2 Pedru 2

Matagakani at Yud Matuyan fag Takamoyung

1Dewa katanya, ebi sis taw Israel e ngay taglong at yud matuyan. Ay katanya yangay ban at kumgurungan sa ayu. E ngay takamoyung at yud matuyan ban tagsuksuwanan gfoyung ayu laman umsirut ay fagafanudun. Ay anggan sigon mafayudun tam Fun at nafalangfe anya fagayu. Ay katanya wayay at fagbulun, mafali nu e faurianan ban kanya fag ngay taw. 2Ay ngayu yay bank taw at maning sat yud matuyan fag ngay takamoyung at ugali, ay gfagbulun yay tibak fagbulun at mapla. Ay at nalag ka fag fagbulun gfalingun ban sa at matuyan fag longan tam fagfaningun. 3Ay ka fag ngay takamoyung at yud matuyan gfangesug way at singku. Ay nanfanluk ban ayu sat masine fag ngay longan, laman mul ay singku. Ay glugo wan Diyus nu nafamasadan nanfauri ka fag ngay taw, ay makbang wan nu kamin.

4Ay Diyus wa nfanyu at ngay tagfabarita at ke asalanan, fangkabat di ro, naukas wa sat ngabasad ay marum fag tabyu, yap ngay ban umdasug at nafatuyanan fag lungud laman Diyus gfauri wa anya. 5Ay Diyus wa yangay infanyu ebi fag ngay taw, fangkabat di ro, Diyus nafe lino daul laman gfamin ka fag ngay taw at yud gfaning anya. Ay Nuwe way ay at ufud fag fitu at kinlangfe sanya. Ay Nuwe wan at nafoyung sa baliwa at matuyan fag ugali.

6Diyus nafauri yangay fulan Suduma ay anggan fulan Gumura anway sat fagmauriun. Ay nalabe wan ka fag duwak fulan, laman gfalag sa at yud gfaning Diyus fag ngay taw te, katanya yangay ban at kumdasug sa anya fagayu. 7Ay Diyus nafalangfe tuwa Lut, sik taw matuyan. Lut kabalu dawdaw anway at mauri fag ngay taw mafurat dawdaw at fagbulun. 8Ay Lut kaduge gbanwan sanya, kayu menit kayu menit wan nu glag ka fag ngay taw nu gfagbulun mauri, ay kanya wan tagfabaluwan at amatanganan.

9-10Nu katanya, tam Fun gsaful way te, go setain ro nu gfalangfe at matuyan fag ngay taw gina gdalan ngay famaskud ay go setain ro nu gfauri at mauri fag ngay taw gina ban sas taguyan fag ngay menit, kaugat wan at ngay tagfaning sat bilug at mafurat fag fagalabianun ay anggan takamabo sa anya.

Kanya fag ngay takamoyung at yud matuyan we nalimuwanan nus nge wain, ay gfaning way at fasadan mandi. Ay wa kalimu gfalingun dewa at madaragang fag ngay awatan sis banwa. 11Ay dewa at ngay tagfabarita taglabi nu mabitsug ay madaragang sanya fag ngay takamoyung, di nafalingun at madaragang fag ngay awatan sis banwa sa tam Fun at daga salubangan.

12Ay ka fag ngay takamoyung at yud matuyan dewa gyud nasaful ka fag foyungan at masuwad, kanya gafayudun way daw. Ay kanya kata way sik ngay mela at yud e amatanganan, insalug laman taw gumamat anya ay fate. E faurianan wa ban fiya kanya fag ngay taw kata ka fag ngay mela. 13Ay gfatakan wa ban fiya kata at nafagbulun sa tiba. Kanya fag ngay taw we naplan dewa e glag nu gfagbulun at bilug at fakaumsigun. Ay gina am maful ayuwayu gfangon, kanya maful yangay ayu ay guseganan dawdaw gfanluk ayu. 14Ay ka fag ngay taw, galabian wan fagayu at nalag fag mangena. Ay wa katuwas nu gfagbulun sas asalanan, ay gfaumsiganan yay at yud matvngvd at fagafanudun. Ay kanya gfangesug way faggugat. Ay e faurianan wa ban fiya sanya fag ngay taw, ay wa ban umlangfe. 15Kanya nasaruyan sat matuyan fag dalan ay nafaning Balaam at ugali. Balaam at tama Beur. Ay Balaam kaumsig nu e sumali at nafagbulunan at mauri. 16Ay Balaam asnu naelongan kata sik taw, ay nabaya anya laman di tumunglus sat yud namamatanganan fag fagbulun.

17Takatanya fag ngay takamoyung, kata way sik ngay bulbug at yud e safa. Ay kata yangay sik ngay linyabu nu nafalayugan sik mabitsug fag tagmara. Ay Diyus nafamasadan sik ngabasad ay sik marum fag tabyu, at fagfatsanyaan ban ka fag ngay takamoyung. 18Kanya gfalabi dawdaw nu gelongan ay wa ngap e masuwad. Ay gfamoyung te, masine way tam gfaning tam bilug at fakaumsigun, laman at ngay tagafanud bagu, gdog yay gfaning sat bilug at fagalabianun at mauri. 19Ay kanya gfatuyanan sat ngay nafataban fag ngay taw te, “Nu gfaning tuwam emi, mafafagbulun way am nus nga setaw ay fagafagbulunun.” Ay roro kanya yay tagamagurangan asalanan, tagfadasug anya sat faurianan. Anway nus nga setaw tagmagurang emu, kanya gfanuguwanan emu. 20Kanya fag ngay tagafanud sa tam Fun Isus tam Tagfalangfe di gfaning iste fag daga at fagmauriun, ay roro nu gdog yay nafaning sas asalanan, ay at asalanan tagmagurang anya, kanya glabi yay ban ebi ataw nu malimata at banwanan gina yud nasaful tam Isus. 21Amasine yap ka fag ngay tagafanud nu gdi ngap nasaful sat matuyan, dewa ngap nasaful, ay wa ngap nafaning Diyus at ngay suguwan sa anya. 22Takatanya fag taw nu nfoli yay sat asalanan, gfaning tuy fag fafaskudanan te, “Sik idu dewa nabalugnan, rodi naon yay at balugnan,” ay “Sik butan, dewa o nafaigus, rodi gdog yay nanlubluban sad lifak.”

Currently Selected:

2 Pedru 2: TAWEAST

Highlight

Copy

Compare