2 Tesalunika 2
2
Pablu Famayamag sa Baliwa sik Taw Takamabo Dawdaw
1-2Em ngay fadugsay, e fagetun ami ayu. Lag sigad gafanud at ngay taw foyungan sa baliwa tam Fun Isus nu kadasug ste swa daga, ay sa baliwa nu antam kaful sa anya. Dewa tibak taw glong te, katsi at Masine fag Falad nalong te, kanya fag menit ebi wan, lag gafanud. Ay dewa am e dungganan te, nafoyung unu ami te kanya fag menit inlangfe wan, lag gafanud. Ay dewa te tibak taw igfon ayu sik rirukan, iglong te, tuy unu fag rirukan siginan emi Pablu, ay ka fag rirukan glong te, kanya fag menit inlangfe wan, kanya sigon lag gafanud. Matvngvdi tuwa ay amatanganan.
3Dewa gina, dewas nga setaw at longan ayu, lag galukan. Dewa tibak taw igfayamag ayu te, tam Fun Isus indasug wan, roro idya. Tam Fun Isus ya mdasug fiya fiya yap ngay at ngay taw ste swa daga fasigad kamabo dawdaw tam Fun Isus. Ay at sadi at fakasafulan, yap ngay umsure sadik taw at mason dawdaw nu kamabo tam Diyus, idya, tam Fun Isus ya kadasug. Ay roro kanya ban fag taw at mason dawdaw nu kamabo, at fakadasugan ban sa ways faurianan.
4Ay bagu sumas faurianan kanya fag taw takamabo dawdaw, anyay nanfalimatan tam Diyus, ay fagayu fagsegan ste swa daga. Kanya fag taw at fakaumsigun, kanyai taglabi fagayu fagsegan. Ay kanya fag taw lumo yadi sas Diyus bale daul ste swa daga. Ay sumakbo sas bale daul, ay nanmalunggung sanya, ay melongan te, “Aw wan Diyus.” Katvngvd anya, kanya fag taw nu kamabo.
5Em ngay fadugsay, go gamatang yay am ebi ku foyungan ayu gina ami maful si ayu? Nafoyung kwa ayu kanya ayuwayu takagurungan ban at marirukan sit tungud. 6Ay gsaful way ro am te, kanya em nalong fag taw takamabo dawdaw, ya sigad umsure, teway katsi e gfatawad yay anya. Ay gsaful way ro am te go taw kanya tagfatawad anya, teway nafayamag wami ayu ebi. Ay yap ngay mdasug Diyus at filian fag lungud, ya maasure sas wa taw kanya.
7Ay ka fag taw deyud maasure, roro Satanas igfagbulun wan sas taw amatanganan. Igfafamabo wa at ngay taw, laman at ngay taw ayuwayu wa gfaning Diyus suguwan. Ay dewa katanya, ya maasure kanya fag taw takamabo dawdaw, teway e gfatawad yay anya.
Roro katsi ban sik menit, tam Diyus gbul wan at famatawad kanya fag taw. 8Ay nu katanya wa long, kanya fag takamabo fasigad fagbulun kata at fakaumsigun ste swa daga. Ay roro tam Fun Isus di ban galabawan ka fag taw. Tam Fun Isus kamasinean ay at kamadaragangan, kanya fag taw malabawan way sigad gina ban tam Fun Isus insure. Tam Fun Isus nu naelongan wa sirut sanya fag taw, inkate wa gugat ka fag taw takamabo dawdaw.
9Ay roro ka fag taw bagu malabawan, Satanas mon yay at fagmadaragangun. Ay ka fag taw mafafagbulun tuwa sik ngay fagbulun at maylatan dawdaw. Ay at ngay taw ban nu nalag at fagbulun, maylatan, ay lumong te, “E, kanya long fag taw, madaragang wa long fiya dawdaw.” Ay roro ngap, at ke fagmadaragangun, Satanas way. At famalukanan way taw.
10-12Ay kanya ban fag ngay taw at yud gafanud sa tam Diyus at foyungan, kanya malukan wa ban fiya ka fag ngay fagbulun at mauri dawdaw. Fakatanyaun, kanya fag ngay taw wa kaumsig fasakbo at matuyan fag foyungan sat amatanganan. Satu ro, kanya fag ngay taw nu nafasakbo di, umlangfe yadi. Ay roro kauri way. Teway at fakaumsigun, igfaning way at mauri. Nu katanya, tam Diyus nanfafanggalutan yay baliwa kanya fag ngay taw nu gamatangan, laman kaugat yay nu gafanud sat yud matuyan. Fakatanyaun Diyus at fagbulun, laman ro kanya mafalong te, “Kanya ngap fag ngay taw at kinkuri gafanud sat matuyan, at masine sa anya, faurii wan.” Ay nu katanya Diyus faurianan wa long fiya ka fag ngay taw.
Pablu Foyungan sa Baliwas Tagafanud fag ngay Taw
13Em ngay fadugsay, glong ami ayu te, bundi am takatanya fag ngay taw. Am, antuwam Diyus at nesugan fag fulan taw. Nu katanya, faggugat guseganan ami sa tam Diyus sa ayu baliwa. Ay igtungul tuwa nu guseganan ami. Guseganan ami te, siginan ngay ebis fagsigadan, tam Diyus ngaro nafili wa gugat ayu, te am wan at fagfalangfeun fag fulan taw.
At sadi ay faginlangfeun, teway Diyus nafatsi ayu at Masine fag Falad, laman mafonan am sa anya. Ay at sadi ay faginlangfeun, teway gafanud am sa at matuyan fag foyungan sas Isus baliwa. 14Ebi, nadungug wam kanya fag foyungan, gina ami nafoyung ayu. Ay roro ginanya, gina ami igfoyung ayu Masine fag Barita, roro mangaro kanya wan Diyus faran nu glong ayu te, “Afanudi wa sa angku. Ay nu gafanud wam sa angku, igfatsi kwa ayu Fun Isus at fagmasineun ay at fagmadaragangun.” Katanya tuwa tam Diyus fasadan, fagnafadasugun antam at foyungan.
15Nu katanya, em ngay fadugsay, ani tuwa matvngvdi nu gafanud am sa tam Diyus. Afanudi tuwa gugat sa at foyungan. Dewa em foyungan ayu ebi gina ami sanya maful ayu, ay dewa em nafauba way em ngay rirukan sa ayu baliwa, fatunglusi tuwa nu gafanud am sa tam Diyus baliwa at ngay foyungan.
16-17Ay katsi, gdarangin ami te, laman tam Fun Isus ay tam Tama sis banwa, fabitsug tuwa ay amatanganan, ay igfoyung ayu ay ngay fagbulun at masine, ay anggan ay ngay longan at masine. Katanya em darangin, teway tam Diyus kesug dawdaw antam. Ay igfabitsug gugat gugat tam ngay amatanganan, laman kaugat tuwa nu gafanud tam, te kanya fagurungan wa fiya at ngay nalong. Fakatanyaun at fagbulun, teway kanya infanyu tuwa antam.
Currently Selected:
2 Tesalunika 2: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
