2 Kurintu 6
6
1Ami, Diyus at fatarabangan sa at fagbulun, matvngvd nu glong ami sa ayu te, fatvngvduni tuwa Diyus at famanyun sa ayu. 2Anway Diyus nalong te,
“Si ban at kasakan fag lungud nu nanfalangfe aw emu, malus aw emu ay tumarabang aw emu.”#6:2 Isayas 49:8
Nu katanya, dungugani! Katsi wan at kasakan fag lungud, ay katsi wan at lungud Diyus nu gfalangfe.
3Wami kaumsig igfataid nus nga sinu fag taw, laman di e kalong em fagbulun. 4Fagayu em fagbulun igfalagan ami te, ami wa fiya Diyus at fanuguwan. Ay nus nga setaw fag mataka mabaris tuwami, dewa e gfaurianan emi, ay dewa e gfatakan emi. 5Ay batang ami gafalangan, ay gasungsungan, ay e taw gfaringangan emi. Nabaris tuwami dawdaw, dewa tiba ginan wami gtiyug, ay we fakonun. 6Em ugali malayun tuwa sat masine, ay gsaful tuwami sat matuyan fag longan, ay gsungatan tuwami, ay malukme tuwami, ay gfaning tuwami sa at Masine fag Falad, ay matuyan tuwa nu kafanyu ami, 7matuyan tuwa em longan, ay Diyus gtarabang tuwa emi teway kanya madaragang. Ay em ugali at matuyan kata em famalabag sa em ngay fabarangyan. 8Tiba ginan e gseg emi, ay e kalimata emi. Ay e nalong te, masine em fagbulun. Ay e nalong yangay te, mauri em fagbulun. Ay e nalong yangay te, em fagbulun wa matuyan. Ay e nalong yangay te, matuyan tuwa em fagbulun. 9Tibak taw wa kafalbak emi ay roro takadungug tuwami fag ngay taw. Gakateun wami gugat, ay dewa katanya gleleg yay ami anggan katsi. Dewa dawdaw e nafegan emi, di nafate emi. 10Ay dewa ami dawdaw kabalu, faggugat guseganan tuwami. Ay dewa ami sik yud mabalan, nafe fagmabalanun ami ngayuk taw. Ay dewa ami yud e fagagbilugun, kata tuwami at ke kwa nus nge wain.
11Ngay taw Kurintu, di ami e suksukan em elongan, nafayamagun wami sa ayu, teway kafanyu ami dawdaw ayu. 12Faggugat kafanyu tuwami ayu, ay roro am way at yud kafanyu emi. 13Ay katsi glong aw sa ayu kata nu ku unga am te, “Afanyui tuwa emi katvngvd nu kafanyu ami ayu.”
Lag Gfaudgufudan sa at Yud Gafanud
14Lag gfaudgufudan sa at yud gafanud. Teway wa masine kagamut fagmasineun ay fagmauriun. Kata mayamag ay marum wa kaasfuwan. 15Nus nga setaw tam Fun Isus ay Satanas nu gyud gdiyuganan, katanya yangay anggan tagafanud ay at yud gafanud. 16Wa masine ngay tawtawan sanya sis Diyus bale. Itam wan tagleleg fag Diyus bale. Kata Diyus at longan te,
“Namanwan ban aw sa ku ngay taw, ay mufud aw anya.
Aw wa ban at Diyus.
Ay kanya ban ku ngay taw.”#6:16 Lebitiku 26:12; Eremyas 32:38; Esikyel 37:27.
17Ay nu katanya, tam Fun nalong te,
“Ayayui wan sanya ginan fag ngay taw at yud gafanud.
Ay asamani tuwa siginan anya.
Ay lag gafaningan nus nge wain at fagmafuratun.
Ay igfaful akban ayu sa angku.
18Ay aw wa ban ay Tama.
Ay am ban ku ngay unga.
Aw wan ay Fun at Madaragang at nalong katanya.”
Currently Selected:
2 Kurintu 6: TAWEAST
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
