1 Tesalunika 1

Pablu Longan at Famasigad at Rirukan

1Tuy fag rirukan siginan emi fag tulu, Pablu, Silas ay Timutiyu.

Em fagfadasugan tuy fag rirukan, sa em ngay fadugsay sas fulan Tesalunika. E fagalongun ami sas fagayu taw Tesalunika tagafanud sa tam Tama sis banwa ay sa tam Fun Isus, tam Fagsegan.

Em ngay fadugsay, igdarangin ami te, laman Diyus falag tuwa nu kafanyu ayu, ay fanabayan tuwa ayu.

Pablu at Fagusegananun Ayuwayu sas Taw Tesalunika

2-3Guseganan ami dawdaw tibak taw at foyungan emi sa ayu baliwa fagayu. Guseganan ami te, igfagbulun tuwam masine, teway gafanud am sa tam Diyus. Ay guseganan yangay ami te, igtarabang tuwam tibak taw, teway kafanyu tuwam. Ay guseganan yangay ami te, di am igfangafoliun, teway gurunganan tuwam gfanseg te, tam Fun Isus gdog yay ban kafoli stiye. Kayu ginan ami namatangan sanya baliwa fag ngay mauseganan, guseganan ami sa tam Diyus. Ay kayu ginan ami gdarangin, igdarangin ami ayu, ay igfoyung ami sas Diyus em fagusegananun sa ayu baliwa.

4Ay at sadi ya em fagusegananun, em ngay fadugsay, nasaful ami te, tam Diyus kesug dawdaw ayu, ay nafili yangay ayu laman at ngay taw. 5Ay at fakalagan te Diyus nafili wa fiya ayu, madyay at Masine fag Falad natarabang tuwa emi laman fafadasug ami Diyus at foyungan sa ayu. Teway gina ami igfoyung ayu at Masine fag Barita, bundi ami fagtvngvd tagelongan. Masine fag Falad tuwa tagfon emi em fagsafulun. Ay nu katanya, di ami naduwanun, te wa siring gtungul em foyungan, teway at Masine fag Falad wan tagfabitsug em amatanganan.

Em ngay fadugsay, nasaful wa ro am te, Masine fag Falad tuwa tagfaamatanganan emi gina ami sanya si ayu, teway nalag wam si em ngay fagbulun te kafanyu tuwami ayu.

6Em ngay fadugsay, ebi, gina ami nafoyung ayu Diyus longan, gafanud tuwam, ay nauseganan am dawdaw. Dewa te, sanya si ay fulan tibak taw igfatakan way dawdaw ayu, wa kaumsig nu gafanud am sa tam Isus, nauseganan yay am, teway at Masine fag Falad tuwa tagfaamatanganan ayu. Nu katanya, kata am emi, nabaris am kata em nabaris. Ay kata yangay am tam Fun Isus, teway kanya sigon nabaris tuwa ebi gina e gfatakan anya. Ay katanya ay nafagbulun, sik fakasafulan yangay, te Diyus nafili wa fiya ayu.

7Ay at ngay tagafanud sas Isus tagbanwan sa ay ngaba dayu nasaful wa te, dewa e gfauri ayu, matvngvd tuwa nu gafanud am sa tam Isus. Sanyas talun Masidunya, nasaful wan fagayu tagafanud sanya. Ay ste sigons talun Akaya, nasaful yangay. Ay nu katanya, ste fag duwak talun at ngay tagafanud sa tam Isus kaumsig wa nanfamaning ayu.

8Em ngay fadugsay, at sadi ya em fagusegananun, am wan katsi tagfoyung Diyus longan sa sangay taw. Nu katanya, sanya sis talun Masidunya ay anggan istes talun Akaya, ngayu wa dawdaw fag taw at nadungug te, gafanud wam sa tam Isus. Ay bundi fagtvngvd sanya fag duwak talun. Nus nganday wa bangan fag ngay taw nadungug wa te, taw Tesalunika gafanud wa sa tam Isus, madyay igdungug wami at ngay sulitanan. Deyud ami e nafamansulit sa sangay taw, kanya wan takamansulit at dungganan sa ayu baliwa.

9At ngay taw kamansulit emi te, “Katanya ngaro taw Tesalunika nafagbulun gina am sanya.” Kamansulit te, intuwas wan nu gseg am sa ebi ay ngay fagsegan. Katsi unu, nu gseg am, sa was Diyus. Ay itam fag ngay tagseg sas Diyus, igsaful watam te, kanya wan at matuyan fag Diyus ay tagleleg fag Diyus. 10Ay nadungug yangay ami at ngay taw ayuwayu nu kamansulit te, katsi mafanyan wam tam Diyus at Baguwama nu kadasug siginans banwa. Kanya wan tam Isus. Ay nasaful watam te, kanya tam Isus ebi dewa nkate, tam Diyus nafaleleg yay. Ay kanya wan tagfalangfe antam laman di ban tam kafaurianan gasfuwan Diyus nalimatan fag ngay taw.

Currently Selected:

1 Tesalunika 1: TAWEAST

Highlight

Copy

Compare