Nu Galin 6
6
1Yawi nalong sas Muisis te, “Katsi ro, lumag o ku fagnanfagbulunun sas talun Iptu at fun. Si ku fagmadaragangun, kanya gfalo wa ban ayu siginan at talun. Ay mafabulunan wa ban fiya gfalo ayu.”
2Ay Diyus nalong yay fiya sas Muisis te, “Aw wan Yawi. 3Aw at Madaragang fag Diyus ay insure aw sas Abrayam, sas Isaak, ay sas Akub, ay roro kwa nafoyung anya te, ku ngayan Yawi. 4Ay nafatuyanan aw sa anya te, ‘Nanfon ban aw ayu talun Kanaan nus nganday nu gbanwan am kata sik ngay betaw.’ 5Nadungug akwan taw Israel nu gatakan gafanuguwanan sas talun Iptu. Ay namatang aw ku fatuyanan ebi sat ngay aguyangan. 6Ay longi sa sangay taw Israel te, ‘Aw wan Yawi. Nanfalfas aw ayu nu gafanuguwanan am. Si ku fagmadaragangun, mason fag faurianan at kumdasug sas taw Iptu, ay nanfalangfe aw ayu. 7Ay nafatuyanan aw te, am wa ban ku ngay taw ay aw wa ban ay Diyus. Ay sumaful yangay am te, aw wan Yawi, ay aw yangay ay Diyus at nafalfas ayu nu gafanuguwanan am sis talun Iptu. 8Ay tumaban aw ayu sa ku nafatuyanan fag talun sa ay aguyangan Abrayam, ay Isaak, ay Akub. Ay nanfon kwa ban ayu ka fag talun ay am wa ban tagagbilug. Aw wan Yawi.’ ”
9Muisis nalong wa fiya sa sangay taw Israel ay roro wa gafanud teway we fagsegun at katvngvdan nu gatakan ay nu gafanuguwanan.
10Yawi nalong sas Muisis te, 11“Loi wan ay longi sas talun Iptu at fun te, ‘Faloi wan taw Israel siginan am talun.’ ” 12Ay Muisis nalong sas Yawi te, “Kanya fag ngay taw Israel nu dway ro gdungugan angku kaugat wa ro fun nu gyud gdungugan, teway wa masine nu gelongan aw!”
13Ay Yawi nalong sas Muisis ay sas Arun te, “Longi sa sangay taw Israel ay sas talun Iptu at fun te, aw wan at nasugu ayu laman nanfangguna am taw Israel nu kalfas siginans talun Iptu.”
Muisis ay Arun at ngay Aguyangan
14Kayu tuy Israel at ngay aguyangan at ngay talanan siginans Israel at ngay baguwama fag labi duwa:
Rubin, Israel turungana, at ngay baguwama: Kanuk, Palu, Kisrun, ay Karmi. Kanya fag ufat ay anggan at ngay talanan ay at ngay kadagdagan siginans Rubin.
15Ay Simyun at ngay baguwama: Yemuel, Yamin, Uad, Yakin, Sukar, ay Shaul. (Shaul at tama Simyun. Ay Shaul tina sik taw Kanaan.) Kanya ay anggan at ngay talanan ay at ngay kadagdagan siginans Simyun.
16Lebi at ngay baguwama at marirukan siginan at ngay kadagdagan: Girsun, ay Kuat, ay Mirari. Ay Lebi banwa nu anwa 137 inkate wan.
17Girsun at ngay baguwama Libni ay Simi.
18Kuat at ngay baguwama: Amram, Isar, Kebrun, ay Usiyel. Ay Kuat banwa nu anwa 133 inkate wan.
19Mirari at ngay baguwama Makli ay Musi. Kayunya at ngay talanan siginans Lebi fag kadagdagan at marirukan.
20Amram namangenaan Ukebed at tama fadugsay. Ay at ngay baguwama Arun ay Muisis. Ay Amram banwa nu anwa 137 inkate wan.
21Isar at ngay baguwama: Kura, Nefeg, ay Sikri.
22Usiyel at ngay baguwama: Misael, Elsafan, ay Sitri.
23Arun namangenaan Eliseba, Aminadab baguyna ay Naksun at fadugsay. Kayu tuy at ngay baguwama: Nadab, Abiyu, Eliasar, ay Itamar.
24Kura at ngay baguwama: Asir, Elkana, ay Abiyasap. Kayunya at ngay kadagdagan siginans Kura.
25Eliasar namangenaan Putiyel at baguyna at sadi. Ay inke unga sik ama at ngayan Finikas. Eliasar tama Arun.
Kayunya at aguyangan siginans Lebi fag fulan taw.
26Tuy fag Arun ay fag Muisis at nalong ste fagrirukan, kanya fag duwa Yawi at fagsuguwan te, “Falfasi fagayu taw Israel siginans talun Iptu.” 27Kanya fag duwa at nafasulitanan sas talun Iptu at fun te, falfasi wan taw Israel ste ginan fag talun.
Yawi Nasugu Arun laman Nanlong Muisis at Fagalongunun
28Gina Yawi nafasulitanan Muisis sas talun Iptu, 29nalong anya te, “Aw wan Yawi. Longi sas talun Iptu at fun fagayu ku longan sa emu.” 30Roro Muisis nabalus sas Yawi te, “Kwa gsaful gelongan sis wa taw, ay wa ngap ro dumungugan angku at fun.”
Currently Selected:
Nu Galin 6: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
