2 Kurintu 8

At Fagafonun sa sangay Tagafanud

1Ku ngay fadugsay, kaumsig ami nanfoyung sa ayu ngay tagafanud sas talun Masidunya at ngay nafagbulun, anway sas Diyus at nafamanyun sanya. 2Dewa ngayu at faurianan sanya fag talun, guseganan tuwa dawdaw. Ay dewa bangan yud e kwa, ngayu tuwa nu gfon at fagayudanun sa tibak tagafanud. 3Aw wan tagfatuyan te, kanya fagayu nafon tuwa magan sat amatanganan, ay glabi yay sat fagmafafonun at nafon. 4Anway matvngvd nu nalong sa emi te, “Anggan ami, tumarabang ami gfon sas Diyus at ngay taw at ke fagayudanun.” 5Ay glabi yay sa em fagsegun at nafon, kanya nafon at bitsug, taguna sa tam Fun ay at fadogan sa emi. Anway katanya tam Diyus at fakaumsigun. 6Ay nu katanya, matvngvd nu nalong ami sas Titu te, afolii yap sanya; fatabui yap nu gfaful ay ngay fanarabangun sa sangay fadugsay sas Udiya, teway kanya ebi at nafasigad gfaful. 7Ay am, glabi tuwam ay iba sat kasinean ay fagbulun, tenday sa ay fagafanudun, ay sa ay longan, ay sa ay fagsafulun. Ay maseganama am sas Diyus at fagbulun, ay matvngvd nu kesug am emi. Nu katanya, kaumsig ami nu kamangguna am kamon. 8Dewa katanya ku longan, kwa gsugu ayu. Glong kway sa ayu tibak taw at nafagbulun nu gtarabang sa tibak taw, laman nanfalag am sa emi te, nu kesug am matuyan tuwa. 9Nasaful wam tam Fun Isus Diyus at fagmasineun. Kanya dewa mabalan sas banwa, nastiye swa daga kata yud e kwa laman umbalan tam.

10Katatuy ku amatanganan ay fagbulun: Masine nu gfatunglus am gfon kata at kinlangfe fag banwa. Am wan tibaguna at naamatanganan katanya, ay am yangay taguna at nafagbulun. 11Fatunglusi nu gfon am. Ay ugatani fatabui ay fagbulun ay naugatan nafasigad, ay foni nus nga setaw ay fagmafafonun. 12Anway nus nga sinu tagfon yud kesug, Diyus kaumsig nus nga setaw ay nafon. Kanya wa kaumsig nu gfon am nu dway am e fanfon.

13Ay dewa katanya, kwa glong te, foni ay iba laman di gatakan ay am tagatakan, antuwa te, laman gsudan tuwa tam. 14Ay katsi am wan at ngayu ke nanuranan. Ay nu katanya, tarabangi tuwa at yud e kwa, laman bandi gina am e fagayudanun, ebi tagatakan kanya yangay at ngayu at nanuranan, ay kanya yangay at tumarabang ayu. Nu katanya tuwa gsudan tuwa tam. 15Marirukan sis Diyus at longan te,

“At nafaful at ngayu, wa nke labi.

Ay at yud ngayu, kasakan tuwa.”#8:15 Nu Galin 16:18.

Pablu Nafalo Titu sas Fulan Kurintu

16Guseganan ami sas Diyus, anway kanya nafaamatanganan sas Titu te, laman kafanyu ayu katvngvd yangay nu kafanyu ami ayu. 17Anway Titu gfadiyuganan yangay sa em fasadan. Ay anway kaumsig tuway katanya, at fagnaloun sanya sa ayu at fasadan tuwa mandi. 18Ay nafaalo ami at sadi tam fadugsay sa anya. Ay fagayu tagafanud gsaful tuwa sat fagbulun nu kamoyung at Masine fag Barita. 19Ay bundi kanya fagtvngvd, ngay tagafanud at nafili laman nangalo emi nanguba at ngay fantarabang sa sangay tagayudan, laman gfauseganan tam Fun, ay laman lumag te, kaumsig wami fiya gtarabang.

20Maadan ami, laman nus nga sinu di e glong sa baliwa nu an ami gmagurang takatatuy fag fagbulun at tagbvt. 21Anway em fasadan te, laman masine tuwa fagayu em fagbulun. Ay bundi tam Fun fagtvngvd at nasaful, anggan tuwa at ngay taw at nasaful em fagbulun.

22Ay saman yay kanya, sadi yak fadugsay sas fagafanudun at naalo anya. Nafaskud wami kanya em nalong tam fadugsay, ay nalag ami nu mafantarabang. Ay glabi wan katsi nu mafantarabang, teway matvngvd tuwa at fagafanudun sa ayu. 23Ay Titu, ku ufud ebi ginan sa ku fagbulun laman nantarabang ayu. Ay tam fadugsay fag duwa at naufud anya. Kanya ngay tagafanud at ngay nafili. Ay nu gugalian sik mauseganan sa tam Fun Isus. 24Ay nu katanya, afanyui tuwa ka fag tuluk ama, laman sumaful te, matuyan wa fiya em longan sa baliwa ayu, ay laman sumaful yangay ban tibak tagafanud siginan ka fag tuluk ama.

Currently Selected:

2 Kurintu 8: TAWEAST

Highlight

Copy

Compare