Nu Galin 13

Foni wa Angku Fagayu at ngay Mangama at Turungana

1Yawi nalong sas Muisis te, 2“Fagayu taw Israel at turungana fag ama ay anggan fagayu balan at taguna at riyangan foni wa angku. Angku way kanya.” 3Ay Muisis nalong sa sangay taw te, “Amatangani tuwa ban tuy fag menit, ebi gina am kalfas siginans talun Iptu, sanya nu gafanuguwanan am. Anway Yawi at fagmadaragangun at nafalfas ayu sanya ginan fag talun. Lag am kon tinafay at ke famadaul. 4Amatangani tuwa ban tuy fag menit, sis Abib fag magdanun, ebi gina am kalfas siginans talun Iptu. 5Ka fag menit ay fagamatanganun ban Yawi nu gtaban ayu sa sangay taw Kanaan, taw Kit, taw Amur, taw Kib, ay taw Yebus fag talun. Kanya fag talun ebi at nafatuyanan sa ay aguyangan te, gfon wa sa ayu. Sik tagfangatugbung fag daga#13:5 tagfangatugbung fag daga: Sis Fangebriyu, daga kalimus susu bilug ay deut. sanya. 6Kadugenya fag fituk menit ay fakonun tinafay yakman at yud e famadaul. Ay sis fafituk menit mafuli ay fauseganani sas Yawi. 7Ay ay fakonun tinafay yakman at yud e famadaul ginanya fag fituk menit. Ay lag e famadaul tinafay nus di sirut si ay talun. 8Ay gina am maful nanguseganan sas Yawi foyungi ay ngay unga te, ‘Guseganan ami sas Yawi teway nafalfas emi siginans talun Iptu.’ 9Kanya kata wa sik rirukan si ay daluwap ay ate si ay angas tagfaamatangan ayu te, foyungi sa ay ngay iba Yawi at suguwan, teway kanya nafalfas ayu siginans talun Iptu anway sat fagmadaragangun. 10Ay nu katanya, amatangani tuwa gugat kayu banwa ginanya fag menit.

11“Ay Yawi nu nataban wa ayu sas taw Kanaan at talun, at nafatuyanan at fagafonun sa ay ngay aguyangan ay sa ayu fagayu, 12foni wa sas Yawi ay turungana fag ama fagayu ay anggan fagayu balan at taguna at riyangan, teway kanya anya wadi. 13Nu sik asnu ay fon sas Yawi, fabangsii sik tupa. Ay roro nu dway am e famabangsi fatei wan ka fag asnu, fudi at liyug. Ay masine yangay nu gfabangsi am anggan ay ngay turungana fag ama. 14Ay ay ngay unga ban nu e fagintoun sa ayu te, ‘Taw at masuwad kanya?’ Balusi te, ‘Yawi at fagmadaragangun nafalfas emi siginans talun Iptu, em fagafanuguwanan fag talun. 15Ay gina talun Iptu at fun yud gfalo emi, Yawi nafate wan sis talun Iptu ngay turungana fag ama fagayu ay anggan balan at turungana. Katanya wan em faganyunun sas Yawi em ngay balan at turungana ay em fagfabangsiun em ngay turungana fag ama.’ 16Kanya kata wa sik rirukan si ay daluwap ay ate si ay angas tagfaamatangan ayu te, Yawi nafalfas ayu siginans talun Iptu anway sat fagmadaragangun.”

Taw Israel nu Gdife sas Dagat Maraska

17Ay talun Iptu at fun nu nafalfas wa taw Israel, Diyus wa nafadalan tagsas taw Filistiyu fag talun dewa te, sanya at makbang at dalan. Anway Diyus nalong te, “Taw Israel nu nalag way at ngay fabarangyan labon umsaman at amatanganan ay umfoli yay sas talun Iptu.” 18Nu katanya, Diyus nataban sat ngayayu fag dalan sas talun at yud e taw ay nangadasug sas Dagat Maraska. Ay taw Israel nu nalfas wan siginans talun Iptu mafamasadan tuwa nanfabarangyan. 19Ay Muisis naubanan Use at ngay butul, teway ebi Use nafatvngvd nu glong sa sangay taw Israel te, “Matuyan Diyus gfalfas wa fiya ayu. Nu katanya, ubai tuwa ban ku ngay butul gina ban am glo ste ginans talun Iptu.”

20Ay kanya nu nalo wan siginans fulan Sukut, inful sis fulan Etam, sas fungfung talun at yud e taw. 21Nu swa menit, Yawi fantaban taw Israel kata sik turuk linyabu, ay nu sad yabi tagtaban at ngay taw kata sik turuk afuy ay sanya ginan wan tagdamlag, laman gtunglusanan tuwa nu glo dewa swa menit ay sad yabi. 22Kanya fag turuk linyabu tagtaban gina swa menit ay kanya fag turuk afuy tagtaban gina sad yabi.

Currently Selected:

Nu Galin 13: TAWEAST

Highlight

Copy

Compare