2 Kurintu 7

1Ku fakesugun ku ngay taw, anway Diyus wan at nafatuyanan katanya sa antam, lag gfagbulun nus nga setaw tagfafurat tam bilug ay tam falad. Ay ugati tuwa ugaliani sat matuyan ay alimui Diyus.

Pablu at Fagusegananun

2Afanyui tuwa emi, madyay di ami e asalanan nus di sadik taw. Ay di ami nafe asalanan ayu, nus di sadik taw. Ay manga di ami gfanluk, nus di sadik taw. 3Ku fagnalongun katanya bundi te, nanfaplan aw ayu, teway kata ku longan ebi te, kesug aktuwa dawdaw ayu. Dewa sas fakateun ay sas fagelelegun gudgufudan wa ban tam. 4Matvngvd ku fagafanudun sa ayu. Ay matvngvd ku fagusegananun sa ayu. Ay matvngvd tuwa nu gfabitsug am ku amatanganan. Dewa ngayu tagfauri emi, guseganan aktuwa dawdaw dewa katanya.

5Ay gina ami ndasug sas talun Masidunya, wami e nafafiyan em lufuy. Anway dewa ami nus nganday e gfauri way emi. E fabarangyan ami, ay kalimu ami sa em amatanganan. 6Dewa katanya, Diyus gfataluwan tuwa sas taw at mabaluwanan, ay katanya yangay sa emi gina Titu ndasug. 7Ay bundi fagtvngvd Titu at naadasugan at nafabitsug em amatanganan, anggan tuwa siginan ay nafagbulun at masine sa anya. Ay kanya nafoyung emi te, galagun wam dawdaw angku. Ay fakabaluun ay ay fagafanawaun sa angku at nafaugat ku fagusegananun.

8Dewa ebi nafabaluwanan aw ayu siginan ku rirukan, katsi dakdi kabalu, ebi dewa aw kabalu, teway nasaful aw te, ku rirukan dewa nafabaluwanan ayu, di nalugo. 9Ay katsi ku fagusegananun bunwa siginan ebi ay nabaluwan. Ku fagusegananun antuwa te, kanya Diyus at balyavtan laman gubun am ay ugali at yud masine. Nu katanya, masine tuwa sa ayu ku rirukan. 10Anway sik taw at fakabaluun nut siginan tuwas Diyus, kanya sik balyavtan laman gubun at asalanan, ay gfabagu at ugali laman umlangfe. Ay roro at fakabaluun nu ste way swa daga, gfasa way anya sas fakateun.

11Ay amatangani. Ay fakabaluun nut siginan tuwas Diyus e masuwad tuwa sa ayu. Anway gugatan tuwam gfalag te, wam e asalanan sa baliwa ku nalong ayu fag asalanan. Ay kalimata tuwam sa ka fag asalanan. Ay kalimu tuwam sa ban at faurianan. Ay gugatan tuwam gfafoli tam fagmasadiun. Ay mafamasadan tuwam gfauri at ke nasalan. Ay nafalag am sas fagayu te, di am e asalanan sa ebi fag ngay asalanan.

12Ay ebi dewa aw nariruk sa ayu, bunwa sa sik taw at nasalan ay bunwa sa sik taw at fagasalananan. Antuwa te, laman kalag si ayu te, setvngvd nu kafanyu am emi.

13Nu katanya tuwa ay fagbulun, nafabitsug am em amatanganan, ay kaugat yay gina ami nalag Titu nu maseunan anway sat nadalan kaduge maful ayu sanya. 14Nafauseganan aw ayu sa anya, ay kanya nasaful te, matuyan ku longan sa ayu baliwa, dakdi nkapla anya. 15Ay kayu ginan Titu gamatangan ay nafatiyugan ay ay natarabang anya, inkugat yay nu kesug am anya. 16Ay guseganan aw anway e fagafanudun akwa fiya sa ayu.

Currently Selected:

2 Kurintu 7: TAWEAST

Highlight

Copy

Compare