Amus 5
5
Sik Longan sa baliwa nu Gubun Asalanan
1Am fag ngay taw Israel, dungugani tuy at mafabaluwanan fag danyu sa ayu baliwa:
2Israel kata sik baguyna at yud batang e natsa anya. Kanya nagfu ay wa maalindug.
Nafabayan wa anya nu mafulidan si at daga mandi ay we gtarabang anya gfalindug.
3Nu katanya, Fun Yawi nalong te, “Sik fulan sis Israel nu nasugu sik libuk sundalu sik sandan way at sawad. Ay nu nasugu sik sandank sundalu safulu way at sawad. 4Nu katanya, am, taw Israel, akbangi angku ay gleleg tuwa ban am. 5Lag am glo sas Betel, Gilgal, ay Beerseba fag ngay fulan laman nanseg sanya. Matuyan wa fiya te, taw Gilgal e tumaban wan ay taw Betel malyam wan. 6Am, Use at kadagdagan, akbangi angku ay gleleg tuwa ban am. Nu kauri way am, gfamin kwa ban ayu kata sik afuy nu gbatas. Nu katanya, malyam wan Betel ay we mafasalag. 7Sek am! At matuyan ay at masine fag fagbulun sa tam iba wam nafe fanambagun, kata way am sik tanum marinu!”
8Ay Diyus wan at naawat sik ngay fulan galeme at ngayan Pleyadis ay Uriun. Diyus tagfaungbusan mayamag ay marum, ay menit ay yabi. Ay nafasungo dagat sa sangay linyabu ay nafamoyan sas daga. At ngayan, Yawi. 9Kanya mafali way nu grufa dewa sik fulan matvngvd nu maaladan.
10Am, taw Israel, kadotama way am sas tagfoyung at matuyan ay taglong at mafanud sis fagfasinean fanlonganan. 11Gfalingun way am at yud e kwa ay gfabulun way am get laman mon ayu at ngay nabul siginan at ngay daga. Nu katanya way am, wam maabanwan sa ay naawat fag bale daul, ay wam minum wat ubas safa siginan ay ngay tanuman wat ubas. 12Gsaful kway#5:12 kway: ate, Diyus. at kayuwan ay ngay asalanan. Ay gfalingun way am at yud e asalanan ay gbul at ngay singku. Wa matuyan nu an am gbukngan sat yud e kwa sis fagfasinean fanlonganan. 13Anway katsi fagmauriun wan taglabi, at ke fagsafulun maragangan way. 14Ay fagbuluni tuwa sat masine ay lagi sat mauri, laman gleleg tuwam. Ay Yawi, at Madaragang fag Diyus, gufud tuwa ayu kata at longan. 15Saruyi at mauri ay fagbuluni sat masine, ay longi at matuyan sis fagfasinean fanlonganan. Nu katanya tuwa, labon manga Yawi, at Madaragang fag Diyus, umfanyu yay ayu, Use at kadagdagan at sawad.
16Nu katanya, katatuy Yawi at Madaragang fag Diyus at longan: “Umdasug ban sik menit dumungug am tagfanguywayan sa sangaba dalan ay sa sangay sagbatan. Ay sugui ngay tagfantanuman te, uywayi sat ngay kinkate fasfuwani at nasali fag fulan taw taguyway sat ngay kinkate. 17Ay dumungug yangay am tagfanguywayan sa sangaba tanuman wat ubas. Umgurungan wa fiya katanya teway gfaurianan aw ayu. Aw wan Yawi tagelongan.”
Diyus nu Gfaurianan fag Menit
18E faurianan sa ayu, am tagfanya Yawi at menit. Lag am gamatangan te, ginanya fag menit nu mlangfe am, teway ginanya wan nu gfaurianan ayu. 19Kata way am sik taw tagamatangan te, “Inlangfe kwan madyay inlagyu akwan siginans liyun, ay roro nafablang kwa daw sik usu.”#5:19 usu: kata sik idu daul. Ay gamatangan yangay te, “Inlangfe kwan madyay si kwa sad bale, ay roro gina nasanganan sas dingding sik ubyanun nasangdu wa daw ku daluwap.” 20Matuyan, umdasug wa ban fiya Yawi at menit nu nanfauri, bunwa nanfalangfe; kata sik marum at yud gyamag nus di sirut.
Yawi at Fakaumsigun
21“Kalimata kway ay ngay fagmafulun; dakwa guseganan katanya. 22Katanya wayay, dewa am muba sa angku nus nge wain fag anyun, dewa ay nafataba fag balan, kwa kaumsig. 23Atuwasi wan nu garingang am gfandanyuwan. Kwa kaumsig gdungug nu gfaawang am ay ngay famaawangan at ke ngay bakyang. 24Ay roro lag am katuwas nu gfagbulun am at matuyan ay at masine sa ay ngay iba, kata sik safa nu kalimus gtunglusanan.
25“Am fag ngay taw Israel, ay ngay aguyangan ebi gina 40k banwa sis talun at yud e taw, go naanyun tuwa sa angku? Yaya! 26Ay katsi gubananan yay am ay fagsegan at ngayan Sakut ay nafakata am ay fun, ay anggan Kiyun, ay fagsegan fag galeme. Ay naawat am ka fag duwak fagsegan ay fagnansegan. 27Nu katanya, e fabulun wa ban ayu tumaban glabi yay kayayu sas fulan Damasku.” Katanya Yawi at longan, at ngayan te, Madaragang fag Diyus.
Currently Selected:
Amus 5: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
