2 Pedru 1
1
Tagriruk ay at ngay Tagtap
1Tuy fag rirukan siginan angku, Simun Pedru. Aw, tam Fun Isus at fanuguwan ay at Nasugu at sadi.
Griruk aw sa ayu, am tagafanud sa tam Fun Isus, tam Diyus ay tam Tagfalangfe. Tam Fun Isus matuyan tuwa, nu katanya, at nafon sa ayu fag fagafanudun katvngvd yangay at nafon sa emi fag fagafanudun.
2Nu nasaful wam tam Fun Isus, tam Diyus, kanya mamanyun ayu ay nanfanabayan ayu kayu menit kayu menit. Katanyai!
Katatuyi tuwa Tagafanud at Ugali
3Tam Diyus at fagmadaragangun tagfon antam fagayu tam fagayudanun laman fagayu tam ugali kata tuwa tam Diyus at ugali siginan tam naatuyanan anya. Ay nafili antam laman si yangay ban antam sik afud at fagmasineun ay fagmadaragangun. 4Nu katanya, kanya at fagnafamanyunun sa antam at mafanud dawdaw fag ngay fatuyanan ebi, laman ay ugali gfaning tuwa Diyus at ugali ay laman maasaruy tuwam ste ginan swa daga at mafurat dawdaw fag ugali. 5Anway tagafanud tuwam, fasinei tuwa ay ugali, ay nu masine wan ay ugali, asafuli; 6ay nu masafulan am, asafuli gbaris; ay nu gsaful tuwam gbaris, asungati; ay nu masungatan am, malayuni sat masine; 7ay nu malayun am sat masine, afanyui tuwa ay ngay fadugsay sas fagafanudun; ay nu kafanyu tuwam sa ay ngay fadugsay sas fagafanudun, afanyui tuwa sas fagayu taw.
8Nu katanya tuwa ay ugali, ay nu kaugat tuwa kayunya, ay fagbulun e masuwad tuwa ban, anway nasaful wam tam Fun Isus at ugali. 9Ay sik taw nu dway e ugali kayunya, kanya kata way sik taw at yud gsaful at matuyan fag ngay ugali. Ay kanya nalyam yay te, Diyus nafegus at asalanan fagayu.
10Anway katanya, ku ngay fadugsay, ugatani atuyani te, Diyus tuwa at nafili ayu. Nu katanya tuwa ay ugali, di am gfaning mauri. 11Ay tam Fun Isus tam Tagfalangfe gfasakbo wa ban fiya ayu sat fagmagurangan at yud e fakatabuwan faggugat.
Amatangani tuwa Ku Foyungan Ayu
12Fakatanyaun, ku fasadan te, faggugat gfaamatang akyay ayu aro ku longan, dewa am batang gdungug ay dewa am batang intuyan tuy fag foyungan at matuyan. 13Gamatangan aw te, masine siring kaduge aw gleleg, nu gfaamatang akyay ayu, laman madaragang tuwa ban am. 14Gsaful kwa te, dakwa ban glugo nu gleleg aw, anway tam Fun Isus nafasaful wa angku. 15Nu katanya, maseganama aktuwa, laman nu nalo kwan, gamatangan tuwam fagayu ku foyungan ayu.
Nalag Wami Tam Fun at Fagmasineun
16Ebi gina ami gfoyung ayu sa baliwa tam Fun Isus nu kadasug ban ay sat fagmadaragangun, di ami gfaning sat yud matuyan fag takamansulit tagfanluk tiba, antuwa te, nalag wami fiya fiya at fagmadaragangun. 17Sanya wami gina tam Diyus tam Tama nafon sik fagmasineun dawdaw sat Baguwama. Ay nadungug ami nu gelongan te, “Kanya wan ku fakesugun ku Baguwama. Guseganan aw dawdaw anya.” 18Nadungug wami fiya fiya nu gelongan siginans banwa, anway ginanya gfaygaluwan wami anya sanya fag muyud at mafilian.
19Ay katsi ntuyan watam fiya sas Diyus at ngay taglong at foyungan ebi at naguna nafoyung. Ay masine nu gfaning tuwam ka fag foyungan, anway ka fag foyungan, kata sik salung nu gdamlag sisad marum nu di yap ngay at menit insure sbalabag. Ay kanya kata sik tagurabas nu gdamlag sa ay amatanganan. 20Ay at mafanud fiya fiya, amatangani te, Diyus at ngay taglong at rirukan fagayu bundi siginan at nasafulan mandi. 21Teway at elongan bundi siginan at amatanganan mandi, antuwa, at Masine fag Falad at nafaamatanganan anya laman nanfoyung Diyus at longan.
Currently Selected:
2 Pedru 1: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
