Nu Galin 7
7
1Yawi nalong sas Muisis te, “Dungugani! Gfakata kwa ban emu sik diyus sas talun Iptu at fun daga salubangan. Am fadugsay Arun am tagelongan. 2Foyungi anya fagayu ku nalong emu. Ay kanya at tagelongan sas talun Iptu at fun te, ‘Falfasi wan taw Israel siginan am talun.’ 3Ay roro nanfafaning kyay gugat at fasadan. Dewa aw fasure sik ngay madulawan ay madaragang fag ngay fagbulun, 4wa dumungugan emu. Ay gfadasug aw at matvngvd fag ngay faurianan sas talun Iptu, ay gfalo kwa long fagayu ku taw Israel. 5Ay nu nafaurianan kwan taw Iptu ay nafalfas aw taw Israel siginan at talun, taw Iptu sumaful wa ban te, aw wan Yawi.”
6Ay Muisis ay Arun nafaning wa fiya Yawi at suguwan. 7Gina Muisis ay Arun gfasulitanan sas talun Iptu at fun, Muisis banwa anwa 80 ay Arun banwa anwa 83.
8Ay Yawi nalong sas Muisis ay sas Arun te, 9“Fagalay talun Iptu at fun nalong te, fasurei sik madulawan, o, Muisis, longi Arun te, ‘Ukasi am suwan sas talun Iptu at fun daga salubangan ay kanya ro umsik ubyanun.’ ”
10Ay Muisis ay Arun nananlag sas talun Iptu at fun ay nafaning wa fiya Yawi at longan. Arun naukas at suwan sas talun Iptu at fun ay sat ngay fanuguwan daga salubangan, ay insik ubyanun. 11Ay talun Iptu at fun nafatsanya at masafulan ay mabara fag ngay taw, ay anggan kanya nafasure yangay takatanya fag madulawan. 12Bawat sadi naukas yangay at suwan ay insik ubyanun yangay. Ay roro Arun ubyanun natulun wan at ngay ubyanun. 13Ay dewa katanya, talun Iptu at fun nafaning way gugat at fasadan ay wa gdungugan Muisis ay Arun, kata tuwa Yawi at longan.
Safa Nilu Nataguk wan
14Yawi nalong sas Muisis te, “Anggan katsi talun Iptu at fun gfaning way gugat at fasadan; wa kaumsig gfalo taw Israel. 15Nu katanya, balabag, nanlagi yap talun Iptu at fun gina glo sad Safa Nilu. Ubai am suwan ebi at kinsik ubyanun ay fablangi sas tigyangan safa. 16Ay longi anya te, ‘Yawi, taw Ebriyu at Diyus, nasugu angku laman nanlong aw emu te, “Faloi wan ku ngay taw laman nanseg angku sas talun at yud e taw.” Ay roro anggan katsi wa kaumsig gfaning. 17Nu katanya, katatuy Yawi at longan, “Sa ku ngay fagmafabulun sumaful wo te, aw wan Yawi.” Linggati nu kin! Malang aw ku suwan sad Safa Nilu ay at safa ro tumaguk. 18Ngay uyang umkate, ay safa umbayuk, ay taw Iptu we fanginum.’ ”
19Yawi nalong yangay sas Muisis te, “Longi sas Arun te, ‘Fatiyui am suwan sas fagayu safa sis talun Iptu: sa sangay safa daul, sa sangay safa sirut, ay anggan sa sangay falinoan, ay fagayu safa tumaguk wan. Katanya wan at kumgurungan sas talun Iptu. Ay anggan at suwadan sasad kayu ay sasad batu tumaguk wan.’ ”
20Ay Muisis ay Arun nafaning wa fiya Yawi at suguwan. Gina talun Iptu at fun ay at ngay fanuguwan iglinggat, Arun nafaabat at suwan ay nafalang sad Safa Nilu ay nataguk wa fiya. 21Ay inkate wan at ngay uyang ay inbayuk at safa, ay taw Iptu we fanginum, teway at safa nataguk wan sas fagdaul talun Iptu. 22Roro at ngay mabara sis talun Iptu mafafaning yangay katanya. Nu katanya, talun Iptu at fun nafaning way gugat at fasadan, ay wa gdungugan Muisis ay Arun, kata Yawi at longan. 23Ay talun Iptu at fun noli wan sat bale ay wa nfalbak. 24Ay taw Iptu naali sa sangaba tigyangan safa laman e fagbulan at fanginum teway wa masine at mamam sasad safa.
At Faurianan fag ngay Fiyo
25Ay inlangfe wan fituk menit gina Yawi nasugu Arun te, “Falangi sad Safa Nilu.”
Currently Selected:
Nu Galin 7: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
