Nu Galin 12
12
At Tagfabarita nu Glangfe
1Yawi nalong sas Muisis ay sas Arun gina sis talun Iptu te, 2“Siginan katsi fag magdanun amatangani tuwa taguna fag magdanun kayu banwa. 3Foyungi sas fagayu fulan taw Israel te, sis fasafuluk menit katsi fag magdanun, fagayu talanan famasadani sadik tupa ay ate sadik kambing. 4Nu dway ngayu fag talanan ay nu dway mafafamin sik tupa, foni yap sat fasabale. Ka fag tupa afudi fainfaluwani at kayuwan. 5Filii sik tupa ay ate sik kambing tama lawis at yud e fanlonganan. 6Ay faguti anggan sfafun fa-14k menit ginanya fag magdanun. Anway ginanya fag menit fagayu fulan taw Israel nanfate ka fag ngay balan. 7Ay buli at balyu at taguk ay rarusi si ay tungud sakbawan ay sis tigyangan, si ay fagfangonan fag bale. 8Ay ginanya fag yabi, oni at nadangdang fag tupa, mayat fag gulayan, ay tinafay at yud e famadaul. 9Lag am kon nu melo yay ay nu nafauluk way fagtvngvd. Dangdangi way fagdaul anggan alfuyu, ay bitis, ay basad bilug. 10Famini wan ginanya fagayu. Ay nu e sawad yay sis balabag batasi wan. 11Kaduge am gfangon, famasadani nu glo am; sinilasani wan tedi wan ay ngay suwan. Talayuni wan nu kon am. Katanya ay fagbulun gina am maful kaduge am gamatangan sa baliwas Tagfabarita nu Glangfe laman gfauseganan am angku.
12“Ginanya fag yabi, dumalan aw sas talun Iptu laman nanfate aw fagayu taw Iptu at ngay turungana fag ama anggan at ngay balan at turungana. Ay rumasras akyangay taw Iptu at fagsegan fagayu. Aw wan Yawi. 13Ay ka fag taguk ay nararus sa ay bale, kanya sik famasaful te, sanya nu gbanwan am. Nu lumag aktuwa, lumangfe akwan, ay di am umfaurianan gina aw gfaurianan taw Iptu.
14“Amatangani tuwa gugat ka fag menit. Fagbuluni kayu banwa ginanya fag menit anway kanya sik fagamatanganun sa angku. Ani tuwa gugat fagbuluni ka fag suguwan anggan sa ay ngay sugfun taw. 15Fituk menit nu kon am tinafay at yud e famadaul. Tagunai fag menit, fagayu am ukasi wan ay famadaul tinafay tagsi ay ngay bale. Anway nus nga sinu at takon tinafay at ke famadaul siginans fasadik menit anggan sas fituk menit, kanya wa katap te, taw Israel. 16Sis taguna ay sis fafituk menit mafuli segi angku. Lag am gfagbulun ginanya fag ngay menit, dasday am kamasadan ay fakonun. Katvngvd yakman anya ay fagbulun.
17“Amatangani tuwa ka fag fagmafulun sa baliwa Tinafay at yud e Famadaul, kanya tagfaamatang sa ayu te, ginanya fag menit nu gfalfas aw fagayu taw Israel siginans talun Iptu. Ani tuwa gugat fagbuluni ka fag suguwan anggan ay ngay sugfun. 18Fasigadi sfafun sis fa-14k menit sis taguna fag magdanun anggan sfafun sis fa-21k menit. Oni tinafay at yud e famadaul. 19Fituk menit nu si aba, lag e famadaul tinafay sa ay bale. Ay nus nga sinu at takon ka fag tinafay at ke famadaul, dewa taw Israel ay yud, kanya wa katap te, taw Israel. 20Lag am kon ka fag tinafay at ke famadaul ginanya fag ngay menit, nus nganday nu gbanwan am.”
21Ay Muisis nafaful talun Israel tagmagurang fagayu ay nalong te, “Foyungi sas fagayu talanan sanya te, buli sik tupa ay ate kambing ay fatei, kanya sik fagmafulun sa baliwas Tagfabarita nu Glangfe. 22Tagai at taguk sa sik taya. Ay buli sik ngay sanga tanum isopo ay fasurungi sas wa taguk, ay rarusi sis tungud sakbawan ay sis turuk sakbawan. Ay lag e glaklo ginanya siginan at basad bale anggan ummenit. 23Anway Yawi dumalan sas talun Iptu laman nanfate taw Iptu at ngay turungana fag ama. Ay roro Yawi nu nalag tuwa sik taguk, lumangfe wan ay wa gfasakbo tagfate sa ay ngay bale laman nanfate. 24Faningi tuwa ka fag suguwan faggugat ban anggan sa ay ngay sugfun taw. 25Nu si wa ban am Yawi at nafatuyan sa ayu fag daga, fatunglusi tuwa ka fag fagbulun. 26Ay ay ngay unga nu ginto ayu te, ‘Taw katanya ay fagbulun at masuwad?’ 27Balusi te: ‘Kanya sik fagmafulun sa baliwas Tagfabarita nu Glangfe, anway Yawi nalangfe tuwa taw Israel at ngay bale gina gfate taw Iptu.’ ”
Ay Muisis nu ntabu wan nu glong, taw Israel namalub gseg sas Yawi. 28Ay nafaning Yawi at suguwan at nalong sas Muisis ay Arun.
29Ay swa bilug yabi, Yawi nafate fagayu taw Iptu at ngay turungana fag ama, siginans talun Iptu at fun at turungana tagtubus ban anya at fun, anggan at masungsungan unga fag ngay turungana. Ay Yawi nafate yangay at ngay balan at turungana. 30Ginanya fag yabi, talun Iptu at fun, ay anggan at ngay fun sirut, ay fagayu taw Iptu infulo wan, ay mason nu gfanguywayan, teway fagayu bale e matean wan.
31Ay ginanya yay fag yabi, talun Iptu at fun nafatsanya Muisis ay Arun ay nalong te, “Katsi, ayayui wan ste ginan. Loi wan, fagayu am. Segi ay Yawi kata ay fagetun. 32Ay tabani yangay ay ngay balan kata ay fagetun, ay loi wan. Roro darangini yap angku, laman ay Diyus mamanyun angku.”
33Taw Iptu nafafali wan nu gayan taw Israel, anway gamatangan te, “Mankate ro fagayu tam.” 34Ay nu katanya, taw Israel nauba wan at ngay tinafay at yud e famadaul ay at yud matama siginans fagsuwadan. Ay nasifig sat ngay balukas ay nafasanan. 35Ay taw Israel nafaning Muisis at suguwan at nalong te, “Eti siginans taw Iptu at ngay famasinean at fangawat pilak ay gintu, ay ngay balukas.” 36Ay Yawi nafaamatanganan sa sangay taw Iptu laman malukme sa sangay taw Israel. Ay nafon at ngay fagetun. Katanya taw Israel nu gbul taw Iptu at fagmabalanun.
37Ay taw Israel nalo wan siginans fulan Rameses nangadasug sas fulan Sukut. At kayuwan at nalo at ngay mangama yadi 600,000, ya natap at ngay mangena ay at ngay sisiyan. 38Ngayu yangay taw siginan tibak talun at naalo ay ngayu yangay at ngay balan at nataban. 39Ay intuwas yay nu glo teway anyay nanfangon, nafatama at tinafay at yud e famadaul siginans talun Iptu. Ay wa nafagamut famadaul tinafay teway taw Iptu naayan anya mafali ay we nafamasadan at fakonun.
40Ay taw Israel nu gbanwan sas talun Iptu 430k banwa nu si aba. 41Ay sis 430k banwa taguyan fag menit, Yawi at ngay taw fagayu nalo wan siginans talun Iptu. 42Ginanya fag yabi, taw Israel nu glo siginans talun Iptu, Yawi gufud anya fagngabak yabi ay wa gtiyug.
Nu katanya, kayu banwa taguyan fag yabi, taw Israel wa ban gtiyug nanfauseganan sas Yawi. Ay kanya fagayu nanfagbulun ban katanya anggan sat fadogan fag ngay sugfun taw.
Fagmafulun sa baliwas Tagfabarita nu Glangfe
43Yawi nalong sas Muisis ay sas Arun te, “Katatuy at ngay suguwan sa baliwas Tagfabarita nu Glangfe fag fagmafulun: At ngay taw siginan tibak talun wa masine nu kon ginanya at nafamasadan fag ngay fakonun. 44Ay at nasali fag ngay fanuguwan nu matulian tuwa masine tuwa nu kon ginanya fag fagmafulun, 45ay roro wa masine nu kon at ngay fagsaliun fag fanuguwan ay anggan ngay taw siginan tibak talun. 46Nu kon am si yakman ay basad bale; lag guba ka fag karni sas day bale, ay lag am gfud at butul. 47Fagayu fulan taw Israel amatangani kanya.
48“Nu e taw siginan tibak talun gbanwan maful ayu ay kaumsig yangay nangaful gina am e fagmafulun sa baliwas Tagfabarita nu Glangfe ay nanfauseganan sas Yawi, masine at ngay mangama matulian tuwa. Ay masine wa long nu gfasfuwan ayu kanya kata yangay sik taw Israel. Ay roro wa masine gfasfuwan nu dway matulian. 49Kata way at sadi at suguwan sa sangay taw Israel ay sa sangay taw siginan tibak talun tagbanwan si ayu.”
50Ay fagayu taw Israel nafaning wa fiya Yawi at suguwan at nalong sas Muisis ay Arun. 51Ay ginanya fag menit, Yawi nu gfalfas fagayu taw Israel siginans talun Iptu.
Currently Selected:
Nu Galin 12: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
