2 Tesalunika 3
3
Pablu Fagetun sas Taw Tesalunika te, “Darangini Emi”
1Katsi em ngay fadugsay, e fagetun ami sa ayu te, darangini tuwa emi, laman tam Diyus fanlongan mafali tuwa nu karapyag sa sangay talun at ngay taw. Ay laman kanya fag ngay taw, anyangay umtuyan kata ay naatuyan. Umtuyan yangay te, tam Diyus fanlongan sik mafanud wa fiya fag longan. 2Ay at sadi em fagetun, darangini yangay emi te laman tam Diyus igdingding tuwa emi siginan at mauri fag ngay taw. Teway fakatanyaun em fagetun, ngayu way at yud gafanud sa tam Diyus fanlongan.
3Ay dewa te, ngayu wayk taw at yud gafanud, Diyus di kalyam at fatuyanan fagayu. Fagayu at nalong, fagurungan tuwa. Ay tam Diyus, igsalag yangay Satanas at ngay fagbulun nu kadasug sa ayu. Ay igfatvngvd yangay ay ngay amatanganan.
4Em ngay fadugsay, nasaful ami te, tam Fun wam at ngay taw. Nu katanya, gafanud ami te, igfatunglus tuwam igfaning em ngay suguwan ayu. 5Ay gdarangin ami sa tam Fun Isus, te laman kanya igfoyung tuwa ayu, te tam Diyus kesug dawdaw ayu. Ay tam Isus yangay tagfoyung ayu nu gbaris kata kanya nu gbaris ebi.
Pablu Fangatulun te, “Dangay Gananadan nu Gfagbulunan Am”
6Katsi, em ngay fadugsay, an ami e fagsuguun ayu sa baliwas tagfamomuyun. Labon manga, sanya si ayu, e sik taw, gafanud tuwa sa tam Isus, ay roro kauri way nanfagbulun. Ay igfasalag way tiba nu gfagbulun. Dewa gina, glong ami te, lag faudgufudan takatanya fag taw, teway katanya fag taw wa gfaning ebi em foyungan ayu. Ay kanya em longan, te lag faudgufudan, siginan wa tam Fun Isus.
7Fakatanyaun dawdaw em longan, nasaful tuwam te, wa masine sik taw nu gfamomuyun. Teway nalag wam em fagbulun gina ami sanya si ayu. Nalag wam te, gina ami maful ayu, di ami gfamomuyun. 8Dewas wa menit, ay dewa sad yabi, fagbulunan tuwami, te laman e fanbul tuwami em ngay nayudanan. Di ami masefuwan ayu. Igsali tuwami em ngay fakonun.
9Satu ro, nu kaumsig way ami, mafafaet way ami siginan ayu em ngay nayudanan, teway ami wan ay ay takamoyung. Ay roro yaya, di katanya em fasadan. Em fasadan, nafalag tuwami ayu ay fagfaningan, te laman nu am wa ban, igfagbulunan tuwam kata ay nalag emi. 10Ay nalong wami ayu te, sik taw nu kauri way nanfagbulun, lag fon at fakonun. Katanya em longan gina ami gufud ayu sanya.
11Em ngay fadugsay, fakatanyaun ababa em rirukan, kata ay natap aro ginan, an ami nadungug te, sanya si ayu tibak taw anway igfamomuyun. Kauri way nanfagbulun. Ay nadungug yangay ami te, nus tuwa ma, kanya fag ngay taw kamasalag way tiba nu gfagbulun. 12Ay nu katanya em nadungug, glong ami sanya fag ngay taw te, lag kamasalag ay iba nu gfagbulun. Am sigon fagbulunani tuwa, laman di am igsefu ay iba. Katanya em suguwan, matvngvd wan nu glong ami. Ay siginan wa tam Fun Isus, kanya fag suguwan.
13Ay am fagayu, dangay gananadan nu gfagbulun am at masine. Fatunglusi tuwa.
14Ay roro sanya si ayu tibak taw nu anway kauri gfaning em longan ste fag rirukan, am tiba amatangi tuwa te, kanya fag taw kamabo way. Ay nus tuwa ma, lag faudgufudan katanya fag taw. Fakatanyaun, laman kanya fag taw umkapla yadi. 15Ay dewa ami glong katanya, dangay e amatanganan malimata sa anya. Fangkabat ani tuwa foyungi anya, te lag katanya, teway kanya fag taw ay fadugsay wan ay.
At Fakatabuwan fag Longan
16Katsi gdarangin ami sa tam Fun, sa tagfanabayan antam. Gdarangin ami te, laman kanya gfanabayan ayu fagayu, laman dewas nga ginain, dewas nga setaw takagurungan sanya si ayu, ay amatanganan manabayan tuwa. Katanya em darangin. Tam Fun wan tagufud ayu.
17Katsi ste fag afud sirut rirukan, aw wa fiya fiya Pablu tagriruk. Ku rirukan wa fiya fiya tuy. Katanya ku ugali, dewas nganday nu gfauba aw sik rirukan, at balyu sirut aw yay tagriruk.#3:17 Pablu ugali nu kawat rirukan, kanya gelongan way sit dayu, ay at usama griruk at nalong. Ay roro nu katabu wa at rirukan, Pablu nanriruk yay sik fulan longan, te laman at taw nu tumap, tumoglag at rirukan, ay gafanud te siginan wa fiyas Pablu ka fag rirukan. Kanya at famasaful te, siginan wa fiya angku kanya fag rirukan. 18Ay katsi iglong aw te, tam Fun Isus wan tagtarabang ayu. Ste way kabat ku rirukan.
Currently Selected:
2 Tesalunika 3: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
