Nu Galin 11

Yawi Gafateun ngay Mangama Turungana sis Talun Iptu

1Ay Yawi nalong sas Muisis te, “Gfadasug kyay sadi yak faurianan sas talun Iptu at fun ay sas fagdaul talun Iptu. Ay nu nlangfe ka fag faurianan, gfalo wa long ayu. Ay ka fag fun mayan wa ayu anway kaumsig nu lumo am mafali. 2Muisis, longi sa sangay taw Israel, dewa mangama ay mangena te, ‘Fagayu am, eti siginan ay ngay fasabale taw Iptu at ngay famasinean at fangawat pilak ay gintu.’ ” 3(Ay Yawi nafaamatanganan sa sangay taw Iptu laman malukme sa sangay taw Israel. Ay talun Iptu at fun ngay fun sirut ay at ngay taw malukme tuwa sas Muisis.)

4Nu katanya, Muisis nalong sas talun Iptu at fun te, “Katatuy Yawi at longan: ‘Dumalan aw sas talun Iptu katsi ro sis wabilug yabi. 5Ay mangatean wan at ngay mangama turungana sis talun Iptu, siginans talun Iptu at fun at turungana tagtubus ban anya at fun, anggan tiba daga fag fanuguwan fag mangena at turungana. Umkate wan fagayu anggan at ngay balan at turungana. 6Ay umdungug at mason fag ngay uyway sas fagdaul talun Iptu. Ya batang kadungug katanya ebi ataw. Ay wa ban umdungug katanya katsi ban. 7Ay roro sa sangay taw Israel manabayan tuwa. Nus di idu gsubang we dungganan tagaringang.’ Nu katanya, sumaful am te, Yawi nafasaman taw Israel ay taw Iptu. 8Fagayu am fun sirut umkakbang angku ay umlub ay lumong te, ‘Loi wan ay tabani fagayu am ngay taw tagalo emu!’ Ay sanya ginan lumo akwan.” Ay Muisis kadotama dawdaw ay nalo wan siginans talun Iptu at fun at akbang.

9Ebi, Yawi nalong sas Muisis te, “Talun Iptu at fun wa ban gdungugan emu, laman ban ngayu yay ku fagbulun at madulawan sas talun Iptu.” 10Ay Muisis ay Arun nafagbulun ka fag ngay madulawan sas talun Iptu at fun daga salubangan, dewa katanya, Yawi nafafaning way gugat at fun at fasadan, ay wa nafalo taw Israel siginan at talun.

Currently Selected:

Nu Galin 11: TAWEAST

Highlight

Copy

Compare