2 Kurintu 10
10
Pablu Nafoyung at Fagbulun ay nu Maugalian
1Aw Pablu. Glong aw sa ayu kata tam Fun Isus nu malukme ay mabayan. Tibak taw glong te, gsaful aw unu gfababaun ay malukme gina maful ayu, ay madotama aw unu gina ngayayu. 2Katsi matvngvd nu glong aw sa ayu te, gina ban aw mdasug sanya, lag gfabulun angku nangelongan at mabiyat fag ngay longan, teway mafafalong kway takatanya sa sangay taw taglong sa emi te, em fagbulun kata way ste swa daga at ngay fagbulun. 3Anway dewa ste fag daga nu gbanwan ami, wami gfabarangyan kata ste fag daga at ngay balyavtan. 4Em famabarangyan di kata ste swa daga fag ngay taw at famabarangyan, siginan tuwa Diyus at fagmadaragangun em famabarangyan. 5Ay gbabo ami fagayu tagfaabatun sa baliwas Diyus. Ay mafafataban tuwami sa emi fagayu taw at amatanganan laman sumaful tuwa gfaning tam Fun Isus. 6Ay nu ntuyan wami fiya fiya te, gfaning wam, mafamasadan wami gfauri fagayu takamabo.
7Nu glinggat am si way sik taw nu mayaunan. Amatangani tuwa fiya te, nu e gafanud te, kanya si tuwa tam Fun Isus. Nu katanya tuwa, amatangani yangay te, si yangay ami tam Fun Isus. 8Dewa aw gfalabi sirut ku longan sa tam Fun at nafon angku fag fagmadaragangun baliwa, dakdi kapla ayu. Anway ka fag fagmadaragangun, at masuwad, sik fanfatvngvd tuwa ayu, bundi sik famalyam ay fagafanudun. 9Lag am gamatangan te, si ku rirukan gfalimuwanan kway ayu. 10Anway e glong te, si ways rirukan Pablu nu malimu, ay roro nu gsalubangan wan mamomuy way at longan. 11At masine ka fag taw tagelongan katanya sumaful te, taw em longan si em rirukan katsi gina ami ngayayu, ay katatuy yay ban em fagbulun gina ami umdasug sanya. 12At matuyan, wami kaumsig nanfaladlabian em fagbulun sa sik tagfandaragang fag taw at fagbulun. Anway at ngay tagfandaragang fag taw wa mamatanganan, kanya nanfaladlabian way sa tibama tagfandaragang at fagbulun, laman nanlabi at sadi. 13Ay wami nanfalabi tagsaman em fagbulun, antuwa Diyus at nafon emi fag fagbulun, ay anggan sa nu kamoyung ami sa ayu. 14Di ami gfandaragang gina ami nasanya sa ayu. Madyay ami yay taguna at kindasug sanya laman nanfoyung sa ayu at Masine fag Barita sa baliwa tam Fun Isus.
15Wami gfandaragang te, emi wan tibak taw at nafagbulun nu kata ami at nafagbulun. Ay gafanud ami te, umtvngvd yay nu gafanud am, ay umkugat yay em fagbulun sa ayu, kata Diyus at nafon emi fag fagbulun, 16laman ban nanfoyung yangay ami at Masine fag Barita sat ngayayu ayu fag ngay talun. Anway wami kaumsig gago tibak taw nafagbulun ay igfandaragang. 17Marirukan sis Diyus at longan te,
“Nus nga sinu takaumsig nanfalabi tiba, tam Fun yakman at fagbulun at fagfalabiun.”#10:17 Eremyas 9:24.
18Tam Fun at fagfausegananun bundi sa sik taw at nalong te, masine ku fagbulun, antuwa sa sik taw tagfagbulun masine sa anya.
Currently Selected:
2 Kurintu 10: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
