1 Timutiyu 6

Pablu at Longan sa sik Tagafanud fag Fanuguwan

1Fagayu tagafanud fag fanuguwan, falagani tuwa at masine fag fagbulun ay faningi ay fun at longan, laman tibak taw di kalimata ay di glong mauri sa tam Diyus baliwa ay anggan sa tam foyungan. 2Ay nu sik tagafanud ay fun, galangi tuwa gugat dewa am gamatangan te, kanya ku fadugsay way. Faugati yap nu ggalang am anway at ke natvngvdan sik ngay tagafanud yangay ay Diyus kesug tuwa anya.

At Yud Matuyan fag Takamoyung

Foyungi tuwa tuy fag foyungan ay longi te, faningi wa fiya. 3Nu e taw gfoyung gyud gfadiyuganan sa tam Fun Isus at matuyan fag longan, ay nu dway gfadiyuganan sa tam foyungan te, faningi tam Diyus, 4kanya fag taw gfalabi way at longan, ay we fagsafulun. Ay faggugat kanya mauri way at fasadan, madyay gfaaringangan way ay igsalag tibak taw nu gelongan. Nu katanya, kadkalimatan way at tiba, matvngvd nu gfaringangan, ay mauri way at longan sa tiba, ay gfansulup, 5ay gfabadbaboan. Kanya fag ngay taw at yud matuyan at amatanganan ay wa gsaful at matuyan fag foyungan. Ay gamatangan te, “Nu gfaning aktuwa mangaro Diyus, umkayu tuwa ku fagmabalanun.”

At Matuyan fag Takamoyung

6Ay sik taw tagfaning Diyus ay at amatanganan te, insak wan Diyus at nafon angku, ka fag taw mabalan fiya fiya. 7At matuyan, gina tam bagu ke taw ste swa daga, wa tam e ubanan. Ay gina ban tam glo ste ginan swa daga, wa ban tam e ubanan nus nge wain. 8Ay nu katanya, nu e fakonun tuwa tam ay nu e balukas tuwa tam, afanudi wan. 9Sik taw at fakaumsigun nut sa way fagmabalanun, igfaning way at amatanganan dewa sas asalanan. Ay ka fag taw kata sik taw at nasulun sa sik lulang ay inkiktan, anway kanya igfaning ngayuk fagalabianun at yud e masuwad ay igfauri anya. Takatvngvd anya fag asalanan mauri ban dawdaw ay igfadasug sas faurianan. 10Anway sik taw takesug singku, kanya wan at fagsigadan fagayu fagmauriun. Ay tibak taw at matvngvd nu gyabulun singku naubun wan at fagafanudun. Ay at banwanan e fakabaluun way gugat.

Pablu Taguyan fag Longan sas Timutiyu

11Ay o, Diyus at fanuguwan, lag gfaning takatanya fag ngay mauri. Ay maseganamai tuwa laman masine tuwa nu gfagbulun o, malayuni sat masine. Ay matvngvdi tuwa am fagafanudun sas Diyus, ay fangafanyui, ay sungatani, ay malukmei tuwa. 12Esugi am fagafanudun, laman gfabul ban o leleg at yud katabu. Katanya Diyus at fagnafiliun emu, gina o gfoyung am fagafanudun sa sangay taw.

13Sas Diyus at daga salubangan, tagfon leleg sas fagayu, ay sa tam Fun Isus at daga salubangan at nafatuyan sas Punsyu Pilatu, glong aw emu te: 14faningi fagayu ku longan, laman di e kalong mauri sa emu anggan umdasug tam Fun Isus. 15Diyus wa ban tagfasure tam Fun Isus si at filian fag menit. Tam Diyus tuwa at Tiba Tungud at Madaragang, ay Tagmagurang sas fagayu tagmagurang ay Fun sas fagayu fun. 16Kanya way at yud kate faggugat ay nu gbanwan sasad mayamag tuwa, at katvngvdan at taw wa mafalinggat sanya. Ay we taw batang glag anya. Segi Diyus at Madaragang faggugat. Kin, katanyai tuwa.

At Longan sa sik Mabalan fag Tagafanud

17Foyungi sa sangay mabalan ste swa daga te, lag gfalabi at tiba. Ay lag gseg sa takalyam fag ngay fagmabalanun. Fangkabat, segi way sas Diyus tagfon antam fagayu nus nge wain tam fakaumsigun. 18Ay foyungi nu gfagbulun at matuyan, laman kadungug tuwa nus nganday at fagbulun at matuyan, ay kamon ay gfantarabang tuwa sa tiba. 19Anway nu katanya tuwa at fagbulun, kanya gfaful tuwa at fagmabalanun at yud kalyam sas banwa. Ay kanya umke leleg wa ban faggugat.

Pablu at Fakatabuwan fag Longan

20Timutiyu, fatvngvduni ka fag ngay foyungan at nafon emu. Ay saruyi at yud e masuwad fag ngay sulitanan sa tibak taw nu gfasad matuyan, ay roro wa gfadiyuganan tam foyungan. 21Anway katanya fag fagsafulun, tibak taw nalyam wan at fagafanudun.

Igdarangin aw sa tam Diyus te, famanyuni ayu.

Currently Selected:

1 Timutiyu 6: TAWEAST

Highlight

Copy

Compare