Amus 3
3
1“Am fag ngay taw Israel, Yawi nafalfas ay ngay aguyangan siginans talun Iptu, dungugani at fagalongunun ayu: 2Sas fagayu talun sas fagdaul daga, am way ku nafili laman ku ngay taw. Nu katanya, nanfaurianan aw ayu teway sa ay asalanan ayuwayu.”
Diyus Nafamasadan at ngay Taglong Fagbulun
3Go masine tuwa duwak taw nu gaygaluwan dewa yud gdiyuganan at amatanganan? 4Go sik liyun guni tuwa sisad magubat dewa yud e nalag at fakagatun? Ay go guni tuwa sasad luwib dewa yud e nafagamat? 5Go sik manuk tungud kagamat tuwa dewa yud e fayuk sit fangayon? Ay go sik bitik kabulsik tuwa dewa yud e nasiyad? 6Go at ngay taw wa kudkulugan kalimu kayu ginan igfatagak guyup sat fagbudyungan te, e ngay fabarangyan kadasug? Nu e faurianan indasug sa sik fulan, go bunwa Yawi at nafadasug?
7At matuyan, tam Fun Yawi ya gfagbulun nus nge wain yap ngay nafoyung sat ngay fanuguwan fag ngay taglong.
8Sinu at yud kalimu gina sik liyun guni? Ay sinu at yud moyung Fun Yawi at longan dewa Fun Yawi tagfaelongan anya?
Diyus Nafaurianan Fulan Samarya
9Longi sa sangay tagmagurang tagbanwan sis fulan Asdud#3:9 Asdud: Taglabi tibak fulan sis talun Filistiya ay gfafaskudanan fagdaul talun Filistiya. ay sis talun Iptu at matvngvd fag ngay lungud te, mafuli sa sangay bugsul sa sangaba day Samarya#3:9 Samarya: Taglabi tibak fulan sis talun Israel ay gfafaskudanan fagdaul talun Israel at fagmagurangan. ay linggati at ngay taw nu gbarangyan ay nu gfalingun at ngay iba. 10-11Teway katatuy tam Fun Yawi at longan sas fulan Samarya baliwa: “Dwa gsaful gfagbulun at matuyan. Ay at matvngvd fag ngay lungud mapnu wa nus nge wain at ngay nafamul. Nu katanya, at ngay fabarangyan nanfabarangyan wa ban ay rumasras at ngay fagmafulan. Ay mul wa ban at ngay nanuranan siginan at matvngvd fag ngay lungud.”
12Katatuy yangay Yawi at longan: “Sik tagtanud tupa at fagmafaagoun siginan sik liyun natangag fag balan labon duwak bitis way ay labon sik talinga way. Katanya yangay ban at kumdasug sa ayu taw Israel tagbanwan sis Samarya, wa ban umke sawad si ayu dasday sik afud fagtiyugan at masine.”
13Tam Fun Yawi at Madaragang fag Diyus nalong te, “Dungugani ku longan ay foyungi sas Akub at ngay kadagdagan: 14Gina ban aw nanfauri taw Israel anway sat ngay asalanan, rumasras kwan ka fag ngay fagyagoan sis fulan Betel. Ay lumifung kwan ka fag ngay sunge tagsisad suluk fagyagoan ay mangatongan wa sas daga. 15Ay rumasras kwan at ngay fagfangenbungan fag bale ay at ngay fagnanfariyosanan fag bale. Ay rumasras kyangay at ngayu nu kasali fag ngay bale. Nu katanya, ngayu ban at ngay bale at kumrasras. Aw wan Yawi tagelongan.”
Currently Selected:
Amus 3: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
