Amus 4
4
1Am fag ngay mangena takadungug sis fulan Samarya, kata way am sik ngay baka sas fulan Basan at nafatvngvdun fiya fiya. Gfatakan way am ay gfalingun at ngay yud e kwa. Ay gsugu yay am ay ngay mangama te, “Buli yap wat ubas safa ay nanginum watam.” Nu katanya dungugani, 2Fun Yawi nalong te: “Malayun aw sat masine! Gfatvngvd aw ku longan te, umdasug ban sik menit ay ngay fabarangyan tumaban wa ayu ay gumuyudan kata sik uyang kinfangbis. 3Ay nu gfalfas ayu siginan ay fulan sa way sangay sulat alad fakarufaan, ay tumaban wa ayu sas Armun fag talun. Aw wan Yawi tagelongan.
4“Am fag ngay taw Israel, loi wan sa ay fagnansegan sas fulan Betel ay sas fulan Gilgal ay faugati yap ay ngay asalanan. Ay ubai ay ngay anyun kayu balabag ay ubai yangay ay ngay fasafuluwan si sangay fatuluk menit. 5Ay batasi sik tinafay at ke famadaul sik famauseganan fag anyun sa angku. Kin wan, nanfandaragangi wa katanya anggan ay nafasadanan fag anyun, teway katanya wan ay naumsigan dawdaw. Aw wan Fun Yawi tagelongan.
6“Dewa aw nafe fanlunus sas fagayu ay fulan, yam gugat kafoli sa angku. Aw wan Yawi tagelongan.
7“Ay kwa nafe moyan tuluk magdanun yap ngay umdasug famulan. Nafe moyan aw sa tibak fulan ay sa tiba yaya. Ay nafe moyan aw sa tibak lungud talun ay sa tibak lungud daga in-gong wan. 8Dewa am ginranugan glo sa sangay fulan nansarap safa laman ay fanginum, wa kasakan ay nabul. Ay dewa katanya yam gugat kafoli sa angku. Aw wan Yawi tagelongan.
9“Ngayu ginan kwan gfafanggalutan ay ngay tanum siginan sik tagmara masugba ay sik ngay dafang. Ay ay ngay kayu igus ay ulibu liyung narabrab wan. Ay roro yam gugat kafoli sa angku. Aw wan Yawi tagelongan.
10“Ay nafadasug kwa sa ayu sik ngay faurianan kata ebi ku nafadasug sas talun Iptu. Nafate kwan ay ngay baguwama sas fagbarangyanan ay nafataban akyangay ay ngay kabayu sas tibak talun. Ay nafatakan akyangay ayu sas wa baruwas at ngay kinkate si ay fagmafulan. Ay roro yam gugat kafoli sa angku. Aw wan Yawi tagelongan.
11“Nafate kwan ay iba kata ebi ku nafagbulun sas Suduma ay sas Gumura. Ay ay iba at kinlangfe kata sik famaigang at nabul siginan sad afuy. Ay roro yam gugat kafoli sa angku. Aw wan Yawi tagelongan.
12“Nu katanya, taw Israel nanfadasug akyangay sa ayu ka fag ngay faurianan. Ani tuwa famasadani nu gsalubang am sa angku ay Diyus.”
13Ay Diyus wan at naawat ngay muyud ay tagmara, ay kanya yangay tagfamenit ay tagfayabi. Ay gfoyung tuwa sa sangay taw at fasadanan ay gmagurang sas fagdaul daga. At ngayan, Yawi, at Madaragang fag Diyus.
Currently Selected:
Amus 4: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
