2 Pedru 3

Famasadani anway Umdasug ban Tam Fun

1Ku fakafanyuun ku ngay fadugsay, ku fagnafaduwa ginanun nu griruk aw sa ayu, laman ku famaamatang ayu ebi ku foyungan, ay laman madaragang tuwam nu gamatangan am sat masine. 2Amatangani Diyus at ngay taglong at foyungan ebi, ay anggan tam Fun tam Tagfalangfe at suguwan, at ngay nasugu fag ngay taw at nalong sa ayu.

3Taguna asafuli te, sa ban at taguyan fag ngay menit, umdasug ban sik ngay tagfalingun. Ay kanya gfaning ban at mafurat fag fakaumsigun. 4Ay kanya glong ban te, “Sadaw Isus nafatuyanan te, ‘Kadasug kban.’ Ay sek, dada wan katsi? Madyay tam ngay aguyangan inkate wan ay fagayu ste swa daga kata yay gugat ebi gina bagu kaawat tam daga.” 5Ka fag ngay taw gtumlungudan wa yud gamatangan at matuyan te, Diyus naelongan way ay insure tam banwa, ay insure yangay tam daga siginan sad mamam. 6Ay siginan yangay ka fag mamam nafalino at dan fag fagdaul daga anggan infanggalutan fagayu ginanya. 7Ay Diyus naelongan yangay te, tagkatsi fag banwa ay fag daga umbatas ban sasad afuy. Ay ka fag afuy umsure gina ban Diyus gfauri ay gfamin taw at mauri.

8Ku fakafanyuun ku ngay fadugsay, amatangani te, tam Fun nu gamatangan sik menit kata sik libuk banwa, ay sik libuk banwa kata way sik menit. 9Tam Fun di gfalugo nu gfagurungan at fatuyanan, kata tibak taw tagamatangan te, glugo yay ban. At matuyan, Diyus gfon yay sik lungud sa antam fagayu laman gubun tam tam ngay asalanan, teway at fakaumsigun fagayu taw di mfaurianan.

10Tam Fun umdasug wa ban fiya, kata sik takamul sad yabi. Ginanya ban fag menit tam banwa malyam wan gfasfuwan sik awang dawdaw. Ay fagayu tagsis wa daga umtinas wa ban sasad afuy. Ay anggan tam daga umbatas wan, ay wa ban e sawad. 11Fagayu tagste swa daga umtinas wa ban, nu katanya, masadii tuwa ay ugali sas Diyus ay faningi tuwa anya. 12Ay kaduge am gfanya tam Diyus at menit nu kadasug, ugatani tuwa nu gfaning am sat masine laman mafali ka fag menit nu kadasug. Ay gina ndasug ka fag menit, banwa umbatas wan ay fagayu tagsis wa daga umtinas wan katvngvdan nu masugba. 13Roro ngap gfanya tuwa tam sik bagu fag banwa ay sik bagu fag daga tam Diyus at nafatuyanan sa antam. Ay sanya ban e fagmatuyanun tuwa gugat.

14Nu katanya, ku fakesugun ku ngay fadugsay, kaduge am gfanya takatanya, maseganamai tuwa ay ngay ugali sat masine, laman tam Fun gina mdasug, nu glag ayu, di am e mauri. Malayun tuwam sat masine. 15Amatangani te, tam Fun gfon yay sik lungud sa sangay taw laman umlangfe tuwa. Katanya at fagyudun kafoli. Katanya yangay tam fakesugun tam fadugsay Pablu at rirukan sa ayu. Diyus nafon anya fagsafulun gina griruk. 16Katanya yangay Pablu foyungan sas fagayu at rirukan. Ay Pablu at rirukan tiba, tibak taw wa mafali nu gsaful. Ay at yud nasaful fag ngay taw ay anggan at tagfainfolian fag ngay taw at amatanganan nafasaman at famayamag Pablu at rirukan at masuwad. Ay anggan katanya yay nu gfayamag sa tibak afud Diyus at longan. Kanya wa mandi fag ngay taw tagfadasug sa anya at mauri.

17Ku fakafanyuun ku ngay fadugsay, dewa ebi nasaful wam katanya, tagaki tuwa laman di am galukan ka fag ngay taw at mauri at foyungan at yud matuyan, ay laman di ban gfasirut ay fagafanudun. 18Ay faugati tuwa Diyus at fakafanyuun sa ayu ay nu gtoglag am sa tam fun Isus tam tagfalangfe. Segi anya katsi ay faggugat ban! Kin, katanyai tuwa.

Currently Selected:

2 Pedru 3: TAWEAST

Highlight

Copy

Compare