Amus 8
8
Amus Nalag sik Sabi e Suwadan sik ngay Buwadan Malesan
1Katatuy Fun Yawi at nafalag angku: E nalag aw sik sabi e suwadan sik ngay buwadan malesan. 2Yawi nainto angku te, “Amus, taw am nalag?” Ay nabalus aw te, “Sik sabi e suwadan sik ngay buwadan malesan.” Ay Yawi nalong angku te, “Indasug wan ku taw Israel at fakatabuwan. Kwa mfanyu ku taw Israel. 3Ginanya ban fag menit, at mauseganan fag ngay danyu si ku bale mabalu way ban, anway ngayu wa ban at ngay matean nus nganday. Ay we maringang. Aw wan Fun Yawi tagelongan.”
Sik Faurianan sa sangay Tagfatakan sat Yud E Kwa
4Dungugani, am fag ngay tagfatakan at ngay yud e kwa ay tagfate ka fag ngay taw. 5Kanbang wam dawdaw nu katabu at fagmafulun gina Magdanun Bagu Kasure ay gina Fakamatoun fag Menit laman nanfabili wam ay ngay bantuyan#8:5 bantuyan: Sis Faniganun, butil. ay nanfanluk sa sangay tagbili nu an am igtas ay igfasud. 6Kanbang wam dawdaw nanfabili ay ngay bantuyan at yud mafasaman at mafis, ay nanbili am at yud e kwa laman sik fanuguwan teway wa mafasali at bedan, dewa te at bedan sik sinilas way. 7Nu katanya, Yawi, Akub at kadagdagan at nafa Tiba Tungud fag Diyus, nafatvngvd at longan te, “Dakwa kalyam fagayu ay nafagbulun mauri. 8Katanya wayay, gfauwigan aw ay daga ay manguywayan wam. Ay ay daga muwigan dawdaw, kata Safa Nilu sis talun Iptu nu kadaul ay nu kasirut. 9Gina ban aw gfaurianan ayu fag menit, gfaarum aw sas fagdaul daga dewa swa bilug menit. Ay nu katanya, dewa mamenit marum way. Aw wan Fun Yawi tagelongan. 10Sa ay fagmafulan fangkabat am guseganan, gfanguywayan way am. Ay ay ngay danyu fangkabat guseganan fakabaluun way. Ay gfabalukasan aw ayu saku ay sumugu aw te, lanui ay alfuyu sik famasaful te, kabalu am, kata sik daduwa nu guyway gina at unga fag sadi nkate. Ay roro taguyan fag faurianan glabi yay fiya fiya nu kasait.”
11Ay Fun Yawi nalong yay te, “Umdasug ban sik menit gfadasug aw fanlunus sa ay talun. Ay roro bunwa fanlunus sis bilug, antuwa kaumsig tuwam nandungugan Diyus at longan. 12Kalufuy wam dawdaw sak ginranugan laman nansarap sik tagfoyung ayu ku longan, ay roro duwam lumag nus nganday nu lumo am. 13Gina ban aw gfaurianan ayu fag menit, dewa ay ngay baguyna at masine ay ay ngay baguwama wa gamatang teway kadanum. 14Am at nafatvngvd ay longan sa ay ngay tawtawan sas Samarya, sas Dan, ay sas Beerseba fag ngay fulan, mamin wan ay wa ban gdog kafoli kata ebi ataw.”
Currently Selected:
Amus 8: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
