Nu Galin 3

Diyus nu Gfili Muisis

1Ay Muisis gtanud at nugangama ngay balan. At nugangama ngayan Itru.#3:1 Itru: Muisis at nugangama at ngayan duwa. At sadi Reuwel, ay at sadi Itru. Kanya at taganyun sis talun Midyan. Ay Muisis nataban at ngay balan sas talun at yud e taw, anggan indasug sas Kureb, sas Diyus nafili fag bugsul. 2Ay nut sanya wan, Muisis nalag sik kayu sirut nu gigang ay wa kabatas. Ay roro mangaro, Yawi at tagfabarita nsure sa anya sa ka fag kayu sirut. 3Ay Muisis gamatangan te, “E, taw siring fagyudun kabatas? Nangakbang kyay ay nanfalingamanun aw fiya fiya.”

4Yawi nu nalag te, Muisis kakbang wan nu nanlingaman, kanya nauro siginans kayu sirut te, “Muisis, Muisis!” Ay Muisis nabalus te, “Taw kanya?”

5Diyus nalong te, “Lag kakbang. Lafusi yap am sinilas, teway am fagmalindugan sik mafilian fag lungud. 6Aw wan am aguyangan Abrayam, ay Isaak, ay Akub at Diyus.” Ay Muisis nu nadungug, natabun fagdaul at mata, teway kalimu glinggat Diyus.

7Yawi nalong yangay fiya te, “Nasaful kwa fiya ku ngay taw nu gatakan sis talun Iptu. Ay nadungug kwan nu get tarabang teway mason wan at ngay fun sirut nu gfauri. Ay kafanyu aw ku ngay taw teway katsi gatakan dawdaw sis talun Iptu. 8Nu katanya, nastiye aw laman nanfalfas aw ku ngay taw siginans talun Iptu ay nantaban aw sat masine, ay tagbvt, ay tagfangatugbung fag daga,#3:8 tagfangatugbung fag daga: Sis Fangebriyu, daga kalimus susu bilug ay deut. sas taw Kanaan at talun, ay anggan taw Kit, taw Amur, taw Peres, taw Kib, ay taw Yebus at ngay talun. 9Nadungug kwa fiya taw Israel at fagetun, ay nasaful aw taw Iptu nu gfatakan dawdaw ku ngay taw. 10Ay nu katanya katsi, gsugu aw emu te, loi wan sas talun Iptu ay nanlagi at fun. Ay falfasi ku ngay taw sanya ginan.”

11Ay Muisis nabalus te, “Go sangay ro aw at nanlag sas fun laman nanfalfas am ngay taw siginans talun Iptu?” 12Ay Diyus nabalus te, “Gufud akwa emu. Ay sumaful wo fiya te, aw at nasugu emu, teway sumeg ban am angku ste fag bugsul gina ban o nafalfas ku ngay taw siginans talun Iptu.”

13Ay Muisis nalong sas Diyus te, “Ay nu nanlag kyay sanya ku ngay iba taw Israel ay nu lumong aw te, tam ngay aguyangan at Diyus nasugu angku laman nanfalfas ayu siginans talun Iptu, ay nu e minto angku te, ‘Sinu at nasugu emu?’ Tain ro ku famalus?”

14Ay Diyus nabalus te, “Aw, aw wan. Ay nu e minto emu te, ‘Sinu at ngayan’ balusi anya te, ‘Kanya at nasugu angku glong te, Aw, aw wan.’ ” 15Ay Diyus nalong yangay te, “Longi sa ku ngay taw te, ‘Yawi at nasugu angku sa ayu. Kanya ay aguyangan Abrayam, ay Isaak, ay Akub at Diyus.’ Ku ngayan Yawi faggugat ban.”

16Yawi nalong sas Muisis te, “Loi wan ay fafuli taw Israel at ngay tagmagurang ay longi anya te, ‘Yawi, ay ngay aguyangan Abrayam, ay Isaak, ay Akub at Diyus insure sa angku, ay nalong te: Gsaful kwa fiya taw Iptu gfatakan dawdaw ayu. 17Ay katsi gfatuyanan aw te, nanfalfas akwa ban fiya ayu siginans talun Iptu ay fagatakanun dawdaw. Ay tumaban aw ayu sa sik tagfangatugbung fag daga, sas taw Kanaan, taw Kit, taw Kib, taw Amur, taw Peres, ay taw Yebus at talun.’

18“Muisis, ka fag ngay tagmagurang dumungugan wa fiya am longan. Ay nu katanya, tabani ay nanlagi sas fun Iptu, ay longi te, ‘Yawi, ngay Ebriyu at Diyus, insure sa emi. Ay katsi, nu masine di, tuluk menit lumo yay ami sas talun at yud e taw laman nanganyun wami sas Yawi em Diyus.’ 19Ay nasaful kwa te, ka fag fun wa mkumsig yap ngay sumaful te, aw tuwa taglabi at madaragang. 20Ay nu katanya, nanfalag kwa ban sik ngay malimu laman gfaurianan sas fagdaul talun Iptu. Ay nu nafalag kwa ban ku fagmadaragangun, ka fag fun lumong wa te, ‘Kin, loi wan!’ 21Ay gina am galoun, gfaamatanganan kwa ban taw Iptu laman mon ayu fagayu ay ngay nayudanan. 22Ay ginanya, taw Israel at ngay mangena lumo sat ngay fasabale#3:22 fasabale: Sis Faniganun, kapitbahay. fag taw Iptu ay sa tiba yak tagbanwan sanya sis talun Iptu nanget at ngay naumsigan: at ngay famasinean at fangawat gintu ay pilak, ay anggan ngay balukas. Ay fasuluni sa ay ngay sisiyan at ngay nabul siginans taw Iptu. Katanya nu gbul am taw Iptu at ngay fagnuwan.”

Currently Selected:

Nu Galin 3: TAWEAST

Highlight

Copy