gfaning way gugat at fasadan, ay wa gdungugan Muisis ay Arun, kata Yawi at longan.

At Faurianan fag ngay Lango

20Ay Yawi nalong sas Muisis te, “Balabag, afuloi masurip ay nanlagi talun Iptu at fun gina galoun sad safa. Ay longi anya te, ‘Faloi wan ku ngay taw laman nanseg wa angku. 21Nu dway ro o gfalo, gfadasug aw sa emu sik ngay lango, anggan sam fun sirut ay sam ngay taw. Ay malangoun wan sa ay ngay basad bale ay fagdaul ay talun. 22Ay gfasaman aw fulan Gusin, ku ngay taw fagbanwanan. Ay we lango sanya, laman sumaful am te, aw Yawi, sanya aw fag talun. 23Ay gfasaman aw ku ngay taw siginan am ngay taw. Balabag ban umgurungan wa fiya.’ ”

24Ay Yawi nafadasug wa fiya sik ngay lango ayuwayu sas talun Iptu at fun bale daul ay sat ngay fun sirut bale. Ay fagdaul talun Iptu mafanggalut wan.

25Ay talun Iptu at fun nafatsanya Muisis ay Arun, ay nalong te, “Kin wan, anyuni wa sa ay Diyus, ay teway stei ways talun Iptu.” 26Ay Muisis nabalus te, “Wa masine nu ganyun ami ste, teway em anyun sas Yawi em Diyus malimata way dawdaw sa sangay taw Iptu. Ay nu ste way nu ganyun ami, malang wam emi batu anggan wami umkate. 27Lumo wami tuluk menit sas talun at yud e taw laman nanganyun ami sas Yawi em Diyus, kata at suguwan emi.” 28Ay talun Iptu at fun nalong te, “Kin wan, nanganyuni wan sas Yawi ay Diyus sas talun at yud e taw, ay teway lag am kayayu. Ay katsi, darangini yap angku.” 29Ay Muisis nabalus te, “Kin, nu lumo aw ste ginan, dumarangin aw sas Yawi. Ay balabag ban malyam wan ka fag ngay lango siginan ayu fagayu. Ay fatuyani wa fiya te, lag gdog gfanluk emi, ay lag gsalag nu glo ami laman nanganyun sas Yawi.”

30Ay Muisis nalo wan ay nadarangin sas Yawi. 31Ay Yawi nafaning Muisis at fagetun. Nalyam wa fiya ka fag ngay lango siginan fagayu taw Iptu. Ay we sawad nus di sadi. 32Roro talun Iptu at fun nafaning way gugat at fasadan, ay wa kaumsig gfalo taw Israel.

Currently Selected:

Nu Galin 8: TAWEAST

Highlight

Copy

Compare