Amus 7
7
Amus Nalag sik ngay Liyung, ay Afuy, ay Famatagbung
1Katatuy tam Fun Yawi at nafalag angku: Nalag aw nu gfaful sik ngay liyung ayuwayu ginanya bagu ntabu nu gfon si at fun fag afud siginan taguna fag ani ay nu gfasigad at faduwak ani. 2Nalag aw ka fag ngay liyung nu kon at ngay tanuman ay we sawad. Ay nalong aw te, “Fun Yawi, get aw emu te, falyami Akub at kadagdagan at asalanan. Setain ro nu mabanwan nu magbulun way o katanya? Teway kanya malukme way.” 3Nu katanya, Yawi nafabali yay at amatanganan ay nalong te, “Kin, wa ban umgurungan kata am nalag.”
4Ay tam Fun Yawi e nafalag yay fiya angku: Nalag aw nu kamasadan laman nanfauri taw Israel sa sik afuy. Ka fag afuy nafatat wan at fakabulan safa siginan sad daga, ay nalabe wan talun Israel. 5Ay nalong aw te, “Fun Yawi, get aw emu te, lag yap gfagbulun katanya. Setain ro Akub at kadagdagan nu mabanwan nu magbulun way o katanya? Teway kanya malukme way.” 6Nu katanya, Yawi nafabali yay at amatanganan ay nalong te, “Kin, wa ban umgurungan kata am nalag.”
7Ay tam Fun Diyus e nafalag yay fiya angku: Nalag aw tam Fun Diyus nu malindug sis alad e bitbitan sik famatagbung laman sumaful te, go maslung wan at alad. 8Ay Yawi nainto angku te, “Amus, taw am nalag?” Ay nabalus aw te, “Sik famatagbung.” Ay kanya nalong angku te, “Simagngay ku fansukat, wa masine ku taw Israel at leleganan. Nu katanya, katsi kwa mfanyu ku taw Israel. 9Ay rumasras kwan taw Israel, Isaak at kadagdagan, at ngay fagnansegan fag muyud. Sumugu aw taw Israel at ngay fabarangyan laman nanfabarangyan fun Yerubuam at fagmagurangan.”
Amus ay Amasiya
10Amasiya sik taganyun sis fulan Betel. Kanya nafadasug sik longan sas Yerubuam, talun Israel at fun. Nalong te, “Amus e fasadanan mauri sa emu baliwa ste fiya fiya sis talun Israel. Ngay taw wa gadunguganun at ngay elongan. 11Teway katatuy Amus at longan te, ‘Yerubuam umkate wa gina e fabarangyan, ay e fabulun wa ban fiya tumaban taw Israel sa tibak talun.’ ”
12Amasiya nalong sas Amus te, “O fag taglong, loi wan ste ginan ay afolii wa sas talun Uda. Sanyai wan nu gfagbulun o ay nu gbul am natvngvdan sik taglong. 13Lag o gfoyung Diyus at longan stiye sis Betel, anway ste wan at fun fagnansegan fag bale laman sat fagdaul fagmagurangan.” 14Ay Amus nabalus Amasiya te, “Ebi bunakwa sik taglong ay bunakwa ngap sik tagfaning sik taglong. Anakway sik tagfatvngvdun ngay tupa ay ngay kayu sikumuru. 15Ay roro Yawi nalong angku te, ‘Ubuni wan am fagbulun nu gtanud tupa ay foyungi ku longan sa ku ngay taw Israel.’ 16-17Dewa o nasalag angku, lag gfoyung Diyus at longan sa sangay taw Israel, at masuwad te, Isaak at kadagdagan, dungugani Yawi at longan sa emu baliwa: ‘Am mangena umsik tagfabili at bilug sas fulan ay am ngay unga umkate sis fagfabarangyanan. Ay am ngay fabarangyan mafudan wan am daga. Ay o, umkate wo sa tibak talun. Ay e fabulun tumaban wa ban fiya taw Israel sa tibak talun.’ ”
Currently Selected:
Amus 7: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
