2 Tesalunika 1
1
Pablu Longan at Famasigad at Rirukan
1Tuy fag rirukan siginan emi fag tulu, Pablu, Silas, ay Timutiyu.
Em fagfadasugan tuy fag rirukan, sa em ngay fadugsay sis fulan Tesalunika tagafanud yangay sa tam Tama sis banwa, ay sa tam Fun Isus.
2Ay igdarangin ami sa tam Tama sis banwa, ay sa tam Fun Isus. Igdarangin ami te, laman kanya falag tuwa nu kafanyu ayu, ay fanabayan tuwa ayu.
Pablu at Fagusegananun Ayuwayu sas Taw Tesalunika
3Em ngay fadugsay, guseganan wami gugat gugat sa tam Diyus, te, kaugat tuwa nu an am gafanud sa tam Isus. Ay nu kadkafanyuwan am, kaugat yangay. Ay masine tuway dawdaw katanya em ngay nadungug, igtungul tuwa nu guseganan ami. 4Ay gumsiganan tuwami kamansulit sa tibak tagafanud sa tam Isus, sa tibak fulan. Igfoyung ami tam iba te, “Taw Tesalunika mabaris tuwa. Dewa gdalan mataka ayuwayu, ay dewa te, sanya sad fulan tibak taw gfauri way anya, di kasirut nu gafanud sas Diyus.” Katanya em foyungan sa tibak fulan sa ayu baliwa.
5Ku ngay fadugsay, tam Diyus nafaful wa ayu sat fagmagurangun fag ngay taw. Roro kanya wan at fanlonganan, fagindasugun sa ayu katsi ay ngay fagbarisun. Am wan tam Diyus fagmagurangun fag ngay taw. Ay katsi, kaduge am igbaris, igfatuyan am te tam Diyus nafaful wa fiya ayu sat fagmagurangun fag ngay taw.
6Ay tam Diyus di gsalan nu gfainkafudan taw. Tibak taw, Diyus way ban fagfauriun, ay tibak taw, antuwa ban at fagmagurangun. Ay Diyus di gsalan nu gfili. Teway kanya tagfauri ayu katsi fag fulan taw, Diyus fauri wa ban fiya. 7Ay am katsi tagafaurianan, Diyus ban igfanabayan tuwa ayu. Ay anggan ami, katanya yangay. Diyus ban igfalyam yay em ngay natakan katsi.
Tam Diyus nu gfagurungan katanya em longan sa ayu, gina ban tam Fun Isus umdasug siginans banwa. Tam Isus faygaluwan ginanya, at fanuguwan wa fag ngay falad at madaragang dawdaw. 8Ay sit ngaba dayu, gigang dawdaw. Ay ginanya wa ban tam Isus nu gfauri kanya fag ngay taw takauri nangasaful sa tam Diyus baliwa ay takauri gafanud at Masine fag Barita sa tam Fun Isus baliwa. 9Ay kanya ban fag ngay taw at faurianan, we fakatabuwan faggugat. Faggugat ban, wa lumag tam Fun. Wa lumag at kasinean ay at kamadaragangan. 10Ay kanya ban nu kagurungan, gina ban tam Isus indasug.
Ay tam Fun Isus gina ban indasug ste swa daga, itam ban at ngay taw, nanfauseganan tam dawdaw anya. Ginanya ban, itam at ngay tagafanud sas Isus, itam wa ban tagfatuyan te, tam Fun Isus at namasine wan. Ay am ban, nu kaful am, sa tuwa Isus at ngay taw baliwa. Fakatanyaun, ebi gina ami nafoyung ayu, nadungugan tuwam Masine fag Barita ay nafanud tuwam.
11Nu katanya, igdarangin ami gugat ayu sa tam Diyus. Nasaful wami te, tam Diyus, nataban wa ayu sa anya baliwa. Ay nu katanya, igdarangin ami te, umkata tuwam nangus tam Diyus. Ay igdarangin yangay ami te, laman ro Diyus igfon ayu fagmafabulun, laman mafafagurungan tuwam ay ngay fasadan at masine, ay laman ro igfagbulun yangay am sik ngay fagbulun tagfasure te gafanud wam fiya sa tam Isus. Katanya em darangin.
12Ay fakatanyaun em darangin, laman ban at ngay taw sa ay ngaba dayu igfauseganan tam Fun Isus. Ay tam Fun Isus guseganan yangay ayu. Ay tam Diyus ban, ay tam Fun Isus, kanya ban fagurungan wa fiya em darangin, teway kanya kafanyu tuwa antam.
Currently Selected:
2 Tesalunika 1: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines