1 Pedru 5

Diyus At ngay Taw

1Nu katanya, e fagetun aw sa ayu, am at ngay tagmagurang sa sangay tagafanud. Aw, sik tagmagurang akyangay kata ayu, ay nalag akwan nu e gfauri tam Fun Isus. Ay si yangay ban angku sik afud tam Fun at fagmasineun gina ban umsure. 2Katatuy ku fagetun: Imalui fiya fiya Diyus at ngay taw at magamut sanya si ayu. Kanya fagayu kata ngay tupa ay am wan tagtanud. Umsigani tuwa nu gimalu am teway katanya tuwa tam Diyus at fakaumsigun, ay bundi te gafabulunan way am at nasugu ayu, ay ate e fagfanyaun am at fansali, antuwa te, kaumsig am dawdaw gimalu. 3Ay gina am gimalu, dangay matvngvd nu gsugu am sa ay fagimaluun fag ngay taw. Antuwa te, fanggunai kanya fagayu sat masine, teway am wan ay iba fagulitan. 4Ay tam Tiba Tungud fag Tagtanud nu ndasug, kanya nanfaumsiganan ban ayu faggugat.

5Ay am at ngay mabaguwama, faningi tuwa at ngay tagmagurang. Ay tanani tuwa tadtarabangani ay fadfababauni, anway marirukan sis Diyus at longan te,

“Diyus gsalag way tagfalabi fag ngay taw. Ay kanya kafanyu tuwa sa sangay tagfababaun.”

6Nu katanya mangaro, fagayu am, fababauni tuwa sas Diyus at fagmadaragangun, teway kanya nanfatiba tungud ayu sit filian fag menit. 7Foyungi wa sas Diyus fagayu ay fagafanawaun, teway kanya kafanyu tuwa ayu.

8Matagakani tuwa gugat, anway ay fabarangyan Satanas gbaribungan way, kata sik liyun nu gtol gasarapan at fagnantulunun. 9Fatvngvdi ay fagafanudun sas Diyus ay fabarangyani Satanas. Nasaful wam te, bundi am fagtvngvd tagatakan, anggan yangay ay ngay fadugsay sas fagdaul daga.

10Ay Diyus kafanyu tuwa dawdaw ayu. Ay at fagnafiliun ayu laman si yangay ban ayu sik afud at fagmasineun at yud e fakatabuwan, anway am wan tam Fun Isus at taw. Ay wa ban glugo sirut nu gatakan am, ay tam Diyus wa ban at nanfafiya, ay nanfabitsug, ay nanfatvngvd ay amatanganan. 11Segi anya, teway kanya madaragang faggugat. Kin, katanyai tuwa.

Pedru at Fakatabuwan fag Longan Iste

12Tam fadugsay Silas at tagtarabang angku nu griruk aw tuy fag rirukan sirut sa ayu. Nu glag aw Silas, sik matuyan fag taw. Em fagnarirukun laman nanfatvngvd aw ay amatanganan ay nanfatuyan sa ayu te, matvngvd Diyus nu kamanyun sas fagayu tagafanud. Ay nu katanya, fatvngvdi nu gafanud am sas Diyus.

13Tam ngay fadugsay sas fulan Babilunya gamatangan tuwa ayu. Kanya fagayu Diyus at ngay nafili kata ayu. Ay anggan Markus, ku unga sas fagafanudun, gamatangan tuwa ayu. 14Fatunglusi tuwa falagi ay iba te, kadkafanyuwan tuwam.

Igdarangin aw sa tam Diyus te, fanabayani ayu fagayu, am tam Fun at ngay taw. Katanyai!

Currently Selected:

1 Pedru 5: TAWEAST

Highlight

Copy

Compare