Efesu 3

Isus Nasugu Pablu sa at Yud Udyu fag ngay Taw

1Aw Pablu. Ku faginsungsungun teway igfaning aw sa tam Fun Isus ay igfoyung aw sa ayu, at yud Udyu fag ngay taw. 2Nadungug wam fiya te, Diyus e nafamanyun sa angku, ay fagnasuguun angku laman umke fanambagun yangay ban am. 3Diyus nafasure wa sa angku ebi at masuksukan fag foyungan sa ayu, at yud Udyu fag ngay taw, kata ku nariruk sa ayu aro. 4Nu natap wam ku rirukan, sumaful yangay am te, katanya aw nu nasaful aw at masuksukan fag foyungan sa baliwa tam Fun Isus. 5Ebi Diyus ya batang nafasure at masuksukan fag foyungan sa ebi fag ngay taw. Ay roro katsi siginan at Masine fag Falad Diyus nafasure wa sa at ngay Nasugu ay sa at ngay taglong. 6Ka fag masuksukan fag foyungan at masuwad te: at yud Udyu gafanud yangay ban sat Masine fag Barita, ay mul yangay Diyus at fagafonun gasfuwan taw Udyu. Kanya fag duwak fulan taw insadi sa sik bilug, ay kanya fagayu mul ban Diyus at ngay fatuyanan teway insadi sa tam Fun Isus.

7Anway sas Diyus at nafamanyun ay sa at fagmadaragangun, kanya nafili angku laman sik tagfoyung at Masine fag Barita. 8Dewa aw Diyus at taw at tiba daga, Diyus nafili tuwa angku laman nanfoyung aw at Masine fag Barita sa at yud Udyu fag ngay taw, sa baliwa tam Fun Isus at fagmabalanun at yud e gfasud, 9ay nanfayamag aw sas fagayu taw laman sumaful tuwa Diyus at masuksukan fag foyungan. Diyus, at naawat fagayu nus nge wain, ya batang nafoyung ka fag masuksukan fag foyungan siginan ngay ebi taguna. 10Fakatanyaun, laman fagayu tagafanud katsi, gfasaful sa sangay fun ay sa sangay fagmagurangan sas banwa sa baliwas Diyus at fagsafulun sa tiba tibak balyavtan. 11Takatanya fag ngay fagbulun gfaning Diyus at fasadan siginan ngay ebi taguna, anway sa tam Fun Isus at nafagbulun. 12Mafaakbang tuwa tam sas Diyus e fagafanudun ay e fagmanabayanun, teway gafanud tuwa tam sa tam Fun Isus ay masadi tuwa tam sa anya. 13Nu katanya, katsi glong aw ayu te, lag kalukme sa ay amatanganan dewa e gfauri angku. Ku fakatanyaun anway te, laman e fanambagun yangay ban am.

Pablu Gdog yay Gdarangin sas Taw Efesu

14Nu gamatanganan aw tam Tama at fasadan, gtudan aw gseg sa anya. 15Kanya wan at Tama fagayu tagsis banwa ay tagste swa daga, ay kanya igsaful tuwa fagayu at ngayan. 16Tam Tama madaragang tuwa. Nu katanya, gdarangin aw sa anya te, at Masine fag Falad mon ayu at fagmadaragangun laman umtvngvd ay amatanganan. 17Ay laman tam Fun Isus tagfaamatanganan ayu anway gafanud wam sa anya. Ay gdarangin kyangay te, ay fakafanyuun tagfatvngvd ayu sat masine fag fagbulun, kata sik kayu at lalid nu nafatvngvd at familugan. 18Ay laman am ay anggan Diyus at taw fagayu sumaful tuwam fiya fiya te, go sedaul, ay go seaba, ay go seabat, ay go seabasad at fakafanyuun. 19Ay laman sumaful tuwam tam Fun Isus at yud e mangasaful fag fakafanyuun sa ayu, laman fagdaul ay amatanganan gfaning tuwa Diyus at ugali.

20Gseg watam tam Diyus, anway at fagmafabulun glabi yay nus nge wain fagayu tam fagetun ay fagayu tam fasadan, anway at fagmadaragangun si wa antam. 21Fagayu tam tagafanud at maful sa tam Fun Isus, gseg wa tam tam Diyus fagayu menit, ay faggugat faggugat. Kin. Katanyai tuwa.

Currently Selected:

Efesu 3: TAWEAST

Highlight

Copy

Compare