1 Timutiyu 1

Tagriruk ay at ngay Tagtap

1Tuy fag rirukan siginan angku, Pablu. Aw, tam Fun Isus at Nasugu at sadi, anway Diyus nasugu angku. Tam Diyus tam Tagfalangfe ay tam Fun Isus tam fagsegun.

2Griruk aw sa emu, Timutiyu, at matuyan ku sisiyan sas fagafanudun.

Igdarangin aw sa tam Diyus tam Tama ay sa tam Fun Isus te, famanyuni emu, ay falagi nu kafanyu emu, ay fanabayani yangay emu.

Tagaki siginan at Yud Matuyan fag Taglong

3Katsi glong akyangay sa emu katvngvd ebi nu glong aw emu gina aw galoun sas talun Masidunya te, sanyai yap sas fulan Efesu. Salagi tibak taw sanya tagfoyung at yud kata em foyungan fag ugali. 4Ay longi yangay sanya fag ngay taw te, lag gfangulan at lungud sat yud masuwad fag fagtapan ay nu gtalagtagan at ngay aguyangan at ngay ngayan. Takatanya gfaaringangan way ngay taw, wa mafafatarabang laman sumaful tam Diyus at fakaumsigun. Sumaful yay tam nu gafanud tuwa tam sa anya.

5Ku foyungan at masuwad te, laman fagayu taw adkafanyuwani tuwa. Mafafagbulun tuwa katanya at amatanganan nu malayun tuwa sat masine ay matuyan tuwa at fagafanudun sa tam Fun Isus. 6Tibak taw infoli wan sanya ginan fag foyungan. Ay at naumsigan sa way at sulitanan yud e masuwad. 7Kanya fag ngay taw kaumsig nanfoyung Muisis at Suguwan, ay roro wa nasaful at longan at masuwad ay anggan anya at foyungan mandi at masuwad. Dewa kanya nu gfasad matuyan anya at foyungan.

8Ay nasaful watam te, masine Muisis at Suguwan, nus nga sinu tagfaning at masuwad. 9Amatangani tuwa te, ka fag Suguwan bunwa sat matuyan fag ngay taw, sa way takamabo, ay sat yud gfaning, ay sat yud gsaful Diyus, ay sa sangay tagasalanan, ay sat yud malayun sat masine, ay sa sangay tagfate at magurang, ay sa sangay takamate taw, 10ay sa sangay takamayun, ay sa sangay mangama at natsa tibak ama, ay sa sangay takamul taw, ay sa sangay takamuwag, ay sa sangay tagfoyung at yud matuyan at nalag, ay sa way nus nga sinu at yud gfaning sat matuyan fag foyungan. 11Ka fag Suguwan gfadiyuganan tuwa sas Masine fag Barita taglabi tiba, tagsiginan tam Diyus at famanyun. Ay naubun sa angku at Masine fag Barita laman moyung aw.

Pablu at Fagusegananun siginan Tam Fun Isus

12Ay guseganan aw sa tam Fun Isus at nafon angku fagmabitsugun, anway kanya natap angku te, sik matuyan aw fag taw. Ay nafili angku laman at fanuguwan, 13ebi dewa aw nafalingun anya, ay dewa mauri ku fagbulun sat ngay taw. Ay roro Diyus infanyu tuwa angku. Fakatanyaun anway te, dakya gsaful sas Diyus ay kya gafanud sa anya. 14Ngayu tuwa tam Fun at nafamanyun angku. Ku faginfanudun sa anya ay ku faginkesugun ku iba, anway insadi aw sa tam Fun Isus.

15Matuyan wa fiya tuy fag longan: fagayu taw afanudi te, tam Fun Isus at fagindasugun ste swa daga laman nanfalangfe ngay tagasalanan. Ay aw wan at sadi at tiba tungud ke asalanan. 16Ay dewa katanya, tam Fun Isus infanyu angku, laman nanfalag sa tibak taw te, setvngvd nu malukme sa sangay tagasalan. Ay at nafagbulun sa angku sik fagulitan ban sat tagafanud sa anya ay mul ban leleg faggugat.

17Segi tam Fun, kanya at yud e fakatabuwan, ay at yud kate, ay at yud kalag, ay tagsesadi fag Diyus. Kin, katanyai tuwa.

18Ku unga, Timutiyu, matvngvd nu glong aw sa emu te, faningi tuwa ebi ngay taglong nafoyung emu am fagbulun, laman mafafasalag tuwo sa sangay takalimata at matuyan. 19Fatvngvdi nu gafanud o. Ay tagaki laman di o kapla te, e asalanan o. Tibak taw dewa e naaplan te, mauri way at fagbulun, wa gfasaman at ugali at mauri. Ay katanya wayay, nalyam wan at fagafanudun, 20kata Imeneu ay Aleandru at nalyam at fagafanudun. Nafabayan kwan duwama sas Satanas laman sumaful te, wa masine nu gfanlamangan sas Diyus baliwa.

Currently Selected:

1 Timutiyu 1: TAWEAST

Highlight

Copy

Compare