Nu Galin 2

Muisis nu Kasalug

1Ay ginanya fag lungud, sik ama siginans Lebi fag fulan taw indaduwa sa sik mangena siginan yangay Lebi fag fulan taw. 2Ay bandi ka fag mangena gfafiyon wan ay nafasalug sik ama. Ay nu nalag te, at ngenge masine, nasuksuk at ngenge tuluk magdanun. 3Ay roro nu dway mafasuksuk, nabul uwe at fangawat bugyas, ay nadafut sik fandafut sis guyuy. Ay nasuwad at ngenge sasad bugyas ay nauba sas tigyangan Safa Nilu ay naubun wa sis wa makmak. 4Ay ka fag ngenge at kaka fag ina nu malindug wa bangan ngayayu at ariyan laman sumaful te, tain at kumgurungan sat ariyan.

5Ay ginanya, at fun sis talun Iptu#2:5 fun sis talun Iptu: Sis Fangebriyu, Faraun. at baguyna nalo nangigus sad Safa Nilu. Ay kaduge gigus, at fanuguwan fag ngay mangena gfanloan sa sangaba tigyangan safa. Ay at fun baguyna nalag ka fag bugyas sis wa makmak, ay nalong sat fanuguwan at sadi te, “Buli.” 6Ay naurug at suklub bugyas ay nalag sik ngenge nu guyway. Ay kanya nfanyu ay nalong te, “Tuy fag ngenge, sik taw Ebriyu.”

7Ay ka fag ngenge at kaka nkakbang sas fun at baguyna ay ginto te, “Go kaumsig o nu gsarap aw sik taw Ebriyu mangena tagfasusu tuy fag ngenge bilang am ngenge?” 8Ay fun at baguyna nabalus te, “Kin.” Ay nu katanya, at kaka nananlag at tina ay nataban sas fun at baguyna. 9Ay fun at baguyna nalong sanya fag mangena te, “Ubai tuy fag ngenge ay fasusui. Fatvngvduni yap ay angku way ban. Ay kaduge o gfadaul, igsali kyay sa emu.” Ay ka fag mangena nabul at ngenge ay nafatvngvdun. 10Ay ka fag ngenge nu ntuwas wa nu gsusu, at tina nataban sas fun at baguyna. Ay fun at baguyna nalong te, “Tuy kata wa ku unga, ay katsi, gfangayan aw anya te, Muisis, at masuwad te, ku nabul siginan sad safa.”

Muisis Nalagyu sas Talun Midyan

11Ay Muisis nu baguwama wan, nalo wa sat ngay kalongan ay nalag te, gatakan dawdaw. Ay nalag yangay sik taw Iptu nu gfalang sik Ebriyu at kalongan. 12Ay Muisis iglingaman sat ngaba dayu te, go di e taw. Ay nu nalag te, di e taw, nafate wan ka fag taw Iptu, ay nalubgub wa sasad lagnas.

13Ay balabag di, Muisis infoli yay fiya ay nalag duwak taw Ebriyu nu gbarangyan. Ay nainto sat ke asalanan te, “Taw ro am fagfalangun am iba?” 14Ay ka fag mangama nabalus te, “Sinu at nafili emu laman nanfangatulun emi ay nanmagurang emi? Ay go nanfate yangay o angku kata am nafate fag taw Iptu egmenit?” Ay Muisis nu nadungug katanya, kalimu wa dawdaw teway gamatangan te, “E nasaful way mangaro ku nafagbulun.”

15Ay at fun sis talun Iptu nu nasaful Muisis at nafagbulun, nasugu te, “Fatei wan Muisis!” Ay roro, Muisis nalagyu wan sas talun Midyan ay sanya wan nu gbanwan. Ay Muisis nu ndasug sas talun Midyan, malunggung yay sirut sis tigyangan fagfanaguban. 16Ay rodi tv, e fituk baguyna ndasug nanfanagub ay nanfainum at tama ngay balan. Ay ka fag ngay baguyna at tama sik taganyun sanya fag fulan. 17Ay e ngay tagtanud balan indasug yangay ay nalong sa ka fag ngay baguyna te, “Loi wan ste ginan.” Ay roro Muisis natarabang ka fag ngay baguyna ay nafainum yangay at ngay balan.

18Ay ka fag ngay baguyna nfoli wa sat tama Reuwel.#2:18 Reuwel: Muisis at nugangama at ngayan duwa. At sadi Reuwel, ay at sadi Itru. Linggati sis 3:1. Ay at tama ginto te, “Taw ro ay fagnamafaliun nu guli am?” 19Ay ka fag ngay baguyna nabalus te, “Teway sik taw Iptu natarabang emi laman tibak tagtanud di gfalingun emi. Ay nafapnu yay em baringan ay nafainum yangay em ngay balan.” 20Ay at tama nainto te, “Dada ka fag taw? Taw ro ay fagnaubunun anya? Tabani tuwa ste laman gasfuwan watam gfangon.” Ay at ngay baguyna nanantaban yay Muisis.

21Ay siginan ginanya, Muisis sanya wan nu gbanwan sis Reuwel bale. Ay bandi nu glugo wan, Reuwel nafadaduwa at baguyna Sifura sas Muisis. 22Ay Sifura nfafiyon wan ay nafasalug sik ama. Ay Muisis nafangayan at ngenge te, Girsum, at masuwad te, “Sik betaw#2:22 betaw: Sis Faniganun, bisita. kway ste fag talun.”

23Ay nu ngayu wak banwa at kinlangfe, ebi fag fun sis talun Iptu tagfatakan taw Israel inkate wan. Ay dewa katanya, taw Israel gafanuguwanan way gugat gatakan. Ay nu katanya, naet tarabang sas Diyus, ay at fagetun indasug sas Diyus. 24Ay Diyus nadungug nu gatakan ay namatangan te, “E fatuyanan aw sas Abrayam, sas Isaak, ay sas Akub.” 25Diyus nu nalag taw Israel nu gbanwan kanya kafanyu.

Currently Selected:

Nu Galin 2: TAWEAST

Highlight

Copy