2 Kurintu 9

Taw Kurintu Nafamasadan at Fagafonun

1Deyud wan ku nariruk sa ayu, sa baliwa nu gtarabang am sas Diyus at ngay taw. 2Anway nasaful aw te, kaumsig tuwam dawdaw nantarabang. Ay dakwa kapla gfoyung sas taw Masidunya te, siginan ebi fag banwa, am tagsiginans Akaya mafamasadan am gfon ay tarabang. Ay katanya at ngayu faginkumsigun yangay natarabang. 3Katanya ngani ku fagnasuguun tam ngay fadugsay fag tulu sa ayu sanya sas fulan Kurintu laman nanfatagak ayu te, famasadani ay fagafonun kata ku longan ebi sas taw Masidunya. Laman sa ebi ku nafoyungan ayu sa ay fagbulun baliwa sas taw Masidunya umsure wa fiya. 4Anway tibak taw Masidunya galay naalo angku gina aw nasanya sa ay fulan, ay nu nalag ayu te, dia mangaro am mafamasadan, mankapla ban tam. 5Ay nu katanya, naamatanganan aw te, gfaguna kwa angku tam fadugsay laman kaduge yud aw sanya gfaful wam ay nalong fag fantarabang. Nu kanya tibak taw lumag te, di am kesug nu gfon am, ay bundi te, nafabulunan am.

Sik Fafaskudanan sa at Natanum at Ngayu

6Amatangani tuwa te, nus nga sinu at natanum yud ngayu, wa ban ngayu at nabul. Ay at natanum ngayu, ngayu yangay ban at nabul. 7Fagayu am, foni kayu ay fasad fagafonun. Ay lag gfalangfiyanan. Ay bundi sik fabulunan, anway tam Diyus kesug tuwa taguseganan nu gfon. 8Ay tam Diyus mafafon tuwa glabi yay ay ngay fagayudanun, laman ay fagekwaun kasakan tuwa gugat ay mafatarabang tuwam sa tibak taw tagfagbulun at masine. 9Kata at marirukan sis Diyus at longan te,

“Kanya gfon sa sangay taw yud e kwa.

Ay at fagmatuyanun faggugat tuwa.”#9:9 Danyu 112:9.

10Diyus tagfon fantanum ay tinafay laman tagtanum e fakonun tuwa, ay kanya yangay ban tagfon ayu ay fagayudanun, laman kaugat yay nu mafatarabang am sa tibak taw. 11Diyus gfaayu ay ngay fagekwaun, laman mafafatarabang tuwam gugat sa ay iba. Nu katanya, ngayu ban tagfauseganan sas Diyus anway sa ay nafauba sa emi fag ngay tarabang. 12Anway sa ay natarabangan katanya, bundi fagtvngvd at nayudanan ay natarabang sa sangay tagafanud sas Udiya, katanya sik balyavtan tuwa te, laman ngayu at nanfauseganan sas Diyus. 13Anway sa ay nafon fag ngay tarabang, nafatuyan am te, gfaning am at Masine fag Barita sa baliwa tam Fun Isus, anway sa ay fagbulun ngayu bank taw at sumeg sas Diyus. 14Ay kanya fag ngay taw matvngvd ban nu dumarangin ayu, teway ngayu fag famanyun Diyus at nafalag ayu.

15Guseganan tam sa tam Diyus anway at nafon sa antam fag famanyun at yud e gfasud.

Currently Selected:

2 Kurintu 9: TAWEAST

Highlight

Copy

Compare